SAN MATEO 13

1 Jinchichba q’uin jini pasi aj Jesús tama ni otot jini, bixi tä chumtä tu ti’ nab. 2 Noj q’uenel gente c’oti bajca an. Aj Jesúsba ochi tä chumtä tama ump’e noj jucub. Ni noj q’uenel genteba coli tä wa’tä ti’ nab. 3 Cayi u yälbenob q’uen cua’ chichca, u ye’benob u t’an Dios t’oc tz’aji. U yälbenob ca’da: ―Ubinlaba. Ajni untu ajpäc’äb, bixi u t’it’ben u jut päc’äbi uc’a wetic. 4 Jinq’uin mu’to u t’it’änba, ximlaj yäli tan bij. De ya’i jaqui mutob isqui u laj buq’ue’. 5 Ximlaj yäli bajca an q’uen ji’tun, bajca mach totoj ayan cab utz. De ya’i seb weti uc’a mach xi tam tä cab. 6 De ya’i pasi noj ticäw q’uin, u puli jini päc’äbi uc’a mach’an tam u wi’ tä cab. Jin uc’a tiqui. 7 Ximlaj yäli tama chäcch’ix. De ya’i c’ac’a’ ch’iji ni chäcch’ix, u bisi yaba ni päc’äbi tuba mach ch’ijic. 8 Ximlaj yäli bajca an cab utzba. U yäq’ui chich u jut. Untec u yäq’ui cien u jut. Otro untec u yäq’ui sesenta u jut. Otro untecba u yäq’ui treinta u jut. 9 Äc’ä a chiquin tuba a ubinla utz y tic ta’ c’ajalinla cua’ mu’ cälbenetla. 10 De ya’i u natz’ijob u yajcänt’anob, u yälbijob ca’da: ―¿Cua’ uc’a a wälbenob ni gente u t’an Dios t’oc tz’aji que mach cheque cua’ u yäle’? 11 Aj Jesús u p’ali u yälbijob ca’da: ―Anelaba a’bintet a wina’tanla jini que mach uyut entende ajniba, cache’da u xe u nonoj chen manda ni Dios tä cieloba bajca anetla. Unejobba mach äc’binti yuwina’tanob. 12 Machca chichca que u yäq’ue’ u c’ajalin tuba u yubin cua’ cä ye’e’, Dios u xe u yäc’ben u cäne’ más. Machca chichca que mach u yäc’ä u c’ajalin tuba u yubin cua’ cä ye’e’ba, ixta lo que u cäni u xe tä laj äc’binte u najyesan. 13 Jin uc’a cälbenob u t’an Dios t’oc cua’ chichca tz’aji, uc’a tu chänenob ca’ a wälä mach u chänejob cua’, y tu yubinob mach uyoch tu c’ajalinob y mach u chen entendejob. 14 De jinchichba gente jini u yäli aj Isaías ajt’an ta Dios oniba jinq’uin u yäli ca’da: T’oc a chiquin a xe a ubinla y mach uyoch ta’ c’ajalinla. T’oc a jut a xe a chänenla y mach uta ta’ c’ajalinla cua’ jini. 15 Uc’a ni genteda, alaj tzätz’i u pixanob. Mach u totoj äc’ä u chiquinob tuba u yubin. Ca’ a wälä u mäqui u jutob y u chiquinob uc’a mach u chänen cua’ t’oc u jutob, y mach u yubin cua’ t’oc u chiquin. Mach yojob ochic cä t’an tu pixanob. Mach yojob u q’uexe’ u c’ajalinob tuba cä japänob t’oc u tanäjob. 16 ‘Anelaba ayan chich a ch’a’aljinla uc’a t’oc a jut a totoj chänenla y t’oc a chiquin a totoj ubinla. 17 Totojtoj cälbenetla, q’uen ajt’anob ta Dios oni y machcatac ajni tu toja tu jut Dios tä’ u yoli u chänenob jini mu’ a chänenla anelaba, pero mach u chänijob. Tä’ u yoli u yubinob jini a ubinlaba, y mach u yubijob. 18 ‘Ubinla jiq’uin cua’ u c’ote t’oc ni tz’aji tajpäc’äb. 19 Jinq’uin untu winic u yubin u t’an Cajnojala Dios cache’ u chen manda uneba y mach u che entende ni t’an jini, u c’ote ni tzuc pixan bajca an ni winic jini u pa’säben tan u c’ajalin ni t’an jini que u yubiba. Jin une ni jut päc’äbi que yäli tan bijba. 20 Ni jut päc’äbi que yäli tan ji’tunba, jin une machca u yubin u t’an Dios y t’oc noj ch’a’aljin u sapän. 