কুলিচ কুরাঃআ কামি 9

1 শৌল ইন্তং হঅ প্রভু রাঃআ চেলাকুকে বর উদুয়া কুকেনায় হেৎদ গজেৎকু কেনায়, ইনি মারাং বামড়েকুরা হান্ডে সেনলেনায় হেৎদ, 2 দম্মেশকস্থ নাগার রাঃআ সমাজ অড়া, যতচ রাঃআ নাতিনাং গিরা নানামেনায়, যেন ইনি ইনা হরাতে সেনয়াকু কড়াহন হেৎদ কুড়িহন অকয়কে নামকুয়ায়্য় য়, ইঙ্কূকে আটক কাতে যিরুশালেম শেহার তে আউ দাড়িকুয়ায়্য় য়। 3 চিন্তং সেনকেনায়, হেৎদ দম্মেশকরাঃআ কাতাতে চিন্তং সেটেরেনায়, আচকাগে চেতাং হাতেন মার্শাল ইনিরা চারুধার ঝালকা রাকাবেনা। 4 হেৎদ ইনি অতেরে নুরেনায় হেৎদ মিয়াৎ আড়াঙ আয়ুমকেয়ায় শৌল, শৌল, চিয়া ইঞকে হেরেশমেন এমাঞতানাম? 5 শৌল গাম কেয়ায় “প্রভু, আম অকয়তানাম? প্রভু গাম কেয়ায়, ইঞ যীশু, অকয়কে আম হেরেশমেন এমাইতানাম। 6 মেন্খান বিরিৎমে, শেহার তে বলনমে, আমকে কিনা চিকা হুইয়া, ইনা গামোয়া। 7 হেৎদ ইনিরা গাতিকু হায়কাটেনতেকু তিঙ্গু তাহীনাআ হেৎদ ইঙ্কূ ইনা আড়াঙ আয়ুম কেৎয়াকু মেন্খান ইঙ্কূ যাহা নাহঅ কাকু নেল নামলাৎ আ। 8 হেৎদ শৌল তায়মতে অতে হাতেন রিরিদদেনায়, মেন্খান চিন্তং মেদ আরিৎ কেৎ খানে ইনি যাহানা কায় নেলনামলাৎ আয়, হেৎদ ইনি রাঃআ গাতিকু ইনি রাঃআ তিহি সাবকেৎ তেকু ইনিকে দম্মেশক শেহারতে ইদিকিয়াকু। 9 হেৎদ ইনি আপি মাহা যাকিৎ যাহানাগে কায় নেলনাম দাড়িলাৎ আয় হেৎদ যাহানা কায় জমলাৎ আয় চি কায় নুঃউ লাৎ আয়। 10 দম্মেশকরে অননিয় নুতুমতে মিয়াৎ চেলা তাহীনকেনায়। প্রভু ইনিকে কুকুমুতে গামকিয়ায় “অননীয়। ইনি তেলা কেয়ায়, প্রভু, নেলিঞ মে ইঞ নেথাংরিঞা গামেম ? 11 ইন্তং প্রভু ইনিকে গাম কিয়ায় “বিরিদমে হেৎদ সোজা নুতুমান হরাতে সেনকাতে যিহুদারাঃআ অড়াতে তার্ষ শেহার রে শৌল নুতুমান মিয়াৎ হড়কে পাঞ্জাইম, চিয়াচি, ইনি বিন্তিতানায়। 12 শৌল কুকুমু নেলকেয়ায় যে “অননিয় নুতুমতে মিয়াৎ হড় হিচ কাতে ইনি রাঃআ বহঅ চেতাংরে তিহি দঃহকেয়ায় যেন ইনি দঃহরা নেল নামেকায়। 13 অননীয় গাম রুয়াড় কেয়ায়, প্রভু গো, ইঞ গাদালেকা হড় কুরাঃআ হান্ডে হাতেন ইনি হড়রাঃআ বাবত তে আয়ুমতাৎ আইঞ, ইনি যিরুশালেম শেহার রে আমা বাছায়ান রীলামালা হড়কুকে চিন্তিৎ হেরেশমেন তাৎ কুয়ায়্য় য়, 14 নেডে হঅ চিন্তিলেকা হড় আমা নুতুম তে বিন্তি রাঃআয়াকু, ইঙ্কূ যত হড়কে আটক ইদিরাঃআ আইদারী ইঙ্কূ মারাং বামড়ে কুরাঃআ হান্ডে হাতেন নাম তাৎআয়। 15 মেন্খান প্রভু যীশু ইনিকে গাম কিয়ায়, আম সেনম, চিয়াচি অইহুদি কুরাঃআ হেৎদ রাপাজ কুরাঃআ হেৎদ খেরোয়াল হনহপন কুরাঃআ তালারে ইঞা নুতুম গঃঅ নাতিনাং ইনিদ ইঞা বাছায়ান হড় তানায়, 16 চিয়াচি ইঞ হানিকে নেলতকাইঞ, ইঞা নুতুম রাঃআ নাতিরাং হানিকে চিন্তি কষ্ট সাহা হুইওয়া। 