SAN LUCAS 22

1 Y xa chua’k-cabij c’a ri quinimak’ij ri israelitas chiri’, jun nimak’ij tok niquitej caxlan-vey ri manek ch’en (ch’amilej-k’or) riq’uin, y niquibij pascua chire. 2 Y jari’ c’a tok ri principal-i’ tak sacerdotes y ri etamanela’ chirij ri ley niquich’obola’ c’a achique ta rubanic niquiben richin queri’ niquicamisaj ri Jesús. Pero xa quixibin-qui’ chiquivech ri vinek. 3 Y ri Judas ri jun chique ri cablajuj rutijoxela’ ri Jesús, ri tijoxel ri xbix chuka’ Iscariote chire, can nisamej chic vi ri Satanás pa ránima. 4 Romari’ ri Judas ri’ xbe c’a quiq’uin ri principal-i’ tak sacerdotes y quiq’uin chuka’ ri ye’uc’uan quichin ri e chajinela’ ri chiri’ pa rachoch ri Dios, y xch’on quiq’uin chirij ri achique rubanic xtuben richin nujech ri Jesús pa quik’a’. 5 Y rije’ can janíla c’a xequicot tok xcac’axaj ri’, y xquisuj ru-mero romari’. 6 Ri Judas can xberusuju’ c’a can ri Jesús chique. Y xuchop c’a ruch’obic jampe’ tok xtujech pa quik’a’, y can c’a ja tok man quimolon ta qui’ vinek riq’uin. 7 Tok xoka’ ri nimak’ij, k’ij richin nitij ri caxlan-vey manek ch’en (ch’amilej-k’or) riq’uin, y tok yecamisex chuka’ ri tak carne’l ri richin ri pascua, 8 ri Jesús xerutek c’a el ri Pedro y ri Juan, y xubij c’a el chique: Quixbiyin y tibana’ rutzil ri xtikatej chupan re pascua re’. 9 Y ri ca’i’ tijoxela’ xquic’utuj c’a chire: ¿Acuchi c’a navajo-vi chi nikaben ruchojmil? 10 Y ri Jesús xubij chique: Tok xquixapon ri pa tinamit Jerusalem, xtitz’et c’a chi c’o jun achin aj-ic’ ri ruc’amon-pe ruya’ pa jun cucu’ (k’e’l). Tivojkaj c’a el re achin re’ c’a achique jay xtoc-vi. 11 Y tibij c’a chire ri tata’aj chupan ri jun jay ri’: Ri Katijonel rubin c’a pe: ¿Achique jay re vave’ pan avachoch ri utz ta richin ninben ri va’in richin re pascua e vachibilan ri nutijoxela’? quixcha’ chire. 12 Y ri rajaf-jay xquixruc’uaj c’a pa jun ruca’n vik jay (cavek jay). Y chiri’ c’o jun nima-jay ri chojmirisan chic rupan. Ja ri chiri’ tibana-vi rutzil ri xtikatej richin re pascua, xe’uche’ex-el. 13 Y ri ca’i’ tijoxela’ xebe c’a. Y can achi’el ri rubin-el ri Jesús chique, can queri’ ri xbanatej. Y rije’ can xquiben-vi c’a rutzil ronojel ri nic’atzin richin ri va’in richin ri pascua ri’. 14 Y tok xapon c’a ri hora, ri Jesús y ri cablajuj apóstoles xetz’uye-apo ri pa mesa. 15 Y ri Jesús xubij c’a chique: Can janíla nurayiben-pe chi nabey chi yinapon chuvech ri camic, junan nikaben can re jun va’in richin re jun pascua re’. 16 Roma can ninbij-vi c’a chive, chi can c’a ja tok c’o chic na ri utzilej ruk’atbel-tzij ri Dios, y tok banatajinek chic na ronojel ri nic’ulun-vi chi tzij ri pascua, can c’a jari’ tok xtinben chic re jun va’in re’. 17 Y ri Jesús xuchop c’a jun vaso ri c’o ruya’al-uva chupan, y tok rumatioxin chic chire ri Dios, xubij: Tikumu’ c’a can chi’ivonojel. 18 Roma can ninbij-vi c’a chive, chi can c’a ja tok c’o chic na ri utzilej ruk’atbel-tzij ri Dios, can c’ari’ tok xtinkun chic jun bey ruya’al-uva. 19 Y que c’a chuka’ ri’ xuq’uen-apo jun caxlan-vey, y tok rumatioxin chic chire ri Dios, xuper (xupir) ri caxlan-vey y xuya’ chique ri rutijoxela’ y xubij: Re’ natabel vichin yin. Can titija’ c’a. Roma ri nuch’acul can xtijach c’a richin chi napon pa camic, richin yixcolotej. 