HIOP 18

¹ Mürin, Piltat ewe re Shu a pälüeni Hiop,

² “Inet kopwe ükütiu le eäni ei sokun kapas? Kopwe akomwen ekiek, mürin sipwe fos.

³ Pwota aipwe wewe ngeni man? Pwota äm aia tiparoch me reöm?

⁴ Hiop, ka püsin atatakisiik lon om song. Ifa usun, fanüfan epwe pöla pokitom, ika ewe achau epwe mwökütüwu seni lenian?

⁵ Ewer, än ewe aramasangau saram a kunula, nge ngetengeten an ekkei esap ükütiu.

⁶ Ewe saram lon imwan imw mangaku a rochopwakala, nge an lamp mi nom asan a kunula.

⁷ Sääpöchökülen pechen a kisikisila, a turula ren püsin an rawangau.

⁸ A püsin fetalelong lon eu cheew, a ipwetä won eu lenien likatup mi wor pwang fan.

⁹ Eu foren likapich a forei apilipilin pechen, a fif lon eu lenien likatup.

¹⁰ Efoch säl a monola lepwül fän itan, pwal eu likapich a wor lon alan.

¹¹ Eniweniw a aniuokusu ekis meinisin o tapweri ia a ipwela ie.

¹² Feiengau a echik o moneiti ewe aramasangau, feiengau a molotä fän itan, lupwen epwe turutiu.

¹³ Samau a enala ünüchan, samaun mäla a enala kifetin kewe.

¹⁴ A angeawu ewe aramasangau seni imwan imw mangaku ia a nom ie fän kinamwe, o emwenala ren ewe king itan eniweniw.

¹⁵ Mine a eäni me lom esap chüen nom lon imwan, nge pirimiston a toropasfeil won lenian.

¹⁶ Waran kewe mi nom fan ra mäla, nge palan kewe ra pwasala.

¹⁷ Esap chüen wor eman a chechemeni i me won ewe fanü, esap chüen föü itan me won lenian.

¹⁸ Aramas ra cheela seni saram ngeni rochopwak o asüela seni won fanüfan.

¹⁹ Esap wor nöün ika mwirimwirin me lein aramasan, esap pwal wor eman mi chüen manau lon ewe leni ia a nom ie me lom.

²⁰ Ekewe aramas mi nom lotou me ötiu ra mairü o chechech fän niuokus, lupwen ra rongorong usun an feiengau.

²¹ Ellet, iei usun mine a fis ngeni ekewe chon föföringau, iei feiengauen chokewe resap silei Kot.”