17 এন্তে অননীয় সেএনায় হেৎদ ইনা অড়ারে বলনতে ইনিরা বহঅ চেতাংরে তিহি দঃহঅকাতে গামকেয়ায়, বকইঞ শৌল, প্রভু যীশু, অকয় আমা হিজুহরারে আমকে দেখা এমলাৎ আমায়, ইনি ইঞকে কুল তিয়াইঞ, যেন আম অটঅ দিশা নাম রুয়াড়েম হেৎদ রীলামালা আত্মাতে পেরেজম। 18 হেৎদ ইনা ঘাড়িগে ইনিরা মেদ হাতেন যেন মিয়াৎ হাকুরাঃআ সিড়িইঞ লিঙ্গীনাআ হেৎদ ইনি দিশা নামরুয়াড়কেয়ায়, হেৎদ বিরিদেন্তে ডুবুলেনায়, 19 তায়মতে ইনি জমকেয়ায় হেৎদ দাড়ি নামকেয়ায়। হেৎদ ইনি দম্মেশক রিঙ্কূ চেলাকু লঅ কথক মাহা তাহিনায়, 20 হেৎদ সাঙ্গে সাথ ইনি সমাজঅড়ারে সেনকাতে যীশু রাঃআ জাগার পাসনা লাগায়নায়, যে ইনিগে ঈশ্বর রাঃআ হন তানায়। 21 হেৎদ অকয় ইনি রাঃআ থুতি আয়ুম কেৎয়াকু, ইঙ্কূ যতচ হাহাড়ায় নাকু, গাম লাগায়নাকু, নিই কি হানি হড়টা ল্হয়, অকয় তানায়, যাহায় যিরুশালেম শেহার রে যীশু রাঃআ নুতুমতে নেহর বিন্তিৎ কেনাকু ইঙ্কূকে উচ্ছেদকেৎ কুয়ায়্য়য়? হেৎদ ইনি নেথাংরে হিচা কানায় যেন ইঙ্কূকে আটক কাতে মারাং বামড়ে কুরাঃআ হান্ডে ইদিকুকায়। 22 মেন্খান শৌল হুদাং হুদাংতে দাড়ি নামকেয়ায় হেৎদ দম্মেশকরে বাসায়ান ইহুদিকুকে উত্তর এমরাঃআ হরা কায় এমলাৎ কুয়ায়্য় য় হেৎদ প্রমাণ এম লাগায়নায় যে যীশু গে ইনি খ্রীষ্ট তানায়। 23 হেৎদ গাদা মাহা পারমেনাআ খানঃঅ, ইহুদিকু ইনিকে গচরাঃআ কারসাদী কেৎয়াকু। 24 মেন্খান শৌল ইঙ্কূয়া চালাকি কারসাদী সারিনামকেয়ায়। হেৎদ ইঙ্কূ যেন ইনিকে গয়চ দাড়িকাআকু ইনা নাতিরাং নিদা সিঙ্গি শেহার রাঃআ দুয়াররে হরঃঅ লাগায়নাকু। 25 মেন্খান ইনিরা চেলাকু আয়ুব বাতিরাং ইনিকে ইদিকাতে মিয়াৎ ঝুড়িয়াতে পাঁচিল রাঃআ চেতাং হরকাতে বাহারতে আড়গু কিয়াকু। 26 হেৎদ ইনি চিন্তং যিরুশালেম শেহার রে সেটেরকাতে চেলাকুলঅ মেসা নাতিনাং কুরুমুটু কেয়ায়, যতচ ইনিকে বর কিয়াকু, ইনি যে চেলা তানায়, ইনা কাকু পাতিয়া লেনা। 27 ইন্তং বার্ণবা শৌলরা তিহি সাবকাতে কুলিচ কুরাঃআ হান্ডে ইদিকিয়ায়, হেৎদ হরা তালারে চিল্কা প্রভুকে নেলনামলিয়ায়, হেৎদ প্রভু যে ইনি লঅ থুতিকেনায় হেৎদ চিল্কা ইনি দম্মেশকরে যীশু রাঃআ নুতুমতে সাহস লঅ পাসনা কেনায়, নিয়া যত ইঙ্কূয়া হান্ডে গামকেৎয়ায়। 28 হেৎদ শৌল যিরুশালেম শেহার রে ইঙ্কূ লঅ তাহীনকেনায় হেৎদ ভীতিরতে হেৎদ বাহারতে সেনঃঅ হিজু কেনায়, প্রভু রাঃআ নুতুমতে সাহস লঅ পাসনা কেয়ায়, 29 হেৎদ ইনি গ্রীক আড়াঙ জাগারতে থুতিয়ান ইহুদিকু লঅ থুতিজাগার হেৎদ নিপিয়ায়, মেন্খান ইঙ্কূ ইনিকে গয়চ নাতিরাং কুরুমুটু কেৎয়াকু। 