20 Y tok e va’inek chic, ri Jesús xuchop c’a chuka’ ri vaso ri c’o ruya’al-uva chupan, y xubij: Re ruya’al-uva re’, jare’ ri nuquiq’uel ri xtibiyin tok xquiquen (xquicom). Riq’uin c’a re nuquiq’uel re’, can jac’are’ xc’achoj ri c’ac’a’ trato ri rajovan-pe ri Dios chi nuben quiq’uin ri vinek. Ri nuquiq’uel ri xtibiyin, richin chi yixcolotej. 21 Y vacami c’a, ri achin ri xquijachon-el pa quik’a’ ri vinek, can c’o c’a pe viq’uin re pa mesa. 22 Can tivac’axaj c’a re ninbij chive, chi yin ri xinalex chi’icojol, can yibe-vi pa camic, roma can jare’ ri ruch’obon ri Dios pa nuvi’. Pero tok’ex c’a ruvech ri xtijachon-el vichin yin ri xinalex chi’icojol, xcha’ ri Jesús. 23 Y jari’ tok ri rutijoxela’ ri Jesús niquibila-ka chiquivech chi achique cami ri xtijachon-el richin ri Jesús. 24 Y re tijoxela’ re’ xquich’ojila’ c’a chuka’ chiquivech achique ri más nim ruk’ij chiquicojol rije’. 25 Pero ri Jesús xa xubij chique: Ri k’atoy tak tzij richin re ruvach’ulef, roma can ec’o ri vinek pa quik’a’, romari’ can niquina’ chi ja rije’ ri e cajaf. Y ri achi’a’ can c’o quik’a’ chique ri vinek, can achi’a’ e banoy-utzil nibix chique. 26 Jac’a chi’icojol rix nutijoxela’ man que ta ri’. Roma ri más nim ruk’ij chi’icojol rix, nic’atzin chi nuna-ka-ri’ chi xa más co’ol que chiquivech ri rachibil. Y ri jun chive rix ri nic’oje’ pan ivi’, nic’atzin chi nuna-ka-ri’ chi xa manek ruk’ij y nuch’utinirisaj-ri’ richin nusuj-ri’ chubanic xabachique samaj. 27 Roma c’a ri’, ¿ja cami ri c’o pa mesa nilix-apo ri más ruk’ij, o ja ri ilinel? ¿Man ja ta cami ri c’o pa mesa nilix-apo ri más ruk’ij? Pero chinuvech yin man que ta ri’, roma yin xa achi’el ri ilinel inc’o chi’icojol. 28 Rix can ixc’o c’a pe viq’uin chupan ri tijoj-pokonal ri yetejtoben vichin. 29 Roma c’a ri’, yin xtinya’ jun k’atbel-tzij pan ik’a’ rix, can achi’el ri rubanon ri Nata’ Dios viq’uin yin, 30 richin queri’ xquixva’ y xquixuc’ya’ pa jun misma mesa viq’uin, tok xa can c’o chic c’a k’atbel-tzij pa nuk’a’ yin. Y rix xquixoc c’a k’atoy-tzij pa quivi’ ri cablajuj tak tinamit rubanon re nimalej tinamit Israel. 31 Y ri Ajaf Jesús xubij c’a chuka’ chire ri jun tijoxel nibix Pedro chire: Simón, Simón, ninbij c’a chave chi ri Satanás xixruc’utuj yan chire ri Dios richin chi yixrutejtobej. Can nrajo’ c’a yixrusiloj achi’el nisilox ri trigo chupan ri chaybel. 32 Pero yin can nubanon-vi orar avoma rat, richin queri’ can tacukuba’ ac’u’x viq’uin. Can xcatapon-vi pa ruk’a’ ri Satanás. Pero tok xtitzolin-pe ac’u’x viq’uin, tabana’ chique ri ch’aka’ chic nutijoxela’ chi can tiquicukuba-vi quic’u’x viq’uin, xcha’ ri Jesús. 33 Y ri Simón xubij: Ajaf, vi rat xcatuc’uex pa jun cárcel, yibe aviq’uin. Hasta yibe aviq’uin, vi rat xcatapon chuvech ri camic, xcha’. 34 Pero ri Jesús xubij chire: Pedro, yin ninbij c’a chave, chi chupan re ak’a’ vacami, man jani tisiq’uin-pe ri mama’ tok rat oxi’ yan bey tabij chique ri yec’utun chave, chi man avetaman ta nuvech, xcha’ ri Jesús chire ri Pedro. 