21 Pero mach u nonoj col tan u pixan. Tä’ seb u pase, uc’a jinq’uin u te cua’ chichca u bäc’tesben u pixan o cua’ chichca tz’ibajtesia uc’a u sapi ni t’an jiniba, ca’ jini seb u sujtä tu pat. 22 Jini jut päc’äbi yäli tan ch’ixba, jin une ni machca u yubin u t’an Dios. De ya’i u tz’eje’ uba t’oc uc’a u sinlaj chen pensa q’uen cua’ chichca y uc’a u c’upän q’uen taq’uin. Más u yäq’ue’ tu c’ajalin upete ni jini que u t’an Dios, y ca’ jini mach u ch’ä u chen niump’e cua’ ca’ yo Dios. 23 Jini jut päc’äbi que yäli bajca an cab utzba, jin une ni machca u yubin u t’an Dios y u c’alin tz’onän, y ca’ jini u t’an Dios u yäq’ue’ más y más tu toja jini winic. Es ca’ a wälä untec päc’äbi que u yäq’ue’ q’uen u jut. Untec u yäq’ue’ cien u jut. Otro u yäq’ue’ sesenta u jut. Otro u yäq’ue’ treinta u jut. 24 De ya’i aj Jesús u yälbijob otro tz’aji ca’da: ―U manda ni Dios ya’an tä cieloba es ca’ untu winic u päq’ui u jut u päc’äbi utzba tan u cab. 25 Ump’e ac’äb, jinq’uin upete mu’ u wäye, ti untu u lot que mach u bisa bij t’ocba, u päc’bi u jut tzuc bänäla tama u päc’äbi ni winic. De ya’i bixi tu yotot. 26 Jinq’uin t’äbäli ni päc’äbi, u chi u jut. Ya’i checti ni bänäla täcä tama ni päc’äbi. 27 U yajpatanob ni winic u yum päc’äbiba c’otijob u yälben ca’da: “Cajnoja, ¿mach quira a päq’ui yajän trigo tan a cab? ¿Cua’ uc’a jiq’uin aweti tzuc bänäla täcä?" 28 Une u yälbijob ca’da: “Untu cä lot que mach u bisa bij t’oc no’onba u cherbon ca’ jini”. Ni u yajpatanob u yälbijob ca’da: “¿A wo quira bada xicon cä boque’ t’ocob ni tzuc bänäla jini?" 29 Une u yälbijob ca’da: “Mach, mach me’ixto ta’ boque’la ni tzuc bänäla jini, a teclaj boque’la ni trigo täcä. 30 Äctan que ch’ijic u chap’elma ixta que c’ä’nac u jut. Tu xe tä ch’uch’inte u jut jini päc’äbi, cä xe cälben ni cajpatanob ca’da: Bocola najtäcä ni tzuc bänäla jini, y cächäla ajunjob tuba pulcac. Ni trigoba, ch’uch’änla tuba a wosenla tama ni otot bajca u ch’ujninte u jut ni päc’äbi”. 31 U yälbijob tä cha’num otro ump’e tz’aji ca’da: ―U manda Dios bajca anonla pancab es ca’ unxim yoc bec’ mostaza, que u ch’e’ untu winic tuba u päq’ue’ tan u cab. 32 Ni bec’ mostazaba más p’i’ une que upete u bec’ päc’äbi. Pero jinq’uin u weteba, noj u ch’ije. Más noj u te’e une que upete päc’äbi. Ixta mut isqui u c’ote u chen u c’ub tama u te’e. 33 Otro ump’e tz’aji u yälbijob tä cha’num ca’da: ―U manda ni Dios ya’an tä cieloba es ca’ jini u yä’can tan waj tuba u yäc’ben jusicba. Jinq’uin untu ixic u ch’e’ tz’ita’ u yäq’ue’ tama uxp’e noj t’ub de harina, de ya’i u laj xabän uba t’oc y u jusesan. 34 Upete ni t’anda aj Jesús u yälbijob ni gente t’oc tz’aji que mach u se’in och tu c’ajalin untu cua’ jini. Mach u yälbijob niump’e cua’ sin que mach t’oc jini tz’aji. 35 Ca’ jini pasi toj jini u tz’ibi ajt’an ta Dios oniba jinq’uin u tz’ibi ca’da: Cä xe cä ye’e’ u t’an Dios t’oc tz’aji que mach u se’in och tu c’ajalin untu cua’ jini. Cä xe cäle’ ni mach bay ubqui oniba ixta bada. 36 Jinq’uin aj Jesús u laj täsqui ni gentejob bixic, ochi une tan otot. U yajcänt’anob u natz’ijob, u yälben ca’da: ―Älbenon t’ocob cache’da ni bäläb tz’aji tuba ni tzuc bänäla pä’qui tan trigoba. 37 Aj Jesús u p’albijob ca’da: ―Machca u päq’ue’ ni trigoba, no’on une que sutwänon de winic. 38 U caba ni päc’äbiba, u pancab une. Jini jut päc’äbi utztacba, jin une ni u ch’ocob Diosba. Jini tzuc bänälaba, jin une ni u ch’ocob tzuc pixan. 