Paisowa 24

1 Lahai faligigi mulidi yai Tau Antalasam Baêisana, Ananiya, yo babada haisa maêedi loiya, hesana Tetulusi sa lidi Sesaliya sa lau Gawana Filiki matana yai, be Paulo sa sadi. 2 Habahim Paulo sa yoga lawen na Tetulusi ya fatubu ya libaliba iyen, Baêisa! Em ita wata ganahewana yai êe miya komakoman fuya lofalofa, yo em sibasiba yai ema miyamiya haêa wa fadudulaidi. 3 Filiki! Laulau hesa - hesa yai yo tefa ouêouli yai ema lautoêi laêilaêi um lisim yai. 4 Hige ya fanuha bena amnam ya faheyaya. Aeeâ, E anêetaim moho ibe ema liba tupotupona te wa atahi. 5 Doga te E lobahi mate, in heyaheyaya tau laulau fatubu; Diusi dodogadi nuêu hesa - hesa yai, in tau eli fasifasinadi yo Nasaleta Pelena tau foyahina hesa. 6 Yo Dubu Tabuna hinaga ya anpate bena ya faheyaya, logena êe tohai. Dogana te ena libaliba hola u fadosi yo ena laulau u ita sipoi, haba iyabom wa sibai somo halana be êe sadi. 9 Tetulusi somo ya libaen mate Diusi sa ehe watawatan. Tiyen, Iiâ, Logena! 10 Habahim Gawana nima yai Paulo ya faliba be ya libaliba. Yo fede Paulo iyen, E siba mate, um tau fafadudulai bolima lofalofa nuêu yai te. Be ma nuwa loholohogu egu E tona galagala. 11 Ibom, gonowana wa yoêoi be wa fawananaha mate lahai safuhudohudoêi luwaga ganahewadi yai Yaubada fadebasaena ana halulu E hasai Yelusalem, 12 hige sai laêi maêegu ai faibayaho na ti lobahimai Dubu Tabuna dobidobina yai e dodoga ya eli fasifasinadi Diusi edi aba oiêoigogo lumadi yai e duhu laêi mahudoêina ganahewana yai. 13 Sadi somo sa ginauli lisigu yai, hige gonowana ti fawananahadi lebem yai. 14 E faliba dudulaim moho mate afa wahamai edi Yaubada E fafadebasae, na “Edaêeda” mate yau E fafamuli watan. Diusi safaluma Keliso hige ti famuli watan, edi nuwatuhu mate Yesu ena lau faêata mate bwalabwala. Yo hinaga ginauli mahudoêidi Mose ena Laugagayo yai yo Peloweta sa ulidi mate E kawawananahaêedi. 15 Egu sunuma Yaubada lebena yai gonogonowana doha tau sadigu te. Logena, tau laulau dudulai yo tau heyaya haêa sa peêi, haba sa obiyo fuyo. (Diyobi 14:14) 16 Fuya ouêouli E anpate adidili bena egu laulau sa dudulai Yaubada matana yai yo dodoga matadi yai hinaga. 17 Yelusalem E lau afulen bolima fisa, habahim E fuyom. E laoma bena egu antalasam E ginauli yo egu dodoga tau deha bena E ainauyaidi. 18 Dubu Tabuna ganahewana yai egu lau faêaêa haêa E abi, ya ofi na sa lau lobahigu. Hige bobohalahala yo hige baiwa ma afa haidagu. (Paisowa 21:24) 19 In moho, Diusi haisa Eisiya yai sa miyamiya, iti ibe aiteêi, haba edi sadigu mata paêana somo ai matam sa libaen. 20 Yena higeêe, beti, salumadi iti amaiteêi, fuyanna E obiyo Sanhedeli matadi yai, na lau pono somo E ginauli bena sa libaen. 21 Ginauli esega moho mate nuwana fuyanna matadi yai E obiyo na E yoga, yawa, “E kawawananaha mate, tau peêipeêi haba sa mwahuli fuyo! Logena, aho te wa fadudulaigu." 22 Habahim Filiki, in “Edaêeda Dodogadi” tau sibaina mate, lau fatala ya golu boda na iyen, Yena Komanda Laisiya ya mahanoma, haba fadudulai ofiêofina E ginauli ai lisim. 23 Be hiyala tau lau kulukuluwenna ya faliba, iyen, Paulo u gatin, na fuya haisa u soêe fahi haba haidana sa laoma ena fanuha somo ena sa felen. 24 Lahai fisa sa ofi, mulidi yai, Filiki lahuna Dusila ya aulen be maêena sa laoma. In mate Diusi waihinina. Paulo ana liba ya fatamali be ya laoma, Yesu Keliso sunumaêenna libana bena ya dedei be sa atahi. 25 Laulau dudulaina, eda amna tabu i foya faheyayada, yo fakasa lahaina ya laolaoma, mate Paulo ya guguyaêen. Ma libalibana na Filiki ya êwasabu, be iyen, Aêai, na u lau! Yena egu solasola haba E yoga fuyoêim. 26 Fuyanna yai ni mate, ena nuwatuhu bena haba Paulo ya nuwa liui be moni ena ya felen. Logena, ya yogayoga fuyoiyama be fuya ouêouli maêena sa libaliba. 27 Bolima luwaga sa abi didin mulidi yai, Posiu Fesitu, Filiki ya falau damahi be ya gawana. In moho Filiki bena Diusi nuwadi ya faloholoho be Paulo, hige i soêe fahi.