SALMOS 88

1 Ach Jehová, in Diosal ach, in Columal aji. C’ual d’ac’val in c’anan a colval d’a vib’an̈. 2 Cha in lesal, ac’cot a chiquin d’a tas tzin c’an tic. 3 Man̈xo jantacoc tas sja d’a vib’an̈, ichato ayinxo och d’a yol sc’ab’ chamel, svab’i. 4 Ichato ayinxo och sb’isuloc eb’ chamnac, man̈xalaj vip svab’i. 5 Ichato ix in actajcanb’at d’a scal eb’ chamnac svab’i. Icha eb’ chamnac d’a oval, to mucb’ilxo eb’ ticnaic, icha val chi’ vaj svab’i. Icha eb’ ix b’atcan satc’olal uuj, man̈xalaj a colval d’a eb’, icha chi’ vaj svab’i. 6 Ichato d’a yich jun olan b’aj smucchaj eb’ chamnac, b’aj te q’uic’q’uinal ix in ac’canem svab’i. 7 Ix smol sb’a yoval a c’ol d’a vib’an̈. B’elb’on sjavi juntzan̈ yaelal d’a vib’an̈ uuj. 8 Ix ic’canel eb’ vamigo d’ayin, yajb’entac ix in utejcan d’a eb’. Lajan in icha junoc presovum max yal-laj yeli. 9 Maxtzac yal-laj vilan yuj b’aj tzin te oq’ui. Mamin Jehová, junjun c’u sval in b’a d’ayach, tzin mojb’an in c’ab’ d’ayach. 10 ¿Tocval tzato a ch’ox a poder d’a scal eb’ chamnac? ¿Tocval syal vach’ lolonel eb’ chamnac chi’ d’ayach? 11 A b’aj mucan eb’ chamnac chi’, maxtzac b’inajlaj a vach’c’olal. Maxtzac alji paxi to a ach tic tzaq’uelc’och tas tzala’. 12 ¿Tocval ay mach d’a scal b’aj ay sq’uic’alq’uinalil chamel ol ilancot a tojolal yed’ tas satub’tac tza c’ulej? A d’a scal eb’ chamnac chi’ sb’atcan satc’olal smasanil. 13 A inxo pax Mamin Jehová, a d’ayach sval in b’a. A d’a q’uin̈ib’alil tzin lesalvi d’ayach. 14 Mamin Jehová, ¿tas val yuj tzin a patiquejeli? ¿Tas val yuj tza c’ub’ejel a b’a d’ayin? 15 Yictax in quelemal masanto ticnaic, yicxo max in chami, yujto ayn̈ejoch in yaelal uuj, yuj chi’ maxtzac techajlaj vuuj. 16 A yoval a c’ol tz’ec’ d’a vib’an̈, vanxo vac’ji ganar yuuj. 17 Icha val yoval a’ eluma’ yajoch oyan yoval a c’ol d’ayin d’a juneln̈ej. 18 Ix ic’canel eb’ vamigo yed’ eb’ vetanimail d’a in tz’ey. A ticnaic an̈ej q’uic’alq’uinal oyanoch d’a in patic.