Aba Fatubu 1

1 Bwaêibwaêina yai, Yaubada galewa yo tanoêubu ya fatubudi. 2 Tanoêubu mate afaêafana yo hige i poiêumai. Na kamumu mate hoêowa hewana ya fakou, yo Yaubada Yaluwana mate hoêowa hewana ya famohafu. 3 Habahim Yaubada iyen, “Haga mala ta fataumahata.” Yo fede ya taumahata. 4 Yaubada mala ya ita mate ya loholoho. Yo fede mala yo kamumu ya dailidi. 5 Mala hesana ya tole lahai, na kamumu hesana ya tole iêipa. Maihala ya bulu, mate itete lahai bwaêibwaêina. 6 Yaubada iyen, “Hoêowa aba dailina i taumahata, be hoêowa i daili luwagai." 7 Yo fede, hoêowa hewa yai yo ubu yai Yaubada ya ginaulidi be sa lau hudoêi. 8 Bili daili hesana ya tole Galewa. Maihala ya bulu, mate itete lahai fafaluwagana. 9 Habahim Yaubada iyen, “Hoêowa galewa ubuna yai i falau esega ai tefa esega, na tanohi i taumahata.” Yo fede ya taumahata. 10 Yaubada tanohi hesana ya tole Tanohi. Na hoêowa sa falau esega hesana ya tole Gabogabo. Yaubada ya itadi mate sa loholoho. 11 Habahim Yaubada iyen, “Ai tanohi oyagi nene hudoêi - hudoêi yo hawahawa ti tala inêin, ti fuwa be ti lau liêe.” Yo fede, ginaulidi sa in. 12 Oyagi nene hesa - hesa yo somo anêan sa in tanohi yai, ginaulidi Yaubada ya itadi mate sa loholoho. 13 Iêipa ya ofi, na hwalahwalala hesa mate itete lahai fafaihonana. 14 Yaubada iyen, “Mala ti sina ai galewa be lahai yo iêipa ti dailidi. Maladi ni, adi paisowa mate lahai, bolima, haiêin yo haibeêu fafaêilaladi. 15 Haba maladi sa sina lidi tanohi ai hewana.” Yo fede ya tubu. 16 Yaubada mala laêilaêidi luwaga ya ginaulidi. Maihala lahai ya ita watan na nawalahi mate iêipa ya ita watan. Yo kipwala hinaga ya ginaulidi. 17 Maladi galewa yai ya toledi be tanoêubu sa sinai. 18 Lahai yo iêipa sa tanuwagaidi, be kamumu yo lahai sa dailidi. Yaubada ya itadi mate sa loholoho. 19 Maihala ya bulu, mate itete lahai fafatina. 20 Yaubada iyebom, “Suisui hudoêi - hudoêi, hoêowa ti gogo famohafu. Yo ataiêa ti failofolofoidi be galewa ti famohafu." 21 Yo fede Yaubada, gabogabo ginaulidi laêilaêidi, yo somo hoêowa yai mwahumwahulidi ya fatubudi. Ataiêa nene hesa - hesa sa lofolofo galewa yai hinaga ya fatubudi. Ya itadi mate sa loholoho. 22 Ya faloholohodi, na iyen, “Au talu fanafanatu be gabogabo yo tanohi au famohafudi." 23 Maihala ya bulu mate itete lahai fafaligigina. 24 Yaubada iyen, “Tanohi ginaulidi mwahumwahulidi nene hudoêi - hudoêi ti tubu: suisui manamanasadi, yekoyekodi, kanekanenedi yo kamokomodaladi.” Yo fede, somo Yaubada ya libaedi sa tubu. 25 Yaubada suisui te ya ginaulidi, na ya itadi mate sa loholoho. 26 Habahim, Yaubada iyen, “Taumoho ta ginauli doha ita. Haba tanoêubu mahudoêina: gabogabo hamadi, yada ataiêadi, yosiyosi, suisui kanekanenedi yo kamokamodaladi ya tanuwagaidi." 27 Yo fede Yaubada, ena liba yai taumoho yo waihin, nenedi doha In, ya fatubudi, 28 Habahim ya faloholohodi, na iyen, “Au talu fanafanatu, be nanatumiu tanohi mahudoêina ti miyai yo ti tanuwagai. Gabogabo hamadi, yada ataiêadi yo ginauli mwahumwahulidi tanohi yai tigatigadi yo kanekanekanedi haba ami ita watanidi hinaga." 29 Habahim iyen, “Ginauli iniêinidi fafaliêedi mahudoêidi tanohi mahudoêina yai yo oyagi fuwafuwadi tumatumadi mahudoêidi hinaga E felemiu, ami anêan. 30 Suisui, ataiêa yo ginauli tanohi yai kanekanenedi yo kamokomodaladi ginauli inêindi E feledi, adi anêan.” Yo fede, sa tubu. 31 Ginauli mahudoêidi Yaubada ya fatubudi ya itadi, mate sa loholoho wananaha! Maihala ya bulu, mate itete lahai fafaligigi esegana.