35 Y ri Jesús xuc’utuj c’a chique ri rutijoxela’: Tok ri jun bey xixintek y man xinvajo’ ta richin xic’uaj pekes (morral), ni mero, ni jun chic c’ulaj xajab, ¿c’o cami ri xivajo’ y man xivil ta? xcha’. Y rije’ xquibij chi man jun. 36 Y ri Jesús xubij c’a chique: Jac’a re vacami jun vi chic ri rubanic nrajo’. Roma vacami ri c’o pekes (morral) riq’uin, tuc’uaj. Ri c’o ru-mero, tuc’uaj chuka’. Y ri manek rumachet, tuc’ayij ri ruk’u’ y c’ari’ tulok’o’ jun richin. 37 Y vacami quere’ ninbij chive, roma c’o chi nibanatej achi’el ri nubij chupan ri ruch’abel ri Dios ri tz’ibatel can. Ri chiri’ nubij c’a: Can achi’el chuka’ jun aj-mac xban chire. Queri’ ri tz’ibatel can. Y re’ can xtibanatej na vi viq’uin yin. Ronojel c’a ri e tz’ibatel can chuvij yin chupan ri ruch’abel ri Dios, can xquebanatej na vi, xcha’ ri Jesús. 38 Y ri tijoxela’ xquibij c’a chire ri Jesús: Ajaf, vave’ c’o ca’i’ machet. Pero ri Jesús xubij chique: Man chic tinataj ri’, xcha’. 39 Ri Jesús tok elenek chic c’a el ri chiri’, xbe c’a ri acuchi can tibe-vi. Rija’ xbe c’a ri pa juyu’ Olivos. Y ri rutijoxela’ can e tzeketel-vi el chirij. 40 Y tok xe’apon c’a, xubij chique: Tibana’ orar y tic’utuj chire ri Dios richin chi tok yixtejtobex man quixtzak pa mac. 41 Y ri Jesús xbiyin chic c’a apo jun ca’i’ raken-c’an, xxuque-ka chiri’, y xuchop c’a nuben orar. 42 Y nubij c’a ri pa ru-oración: Nata’ Dios, tabana’ c’a chi man ta ninc’ovisaj re jun tijoj-pokonal re’, vi can queri’ ri navajo’ chuka’ rat. Pero man taben chuka’ ri ninrayij yin, xaxe voma ta yin. Roma yin can ninvajo-vi c’a ninben ri arayibel rat, xcha’. 43 Y c’o c’a jun ángel ri petenek chila’ chicaj xuc’ut-ri’ chuvech, richin noruya-ka ruchuk’a’ ri Jesús. 44 Y can janíla c’a k’axo’n ri c’o pa ránima rija’. Romari’ can riq’uin c’a ronojel ránima nuben orar. Y roma chuka’ ri k’axo’n ri’, ri ya’ ri nel chirij man choj ta ya’. Xa achi’el chic nima’k tak tz’uj quic’ ri yeka’ pan ulef. 45 Tok ri Jesús xbeyacatej-pe ri acuchi xucul-vi nuben orar, xpe c’a quiq’uin ri rutijoxela’, pero tok xoka’ quiq’uin, xa quichapon varan, roma bis y cosic noc chique. 46 Y ri Jesús xubij c’a chique ri rutijoxela’ ri’: ¿Achique roma xa yixver? Quixyacatej, tibana’ orar y tic’utuj chire ri Dios richin chi tok yixtejtobex, man quixtzak pa mac, xcha’ chique. 47 Y can c’a nich’on na c’a ri Jesús quiq’uin ri rutijoxela’, tok c’a xquina’ xe’apon e q’uiy vinek quiq’uin. Y can jac’a ri jun chique ri cablajuj rutijoxela’ ri rubini’an Judas, can jac’ari’ ri uc’uayon-apo quibey ri vinek ri’. Y ri Judas xjel-apo riq’uin ri Jesús richin xutz’ubaj (xutz’umaj). 48 Pero ri Jesús xubij c’a chire ri Judas: ¿Xinatz’ubaj (Xinatz’umaj) yin ri xinalex chi’icojol, xe richin yinac’ayij-el pa quik’a’ ri ye’etzelan vichin? xcha’ ri Jesús. 49 Y ri tijoxela’ tok xquitz’et ri najin rubanic, xquinabej ri achique ri xtec’ulvachitej. Romari’ xquibij c’a chire: Ajaf, ¿yojyacatej chiquij riq’uin machet? xecha’. 50 Y can c’o na vi c’a jun chique ri tijoxela’ ri xusoc jun samajel richin ri nimalej sacerdote. Can xuchoy na vi ri ruxiquin. Y ri ruxiquin ri xuchoy ja ri c’o pa rajquik’a’. 