39 Jini winic que u päq’ui tzuc bänäla tama u päc’äbi u lot uc’a mach yo u chänenba, tzuc pixan une. U q’uini ta ch’uch’intic u jut ni trigoba, u xupiba q’uin tu pancab une. Ni ajpatanob u ch’uch’ben u jut trigoba, u yajc’äncanob Dios une. 40 Ca’ chich u bojcan ni tzuc bänäla y u julcan tama c’ac’ tuba pulicba, che’ chich u xe u chen pasa tu xupiba q’uin tu pancab. 41 No’on que sutwänon de winicba cä xe cä täscun cajc’äncanob tuba u pa’sen bajca u chen manda Dios upete jini u yäc’ben u säte’ machcatac an tu tojaba, con to’o jini mach u che tu toja täcäba. 42 Cajc’äncanob u xe u jule’ob tan c’ac’ upete ni jinijob. Ya’i u xe u chen uq’uejob y u xe u chen cäch’äcne yejob. 43 Jinq’uinba u xe tä chäninte cache’ an u pitzilan Dios tuyac’ojob upete machcatac u chen tu toja. Ca’ chich u chäninte ni junch’äcni tuba q’uin, che’ chich u xe tä chäninte ni u pitzilanob bajca u chen manda cä Papla Dios. Äc’ä a chiquin tuba a ubinla utz y tic ta’ c’ajalinla cua’ mu’ cälbenetla. 44 ‘U manda ni Dios ya’an tä cieloba u c’ote t’oc ca’ q’uen taq’uin que ya’ mucu yaba cabba. Jinq’uin untu winic u pojlen, de ya’i u sujtä u cha’num muque’. U bixe tu yotot t’oc noj ch’a’aljin u chone’ upete lo que u cänäntan tuba u mäne’ ni cab jini bajca u pojli ni taq’uin jini. 45 ‘U manda ni Dios ya’an tä cieloba u c’ote t’oc ca’ ni perla tä’ pitziba que u sacän untu ajman tuba u mäne’. 46 Jinq’uin u pojlen unxim que tä’ choj u valorba, u bixe u chone’ upete lo que u cänäntan tuba u mäne’. 47 ‘U manda ni Dios ya’an tä cieloba u c’ote t’oc ca’ ump’e chim ta q’uechi’ buch’ täcä. Jinq’uin u julcan ni chim tama nab, tomp’e u yoche tama ni chim buch’ ta c’uxcacba y jini que mach u c’uxcaba. 48 Cuanta u chänijob ni ajq’uech buch’ob cache’ atuliba, u t’äbsenob tä cab. De ya’i u chumtäjob u ch’uch’änob ni buch’ utztacba u yäq’ue’ tan chach. Ni mach utztacba u choque’ob une. 49 Che’ chich u xe u chen pasa tu xupiba q’uin tu pancab. U xe tä tejob ajc’äncanob ta Dios u pa’senob ni machcatac mach u chi tu tojaba bajca ya’anob nämte’ t’oc machcatac ayan tu tojaba. 50 Jini machcatac mach u chi tu tojaba u xe tä julcan tama noj ticäw c’ac’. Ya’i une u xe u chen uq’uejob y u xe u chen cäch’äcne yejob. 51 Aj Jesús u c’atbijob ca’da: ―¿A’ochi ta’ c’ajalinla upete ni acälbetlaba? Unejob u p’ali: ―A’ochi chich. 52 Aj Jesús u yälbijob ca’da: ―Utz chich, uc’a upete machcatac yuwi ni ley taj Moisés, y bada u cäne’ cache’da an u manda ni Dios ya’an tä cieloba, es ca’ untu winic ajnoja tuba ump’e otot que mäx utz upete lo que u cänäntanba. Une u ch’e’ u yäc’ben u lot cua’ chichca u cänäntan tzijib o jelem. 53 Jinq’uin u tzupsi u yäle’ upete ni tz’aji jini, aj Jesús pasi ya’i, bixi tu cab. 54 Tu c’ote tu cabba, u ye’e’ u t’an Dios tama u ch’ujob ni aj judíosob ya’i. Tajch’icwäni u jutob u yubinob u t’an y u yäle’ob ca’da: ―¿Cada u c’ac’a’ ch’i ni c’ajalin jini? ¿Caxca u yäc’bi poder u chen jini que mach bay uchänintiba? 55 ¿Mach quira jinda u yajlo’ ni ajpälte’ u c’aba’ aj Joséba? ¿Mach quira ix María u c’aba’ u na’, y u jitz’inobba aj Jacobo, aj José, aj Simón, y aj Judas? 56 ¿Mach quira nämte’ t’oc no’onla täcä la’anob jitz’inob ixictac? ¿Cada jiq’uin u c’ac’a’ cäni upete cua’ chichca que u chen? 57 Mach u ni’ olijob u yubinob u t’an. Aj Jesúsba u yälbijob ca’da: ―Untu ajt’an ta Dios sec’ tan yotot y tan u cab mach totoj yo u yubinob u t’an. 58 Mach u chi q’uen cua’ chichca tuba chäncac u poder ya’i uc’a mach u totoj tz’ombejob.