ZABURA 77
SIM1 Ma lɛ́ zù Ludai ma a sìsi, ma wiki lɛ̀ Ludaa de à ma yã ma.
2 Kũ má kú wari gũn ma Dikiri ki wɛ̀tɛ, ma ↄ sɛ̀ musu gwãani kámmabonaa sari, ma laakari gì kpátɛi.
3 Kũ ma laasun tà Luda kĩnaa, akũ ma ã'ã, kũ ma dↄ a yãn, ma gↄ̃ kpam lɛɛkɛɛ.
4 N tò ma wɛ́ tɛ̃̀ i'onaa, ma gↄ̃ bídi gũn má dↄ̃ deran ma ò nàro.
5 Ma dↄ yã zĩnↄn kũ wɛ̃̀ kũ ò gɛ̃̀tɛnↄ.
6 Ma laasunn lɛ̀ ma swɛ̃̀ɛ gũn gwãani, ma a zĩda là mà wɛtɛ mà dↄ̃.
7 Ma pì: Dikiri gìwai sãnsãnn yá? A pↄ ni kɛ nna kũoo doroo?
8 A gbɛ̃kɛ làka mámmann yá? A yã nigↄ̃ futɛna gↄrↄ sĩnda pínkin yá?
9 Ó wɛ̃ndagwana yã sã̀ Ludagun yá? A pↄ fɛ̃̀wái, ani wɛ̃nda kɛwɛrɛ doroo?
10 Akũ ma pì: Yã kũ à ũ̀man dí. Luda Musude ↄ bùsawɛrɛ.
11 Mani laasun lɛ́ Dikiri yãbonsarɛnↄa, mani dↄ yã kũ à kɛ̀ yãnↄn.
12 Mani n daboyãkɛnanↄ laasun lɛ́ pínki, mani n yãzↄ̃kↄ̃kɛnanↄ da ma swɛ̃̀n.
13 Luda, n zɛ́ kú adona. Dikiri kpate zↄ̃kↄ̃ mɛ́ à kà lán ó Luda bàa?
14 Mↄkↄ̃mmɛ Luda yãbonsarɛkɛri ũ, n n gbãna mↄ̀ burinↄnɛ.
15 N n gbɛ̃nↄ sura bà kũ n gã̀sã gbãnao, ókↄ̃nↄ Yakubu kũ Yusufu burinↄ.
16 Kũ ísira wɛ́ sìnlɛ Luda, kũ ísira wɛ́ sìnlɛ, akũ à kↄ́tↄ kpà, à yĩ̀gãyĩgã ari a lòkoton.
17 Ludambɛ í kↄ̀tɛ, surapatana kĩni dↄ musu, n kànↄ tɛn fã legũpina ũ.
18 N pũtãna kĩni dↄ zàga'ĩa gũn, n legũpinaa andunia pù pínki, zĩtɛ kɛ̀ gìri à yĩ̀gãyĩgã.
19 N zɛ́ dà ísiran, n gɛ̃ki kɛ̀ í zↄ̃kↄ̃nↄ dagura, odi n gɛ̀sɛgbɛ ero.
20 N do n gbɛ̃nↄnɛ arɛ lán sã kpàsaa bà Musa kũ Harunao gãi.