Paisowa 3

1 Fuya ma esega lauêuêula maihalana yai, Pita yo Diyon sa hasai Dubu Tabuna. Maihalana mate tili koloki maimailafi. 2 Lahaina yai ni taumoho hesa ahe dabidabina sa bahe lawen dubu edaêedana hesa hesana “Aba Luhuluhu Lau Loholohona.” Dogana ni tinana bogana yai haêa doha. Fuya ouêouli ainiya sa fafataêai be salumadi sa laoma sa luhuluhu lau haba ya anêeta moni lisidi yai. 3 Fuyana Pita yo Diyon ya itadi bena haba sa luhulau Dubu Tabuna ganahewana, ya anêeta moni lisidi yai. 4 Sa itaêita lau lisina na Pita iyen, U itaêitama lebemai! 5 Yo fede taumoho wa ya itaêita lau lebedi na ena nuwatuhu bena somo haba sa felen. 6 Habahim Pita iyen, Yau hige egu moni na somo lebegu yai haba E felem? Yesu Keliso Nasaleta dogana hesana yai u mwaito be u laulau! 7 Nimana sibana yai ya saguhi be ya faêobiyo. Hige walolona taumohona ahe laulauna yo talutalumodi sa adidili. 8 Ahena feula ya bwaêiyedi na ya fatubu ya laulau. Habahim maêedi sa lau Dubu Tabuna dobidobina ganahewana yai, ya laulau yo ya dagodago, Yaubada ya fafadebasae! 9 Fuyana dodoga mahudoêidi sa ita ya laulau yo Yaubada ya fafadebasae. 10 Sa nuwatuhu lobahi mate taumohona eseêesegana fuya ouêouli ai Dubu Tabuna Aba Luhuluhu Launa Loholohona yai ya taêataêai na ya anêanêeta. Yo fede mahudoêidi sa noêo wananaha mate sidohana be doha. 11 Tau anêanêeta hola Pita yo Diyon lisidi yai ya abiêabi didi na dodoga mahudoêidi sa lautafo lau lisidi ma noêodi. Iti mate Dubu Tabuna tefana hesa hesana “Solomon ena Aba Anlogulogu” yai. 12 Fuyana Pita dodoga ni ya itadi, ya libalau lebedi iyen, Isalaela dodogadi, sidohana be ami kinoimai, emi nuwatuhu mate ai ema loholoho Yaubada matana yai, e ema gigibwali yai, be taumoho te ya laulau? 13 Abelaham, Isako, Iyakobo yo afa wahada edi Yaubada logenana, ena tau paisowa Yesu, ya tole hitin. Yesu ami tole afulen nimadi yai be bena haba sa wunui. Pailati bena ya biya afulen na matana yai ami faleleyen. 14 Gigibwali yo Tau Laulau Dudulai Dogana ami waiyoêoêen na tau aiyunu ami anêetai bena sa soêe fahi be sa leyawa lisimiu. (Maleko15:6-15) 15 “Mwahuli Paêana,” Yesu, ami wunui. In moho Yaubada peêi yai ya faêobiyo fuyoi. Ai tau itana. 16 Yesu hesana yai ena gigibwali êe kawawananahaêen be taumoho ami ita yo ami sibai mate ya faêadidili. Wananaha! Yesu hesana sunumana lisina yai mate taumoho te ya faloholoho. Haêa mahudoêimiu ami ita. 17 Afa haidagu, aho te, E sibai mate umi yo emi babaêisa somo ami ginaginauli Yesu lisina yai mate, hige au sibai. 18 Na Yaubada ya fawananaha doha ite; somo beyabeyana haêa ya liba famahata peloweta lisidi yai mate Yaubada ena Fasinabo Dogana haba ya kamkamna be ya peêi. 19 Au nuwabui na Yaubada au famuli watan haba emi heyaya ya nuwatuhu afuledi yo yaluwamiu ya faêadidilidi, 20 na haba Keliso ya fatamaliyama, haêa ya fasinabo nonohai, logena Yesu. 21 Ai galewa bena ya miya eeâ, Yaubada ginauli mahudoêidi ya fadudulai fuyoêidi, doha beyabeyana ena peloweta tabudi ya falibadi be sa libaen. 22 Paêana Mose iyen, “Guyau emi Yaubada haba Peloweta hesa ganahewamiu yai ya faêobiyo, doha yau. Ginauli mahudoêidi ya falibamiu bena ami atahiyedi. 23 Yena sai laêi hige peloweta ni ena liba i awaêabiyen haba Yaubada ena dodoga ganahewadi yai sa kamfahi na sa wunui.” (Diutelonomi 18:15,18,19) 24 Wananaha! Somo aho lahai te ya laulau mate Peloweta mahudoêidi Samuwela yai ya lawen, haêa beyabeyana sa libaen. 25 Yaubada ena liba fasunuma peloweta lisidi yai mate enehemiu. Haêa ami abi, yo yali ya ginauli afa wahawahamiu lisidi yai ya fagonafimiu. Yaubada ya libalau Abelaham lisina iyen, “Am hiti mulita debadi yai haba dodoga mahudoêidi tanoêubu yai te, E faloholohodi.” (Aba Fatubu 22:18; Aba Fatubu 26:4) 26 Fuyana Yaubada, ena tau paisowa Yesu ya fasinabo nonohai be ya fatamali bwaêiyeyawa bena ya faloholohomiu yo emi laulau heyaheyayadi ya buidi.