ÄN SALOMON FOS (PROFERPIS) 31
BSM1 Ikkei ekewe kapas än Lemuel ewe kingen Masa, inan a aiti ngeni:
2 En nei ät mi achengicheng, en pälüen ai iotek, met üpwe eäni kapas ngonuk?
3 Kosap fangala om pöchökül ngeni fefin, kosap pwal fangala om moni ngeni ekewe fefin mi afeiengaua ekewe king.
4 En Lemuel, kopwe rongorong: Esap öchiti ekewe king pwe repwe ün wain, esap öchiti ekewe sounemenem pwe repwe moneiti sakau.
5 Pun are ra ün, repwe manlükala mine a fen pwüngüla pwe allük o atokala än chokewe meinisin mi riaföü pwüng.
6 Wain me sakau a fän iten chokewe mi feil ngeni mäla, fän iten chokewe mi nom lon riaföü watte.
7 Repwe ün o manlükala ar wöüngau me ar riaföü.
8 Kopwe kapas fän iten chokewe resap tongeni kapas fän püsin iter, pwal fän iten än chokewe mi mwelele pwüng.
9 Kopwe kapas o eäni kapwüng fän pwüng, kopwe peni än ekewe chon wöüngau me chon mwelele pwüng.
10 A men weires än eman epwe küna eman fefin mi lipwäköch! Neminewe a kon aüchea seni fau aüchea.
11 Pwülüan we a anomu an apilükülük won, esap fokun wor an wöüngau.
12 Lon unusen ränin manauan neminewe a föri föför mi mürina ngeni pwülüan, nge esap ariaföüü.
13 A achocho le angang ren pöün o föri mangaku seni ülöülen sip, pwal seni ewe irä itan fläks.
14 A uwato mongö seni toau usun chök ekewe sip wän chon amömö ra föri.
15 A pwätä ünmweerän o amolätä mongö fän iten chon leimwan, a pwal aanganga nöün kewe chon angang fefin.
16 A küna eu mälämäl o möni. A fotuki eu tanipin wain ren mine a angei seni an angang.
17 A achocho le angang, a pöchökül o föri sokopaten angang.
18 A mefi pwe meinisin mine a föri a lomot. A föri an angang tori lepwin.
19 A püsin föri an terech o türüni üfan.
20 A kichiöch ngeni ekewe chon wöüngau o lifang ngeni ekewe chon mwelele.
21 Esap öürek fän iten chon leimwan, lupwen sno a püngütiu, pun ir meinisin ra üföüf üf mi malül.
22 A püsin föri an pilangket, a üföüf üf seni mangaku mi pwechepwech me parapar.
23 Pwülüan we a sil me ren aramasen ewe telinimw, i eman lein ekewe souakomwen ewe fanü.
24 Neminewe a tei üf seni mangaku mi pwechepwech, a pwal föri pelit o amömö ngeni ekewe chon amömö.
25 A pöchökül o iteföüla, esap niuokusiti ewe fansoun epwe feito.
26 A eäni kapasen tipachem, mine a aiti ngeni aramas a fis fän kirikiröch.
27 A tümwünüöchü angangen chon leimwan, esap mongö anan mongö fän chipwang.
28 Nöün kana ra pwärätä ar kilisou ngeni, pwal pwülüan a ingemwareiti,
29 “Chomong fefin ra föri mine a fokun mürina, nge en ka föri mine a mürina seniir meinisin.”
30 Liewokekei mwakel chök, pwal liöch pön chök. Nge eman fefin mi niuokusiti ewe Samol mi Lapalap, iei i sipwe mwareiti.
31 Oupwe ngeni neminewe liwinin an angang. A fich ngeni pwe aramas meinisin repwe meniniti.