YAASINƆ 29

1 Gbɛ̃ kɛ̀ wà kpã̀kɛ̃zi maamaa, ben à gì mazi, adee é kaatɛ kãndo yↄ̀ↄ sai. 2 Tó gbɛ̃ maaanↄ dàgula, gbɛ̃nↄ pↄↄ ègↄ̃ nnamɛ, tó gbɛ̃ zaaa kú kpatan, wègↄ̃ m boomɛ. 3 Gbɛ̃ kɛ̀ ye ↄ̃ndↄ̃ↄzi è a de pↄↄ kɛ nna, kaaruanↄ bɛ zɛ́sɛri è a ↄↄ yaka. 4 Kína è tó a bùsu gbãa kaara yãzɛdee musu, ↄdↄnkpɛɛgbasiri sↄ̃ è a bùsu dɛmɛ. 5 Gbɛ̃ kɛ̀ èe lɛ́nnaa kɛɛ a gbɛ̃daaanɛ e bà kpakpaa a zĩndanɛmɛ. 6 Gbɛ̃ zaaa taarikɛna è à kũ takutɛɛ ũmɛ, gbɛ̃ maaa è guda kɛ kↄ̃n pↄnnaao. 7 Gbɛ̃ maaa è làakari dↄ takaaside yãgↄ̃gↄ̃naa, zaakɛri sↄ̃ è à yã daro. 8 Gbɛ̃ faborinↄ è wɛ́tɛ wã, ↄ̃ndↄ̃rinↄ è gbɛ̃nↄ làakari kpáɛńnɛ. 9 Tó ↄ̃ndↄ̃dee gàa yãkpaɛ kɛ kↄ̃n yↄ̃nkↄↄo, yↄ̃nkↄↄ pì è pↄ fɛ̃ è yáa dↄ, à lɛ́ è nakↄ̃aro. 10 Gbɛ̃dɛrinↄ è za taarisaideemmɛ, aↄ̃ègↄ̃ gbɛ̃ maaanↄ wɛtɛ wà ń dɛ. 11 Yↄ̃nkↄↄ pↄfɛ̃ è bↄ à wɛ́ɛamɛ, ↄ̃ndↄ̃dee sↄ̃ è a pↄfɛ̃ naawamɛ. 12 Tó gbãadee e swã kpaa ɛgɛyãzi, à ìbanↄ è gↄ̃ zaakɛrinↄ ũ ń píngimɛ. 13 Takaasidee kↄ̃n gbãamↄnnɛrio yã mɛ̀n doo kɛ̀ vĩ, Dii bé à tò ń wɛ́ɛ e guu ee ń píngi. 14 Kína kɛ̀ è yãkpaɛ kɛ takaasideenↄnɛ kↄ̃n yãpuraao, à kpata kãsãpɛɛna égↄ̃ gbãa gurↄ sãnda píngi. 15 Totona kↄ̃n flã̀o è tó gbɛ̃ ↄ̃ndↄ̃ kũ, nɛ́ kɛ̀ wà à tò a zĩndanɛ è wí da a daamɛ. 16 Tó zaakɛrinↄ dàgula, taarikɛna è kↄ̃mɛ, mↄde gbɛ̃ maaanↄ é ń kpɛɛ e. 17 Ǹ n nɛ́ toto, eé n làakari kpáɛnnɛ, eé tó n pↄↄ kɛ nna. 18 Guu kɛ̀ Luda yã kunlo, wègↄ̃ ń zĩndakũna dↄ̃ro. Aubarikadeen gbɛ̃ kɛ̀ à à doka kũna ũ. 19 Wè zↄ̀ toto kↄ̃n lɛ́oro. Baa tó à mà, eé zĩi kɛaro. 20 N gbɛ̃ kɛ̀ è wã à yã oo èↄ́? Yↄ̃nkↄↄ sã̀ↄ dɛ adeela. 21 Zↄ̀ kɛ̀ wà à zaza kũ̀ zaa à nɛ́ngo zĩ, é yãa à gↄ̃ guturu ũmɛ. 22 Pↄfɛ̃ri è swèe da, nↄ̀sɛfutadee è durun kɛ maamaa. 23 Ĩadãna è ń busamɛ, zĩndabusana bé è ń kaara. 24 Gbɛ̃ kɛ̀ è ble kↄ̃n kpãio zà a zĩndammɛ, è lada kↄ̃n Ludao, mↄde è we à yãpuraa oro. 25 Vĩakɛna gbɛ̃nteenɛ nɛ́ takutɛɛmɛ, gbɛ̃ kɛ̀ è Dii náanɛ kɛɛ mì égↄ̃ da’iana. 26 Gbɛ̃ paridee è gbãadee aɛ wɛtɛ, mↄde yãkpaɛkɛna nɛ́ Dii yãmɛ. 27 Gbɛ̃ maaa ye ɛgɛdeeziro, gbɛ̃ zaaa è za zɛ́suususɛrimmɛ.