Diyona 4

1 Nuwatuhuna ni Diyona hige i fanuha, be ya famala ena manabala. 2 Yo fede, ya lauêuêula, iyen, Guyau, doha haêa E falibam, fuyana hola hige egu nuêu ya lau afulen mate, bena doha ite wa ginauli? Logena be E gela E lau Sipani! E siba mate, um tauêulu yo nuwatohatoha Yaubadana. Fuya ouêouli wa nuwa talu, wa tauêulu, ma nuwa ofi fahim, yo fuya ouêouli hinaga nuwam wa bui, be ibege heyaheyaya u ginaulidi. 3 Guyau, aho te, E falibam ibe wa lau funuhigu mate, ya loholoho! 4 Yaubada wa, Diyona alinana ya bui, iyen, Em dudulai somo be wa manabala? 5 Diyona ya finahe hasa duhu balabalamumuna ganamulina yai ya taêai. Mulina yai ena gwaêu ya pei, be ya anlogulogu. Habahim ya bagibagi haba somo Ninewa ai lisidi ya tubu bena ya ita. 6 Habahim, Yaubada ya liba be mahina hudoêi ya in hasa, be Diyona ya faêanlogulogu, haba kamnana ya loholoho. Diyona nuwana ya amna wananaha mahina lisina yai. 7 Bobonna ya ifi tatatali, Yaubada ena nuwatuhu yai, mwatamwata mahina wa ya faheyaya, yo fede, ya peêi. 8 Maihala haêa ya kepama, Yaubada bolibolima gigibwalina ya fatowa, yo maihala gigibwalina Diyona kuluna ya sinai, be egoba ya tau peêipeêi, na iyen, Ibe E peêi mate, ya loholoho. 9 Yo fede, Yaubada ya libalau lisina, iyen, Em dudulai somo be mahina te wa luluwen? Alinana Diyona ya bui, iyen, Maêegu dudulai be E manabala. Manabalana ni, ibe ya kamfunuhigu! 10 Yaubada ya libalau lisina, iyen, Mahina ni maihona esega ganahewana yai ya in, na bobonna ya peêi. Um hige somo u ginauli lisina yai, yo hige u faêin. 11 Egu nuwatohatoha laêina haba doha somo, Ninewa duhu balabalamumuna ni ai lisidi? In moho ganahewana yai mate, dodoga loholohodi 120,000 ya diêoi, yo edi yosiyosi hinaga oulina doha.