30 চিন্তং পাতিয়ান হাগাকু নিয়াটা সারিনামকেৎয়াকু, ইনিকে কৈসরিয়া শেহার নাগার তে ইদিকিয়াকু হেৎদ এন্ডে হাতেন তার্স শেহার রে কুলকিয়াকু। 31 এন্তে ইন্তং যিহূদীয়া, গালীল হেৎদ শমরিয়া রাঃআ যত টলা রে মণ্ডলী সুলুক হেৎদ হারা রাকাববেনাআ হেৎদ প্রভু রাঃআ বরতে হেৎদ রীলামালা আত্মা রাঃআ লোভানতে সেন সেনতে মন্ডলী গুঁডুররে গাদা লেকায়নাআ। 32 হেৎদ পিতর যত থাংরে ঘুরা ঘুরাতে লুদ্দা শেহার রে বাসায়ান তাহিয়ান ইশ্বর রাঃআ রীলামালা হড় কুরাঃআ হান্ডে সেএনায়। 33 এন্ডে ইনি ঐনিয় নুতুমতে মিয়াৎ হড় লঅ নাপামেনায়, ইনি আটি সির্মাং বিছানারে তাহিন কেনায়, চিয়াচি ইনি রাঃআ অবস হড়ম হুইলেনা। 34 পিতর ইনিকে গামা কিয়ায়, ঐনিয়, যীশু খ্রীষ্ট আমকে বুগিকেৎ মেয়ায়, বিরিৎমে হেৎদ আমা পাটি কুড়াম মা। ইনাতে ইনি ইন্তংগে বিরিদেনায়। 35 ইন্তং লুদ্দা শেহার হেৎদ শারণ টলা রে বাসায়ান যত হড়কু ইনিকে নেল নাম কিয়াকু হেৎদ ইঙ্কূ প্রভু রাঃআ হান্তে রুয়াড়েনাকু। 36 হেৎদ যোফা শেহাররে মিয়াৎ চেলা তাহীন কেনায় ইনিরা নুতুম টাবিথা, অনুবাদ লেংখান নিয়া নুতুম রাঃআ অর্থ গ্রীক নুতুম দরীকা (হরিণী), ইনি রেঙ্গেজকু রাঃআ নাতিরাং নানান সৎ কামী হেৎদ দানেৎ কেনায়। 37 ইনা হুলাং ইনি রুআয়নায় হেৎদ গজেনায়, এন্ডে হড়কু ইনিকে উম কিয়াকু হেৎদ চেতাংরাঃআ অড়ারে দক্ষীণ দর বহঅ কাতে গিতিয় দঃহঅ কিয়াকু। 38 হেৎদ লুদ্দা যাফো শেহার রাঃআ কাতারে হুইয়েনতে হেৎদ পিতর লুদ্দারে মেনাইয়াআ আয়ুমকেৎ তেকু, যাফো রিঙ্কূ চেলা ইনিরা হান্ডে বার হড়কে কুলকেৎ কিনতেকু নিয়া গামকাতে নেহরা কিয়াকু “কা দেরি কাতে আলেয়া হান্ডে হিজুম। 39 হেৎদ পিতর বিরিদেন্তে ইঙ্কূ লঅ সেনেনায়। চিন্তং ইনি সেটেরেনায়, ইঙ্কূ ইনিকে চেতাং রাঃআ অড়াতে ইদিকিয়াকু। হেৎদ যত রান্ডিকু ইনিরা চারুধার তিঙ্গুইয়েন তেকু ইয়াম লাগায় নাকু হেৎদ দরীকা ইঙ্কূলঅ তাহীন অক্ত অকা যত পাঞ্চি হেৎদ কিচি-সিনিব বানালাৎ আয়, ইনাকু যত উদু লাগায়নায়। 40 ইন্তং পিতর যতচ কে অড়া বাহারতে উডুঙকেৎ কুয়ায়্য় য়, উকুড়ুমেনায় হেৎদ বিন্তিকেয়ায়, ইনা তায়ম ইনি গজিচ রাঃআ হান্তে ঘুরায়েন্তে ইনি গামকেয়ায় “টাবিথা মা বিরিদমে। ইনাতে ইনি মেদ আরিৎ কেৎআয় হেৎদ পিতরকে নেলকিয়তে বিরিদ দুবেনায়। 41 ইন্তং পিতর তিহিতে ইনিকে বিরিৎ রাকাব কিয়ায় হেৎদ পাতিওয়ানকুকে হেৎদ রান্ডিকুকে রাঃআকেৎ কুতে জীউৎ উদুকেৎ কুয়ায়্য়য়। 42 নিয়া ঘটনা যাফো শেহার রাঃআ যত থাংরে পসরায়না হেৎদ গাদালেকা হড় প্রভুকে পাতিয়া কিয়াকু। 43 হেৎদ পিতর গাদামাহা যাকিৎ যাফোরে শিমন নুতুমান মিয়াৎ চামার হড় রাঃআ অড়ারে তাহীনলেনায়।