SAN MATEO 1

1 Re wuj ri nuchop el wawe’, jun wuj ri tz’ibatal wi ca ri quibi’ ri ye ojer tak rati’t rumama’ ri Jesucristo. Can nik’alajin wi c’a chi Riya’ can jun chique ri ye ralc’ual ca ri rey David, y can ralc’ual ca chuka’ ri Abraham. 2 Ri Abraham yari’ ri xalc’ualan ri Isaac; ri Isaac xralc’ualaj ri Jacob; ri Jacob xralc’ualaj ri Judá y ri nic’aj chic rach’alal. 3 Yac’a ri Judá y ri Tamar ri rixjayil xecalc’ualaj ri Fares y ri Zara; yac’a ri Fares ri xalc’ualan ri Esrom; y ri Esrom xralc’ualaj ri Aram. 4 Y ri Aram xralc’ualaj ri Aminadab; ri Aminadab xralc’ualaj ri Naasón; y ri Naasón xralc’ualaj ri Salmón. 5 Y ri Salmón y ri Rahab ri rixjayil xcalc’ualaj ri Booz; ri Booz y ri Rut ri rixjayil xcalc’ualaj ri Obed; y ri Obed xralc’ualaj ri Isaí. 6 Y ri Isaí xralc’ualaj ri David ri xoc jun rey; y ri rey David xralc’ualaj ri Salomón. Y ri rute’ ri Salomón, ya ri rixjayil ca ri Urías. 7 Yac’a ri Salomón xralc’ualaj ri Roboam; ri Roboam xralc’ualaj ri Abías; y ri Abías xralc’ualaj ri Asa. 8 Y ri Asa xralc’ualaj ri Josafat; ri Josafat xralc’ualaj ri Joram; y ri Joram xralc’ualaj ri Uzías. 9 Y ri Uzías xralc’ualaj ri Jotam; ri Jotam xralc’ualaj ri Acaz; y ri Acaz xralc’ualaj ri Ezequías. 10 Y ri Ezequías xralc’ualaj ri Manasés; ri Manasés xralc’ualaj ri Amón; y ri Amón xralc’ualaj ri Josías. 11 Y ri Josías xralc’ualaj ri Jeconías y ri ye nic’aj chic rach’alal ri Jeconías. Y ya tiempo ri’ tek ri kech aj Israel xechapatej el y xe’uc’uex c’a pa Babilonia. 12 Y tek yec’o chic chiri’ pa Babilonia, ri Jeconías xralc’ualaj ri Salatiel; y ri Salatiel xralc’ualaj ri Zorobabel. 13 Y ri Zorobabel xralc’ualaj ri Abiud; ri Abiud xralc’ualaj ri Eliaquim; y ri Eliaquim xralc’ualaj ri Azor. 14 Y ri Azor xralc’ualaj ri Sadoc; ri Sadoc xralc’ualaj ri Aquim; y ri Aquim xralc’ualaj ri Eliud. 15 Y ri Eliud xralc’ualaj ri Eleazar; ri Eleazar xralc’ualaj ri Matán; ri Matán xralc’ualaj chuka’ jun ri Jacob chuka’ rubi’. 16 Y ri Jacob xralc’ualaj c’a ri José ri xoc rachijil ri María. Y ri María ri’ yari’ ri xalan ri Jesús ri Cristo. 17 Cajlajuj c’a sol winek xec’ase’ el, ri nitiquir pe riq’ui ri Abraham c’a riq’ui ri rey David. Cajlajuj chuka’ sol winek xec’ase’ el, ri nitiquir pe riq’ui ri rey David c’a chupan ri tiempo tek ri kech aj Israel xechapatej el y xe’uc’uex c’a pa Babilonia. Y cajlajuj chuka’ sol winek xec’ase’ el, ri nitiquir pe tek ri kech aj Israel xebec’oje’ pa Babilonia, hasta riq’ui ri tiempo tek xalex ri Cristo. 18 Y ri ralaxbel ri Jesucristo quec’are’ ri rubanic: Ri María rute’ ri Jesucristo, jun c’a k’opoj ri c’utun chic ruma ri José. Y xc’ulwachitej c’a chi tek c’a ma jane quic’uan ta qui’, xnabetej chi ri María yawa’ chic riche (rixin) chi nic’oje’ ral. Yac’a ri María queri’ xril ruma ruchuk’a’ ri Lok’olaj Espíritu. 19 Yac’a ri José ri nbe’oc rachijil ri María, can jun chojmilaj winek wi; y man c’a xrajo’ ta xuya’ (xutzek) ruq’uix ri María chiquiwech ri winek, rumari’ xrajo’ chi man ta ninabex chi nuya’ ca. 20 Y ri José ya c’a ri’ ri nuch’ob pa ránima. Y pa rachic’ xuc’ut c’a ri’ jun ángel riche (rixin) ri Ajaf chuwech, y xbix chare ruma ri ángel ri’: Riyit José, ri yit jun chique ri ye ralc’ual ca ri rey David, man c’a taxibij ta awi’ chi yac’ule’ riq’ui ri María ri ac’utun chic riche (rixin) chi ntoc awixjayil. Wacami petenak chic alanic chrij ruma ya ri Lok’olaj Espíritu xka pa ruwi’. 21 Ri ac’al c’a ri xtralaj ri María, ti c’ajol (ala’), y JESÃS c’a rubi’ xtaya’, ruma ya Riya’ ri xquecolo ri winek chupan ri quimac. 22 Ronojel c’a re’ xc’ulwachitej riche (rixin) chi can nibanatej ri xbix ruma ri Dios chare ri profeta Isaías ri jun chique ri xek’alajsan ri ruch’abel ri Dios ojer ca, tek xubij: 23 Tiwetamaj c’a chi xtic’oje’ jun ri c’a k’opoj na y xtic’oje’ jun ral, astape’ man c’o ta riq’ui achi. Y can xtralaj na wi jun ac’al, ti c’ajol (ala’), ri xtubini’aj Emanuel. Re bi’aj re’ can ntel c’a chi tzij chi ri Dios c’o kiq’ui. 24 Tek xc’astej c’a ri José, can xuben wi achi’el ri xbix chare ruma ri ángel riche (rixin) ri Ajaf. Riya’ can xuc’om na wi ri María riche (rixin) chi xoc rixjayil. 25 Pero ri José majun xunek ta ri María c’a ya tek alaxnek chic na ri nabey ral. Y tek xalex ri ac’al, JESÃS ri rubi’ xuya’.