Diyobi 2

1 Fuya hesa anelu sa laoma Guyau matana yai na Tau Laulau Fagilu, Satani, hinaga ya laoma. 2 Guyau ya libalau Tau Laulau Fagilu lisina iyen, Somo yai wa laolaoma? Guyau alinana, Tau Laulau Fagilu ya bui iyen, Tanoêubu E lau tiga fataêiêili. E leu yo E sai ganahewana yai. 3 Habahim Guyau ya libalau Tau Laulau Fagilu lebena iyen, Egu tau lau fayofayo, Diyobi haêa wa nuwatuhu fadosi e higeêe? Hige sai laêi doha in. In doga dudulaina, hige gilu hesa lisina yai. Yaubada ya fafadebasae yo heyaya ya anêanfaleêedi. Satani! Wa nuwa liuwigu bena pilipili hige aniyona hesa E felen, in moho laulau dudulaidi hola ya ginaginaulidi yo hola ya fafadebasaegu. 4 Tau Laulau Fagilu iyen, Edi mwahuli debadi yai dodoga haba edi ginauli mahudoêidi sa nuwa afuledi, bena tabu ti peêi. 5 Haga u abilau tauna yai be u fakamkamna, haba ai nuwanuwam ya kaumanana fafaheyayam. 6 Guyau ya libalau Tau Laulau Fagilu lebena iyen, Logena, nimam yai E tole afulen, in moho tabu u wunui. 7 Habahim Tau Laulau Fagilu, Guyau ya lau afulen na ya lau be bonu kamokamoêuêu ya yala fafinahe Diyobi lisina yai. Tauna mahudoêina sa tupitupi, ahe laulauna yai ya hasai eeâ, kuluna. 8 Diyobi afusa yai ya taêai paêana nuwana ya heyaya, na gulewa senana ya abi be bonu kamokamoêuêuna ya kamkam holidi. 9 Lahuna ya libalau lisina iyen, Paêana somo em kawawananaha yo laulau dudulaidi sa ota esegahi? Yaubadana u kaumananaen be u peêi! 10 Diyobi, lahuna ena liba ya bui iyen, Wa libaliba doha waihin yauyaulena. Loholoho, Yaubada ya feleda, haba te abi. Na heyaya te êwaiyoêoêen? Libadi yai te, Diyobi hige i liba heyaya. 11 Fuyanna haidana faihona sa atahi mate pilipili ya fahoina, be sa faêoi esega, bena sa lau Diyobi lisina. Be ena kamkamna ganahewana yai, nuwana sa liba faêadidili. Afa haidana hesadi mate: Elifasi, Teman Taonna dogana, Bilidada, Suwa Nuêuna dogana, yo Sofala, Namati Nuêuna dogana. 12 Edaêeda lofalofa yai sa ita lawen na Diyobi hige ti ita lobahi. Sa fatubu sa tan laêilaêi, na adi luhuluhu sa kam giginidi yo gegebula sa pei hasa kuludi yai. 13 Habahim maêedi tanohi yai sa taêai amainiya eeâ, lahai faligigi luwaga yo iêipa faligigi luwaga sa ofi. Hige ti fagagali paêana ena kamkamna sa ita ya laêi wananaha.