ZABURA 75

SIM

¹ O n sáabu kɛ̀ Luda, o n sáabu kɛ̀. Tó ò n yãbonsarɛnↄ bàba, ndìgↄ̃ kú kãni.

² Luda pì: Ma gↄrↄ dìtɛ kũ mani yãkpatɛ kɛ a zɛ́a.

³ Tó andunia yĩ̀gã kũ gbɛ̃ kũ ò kunnↄ ń pínki, makũ mɛ́ madì a gbɛ̀gbanↄ kũ gíngin.

⁴ Madì o zĩdabirinↄnɛ òsun ĩa dãro, madì o yãvãnikɛrinↄnɛ òsun kùa biriro.

⁵ Àsun kùa biri ludambɛaro, àsun waka nↄnↄmairo.

⁶ Zaakũ gbãna dì bo ifãboki kpa ke a lɛ́tɛ kparo, àdi bo gbárannanlo,

⁷ Ludamɛ yãkpatɛkɛri ũ, àkũ mɛ́ àdi gbɛ̃ do lago à gbɛ̃ do kara.

⁸ Toko kú Dikiri ↄĩ, í gbãna kán à pà, àtɛn sɛ́n a pↄfɛ̃ ũ fùuu. Àdi atɛ̃ andunia yãvãnikɛrinↄa ń pínki, òdi mi à láka lái kũ a gbↄ̃̀ↄo.

⁹ Makũ sↄ̃, manigↄ̃ yã pì o gↄrↄ sĩnda pínki, mani Yakubu Luda táaki lɛ́.

¹⁰ Mani yãvãnikɛrinↄ bɛ̃nɛ ɛ́'ɛ, gbɛ̃ mananↄ bɛ̃nɛ sↄ̃, mani sɛ́ musu.