51 Y ri Jesús xubij c’a chique ri rutijoxela’: Man chic c’a jun tiben. Y xpe rija’ xuchop ri ruxiquin y xuc’achojirisaj can. 52 Y can jac’a ri principal-i’ tak sacerdotes, ri e uc’uey quichin ri achi’a’ e chajinela’ pa rachoch ri Dios, y ri rijita’k tak achi’a’ c’o quik’ij, jac’ari’ ri e benek chapoy richin ri Jesús. Y rija’ xubij chique: ¿Achique c’a xich’ob rix? ¿Xich’ob chi yixpe chuchapic jun elek’on y romari’ ic’amon-pe che’ y machet? 53 Can k’ij-k’ij c’a xic’oje’ iviq’uin ri pa rachoch ri Dios, y man jun achique ta xiben chuve. Pero c’a jac’a hora re’ ri yo’on chive rix, hora tok xtich’acon ri k’eku’n, xcha’ ri Jesús. 54 Xquichop c’a el ri Jesús, y xquic’uaj pa rachoch ri nimalej sacerdote. Y ri Pedro e rutzekelben-el, pero c’anej c’o-vi can chiquij. 55 Y ri chiri’ pa nic’aj ruva-jay, ri rusamajela’ ri nimalej sacerdote xquibox k’ak’, y xetz’uye-apo conojel ri chuchi-k’ak’. Y chuka’ ri Pedro xtz’uye-apo chiquicojol. 56 Y jun c’a ixok raj-ic’ ri nimalej sacerdote, tok xutz’et ri Pedro chi tz’uyul chiri’ rumek’on-ri’, xutzu-xutzu’ y xubij: Re jun achin re’ rachibil chuka’ ri Jesús, xcha’. 57 Pero ri Pedro xa xrevaj c’a chuvech ri ixok, y xubij: Yin man vetaman ta ruvech ri Jesús, xcha’. 58 Y c’a juba’ ri’ c’o chic c’a jun ri xtz’eton-pe richin ri Pedro, y xubij chire: Rat, jun chique ri ec’o riq’uin ri Jesús, xcha’. Ri’ man yin ta ri’, xcha’ ri Pedro chire. 59 C’a jun la’ek hora tik’ax-ka ri’, tok c’o chic c’a jun ri xbin chirij ri Pedro: Re achin re’, can kitzij vi chi xc’oje’ riq’uin ri Jesús, roma can aj-Galilea chuka’, xcha’. 60 Pero ri Pedro xubij chire ri achin: Man nik’ax ta chinuvech achique roma nabij queri’, xcha’ ri Pedro. Y can c’a nich’on na c’a ri Pedro, tok ri mama’ xsiq’uin-pe. 61 Y ri Ajaf Jesús xtzu’un-pe chirij y xutzu-pe ri Pedro. Y ri Pedro can jac’ari’ xoka’ chuc’u’x ri rubin can ri Ajaf chire, chi c’a man jani tisiq’uin-pe ri mama’ tok rat oxi’ yan bey tabij chique ri yec’utun chave, chi man avetaman ta nuvech. 62 Y ri Pedro xel c’a el y xujik’ ok’ej. 63 Y ri achi’a’ ri e chajiyon c’a richin ri Jesús, yetze’en c’a chirij y niquich’ey c’a. 64 C’ari’ xquitz’apej runak’-ruvech y xquich’ayila’ chupalej y niquic’utula’ c’a chire: ¿Achique ri xach’ayon? Tabij na c’a chike, yecha’ chire. 65 Y c’o c’a q’uiy ri man utzilej tak tzij ta ri xquibila’ chire. 66 Tok xseker c’a pe, xquimol c’a qui’ ri rijita’k tak achi’a’ ri c’o quik’ij, ri principal-i’ tak sacerdotes, y ri etamanela’ chirij ri ley chuka’. Y ri Jesús xuc’uex c’a apo chiquivech ri achi’a’ ri’, ri can pa comon yek’aton tzij. Y xquic’utuj c’a chire ri Jesús: 67 Tabij c’a chike: ¿Jac’a rat ri Cristo? xecha’. Pero ri Jesús xubij chique: Vi ninbij chive chi ja yin ri Cristo, man yininimaj ta. 68 Y chuka’ vi ta c’o ri yenc’utuj-apo chive, man jun xtibij-pe chuve, ni man chuka’ xquinivisk’opij ta el. 69 Y tok xtik’ax c’a can re jun tijoj-pokonal re’, yin ri xinalex chi’icojol, xquibetz’uye’ c’a pa rajquik’a’ ri Dios ri nitiquir nuben ronojel, xcha’ ri Jesús. 70 Can jac’ari’ tok conojel xec’utun-apo chire ri Jesús: ¿Can jac’a rat ri Ruc’ajol ri Dios? xecha’. Ja’, queri’, can achi’el ri c’ari’ nibij-ka rix, xcha’ ri Jesús chique. 71 Y rije’ xquibij: Man jun chic tzij nic’atzin chike richin niketamaj chi re Jesús can aj-mac vi. Roma konojel xkac’axaj ri c’ari’ nubij-ka, xecha’.