ZABURA 68
SIM1 Luda futɛ, a ibɛrɛnↄ fãkↄ̃a, a zãngurinↄ bàa lɛ́nɛ.
2 Lákũ túsukpɛ dì gɛ̃tɛ kũ ĩao nà, ǹ tó ò gɛ̃tɛ lɛ. Lákũ zↄ́saa dì yↄ́ tɛ́ sarɛ nà, yãvãnikɛrinↄ ni kakatɛ Luda arɛ lɛ.
3 Gbɛ̃ mananↄ sↄ̃ ò pↄnna kɛ, ò yáa dↄ Luda arɛ, ò vĩvĩ kũ pↄnna zↄ̃kↄ̃ↄo.
4 À lɛ̀ sí Ludanɛ à lɛ́ maa, à di ludambɛ lukua, à a tↄ́ bo, a tↄ́n Dikiri, à pↄnna wiki lɛ́ a arɛ.
5 Kunna a kpɛ́ kũ à kú adonaa gũn, Luda bi tonɛnↄ demɛ, gyaanↄnↄ zɛkũnwodemɛ.
6 Luda dì bɛ kɛ gbɛ̃ kũ à gbɛ̃ vĩronɛ, àdi purusunanↄ bↄtɛ à ń da nnamanan, sãgbãnadenↄ sↄ̃ onigↄ̃ kú gu kori gũmmɛ.
7 Luda, kũ n do n gbɛ̃nↄnɛ arɛ, gↄrↄ kũ n táa ò kũńwo gbárannan,
8 zĩtɛ yĩ̀gãyĩgã, ludambɛ legũ gbàrɛ n arɛ, mↄkↄ̃n Luda kũ n yã ò Sinai kpi musu, Luda, Isarailanↄ Luda.
9 Luda, n mùsɛɛ pìsi ń bùsuua baala'i, n n gbɛ̃ busananↄ gbà gbãna.
10 N gbɛ̃nↄ vùtɛ a gũn Luda, akũ n wɛ̃ndadenↄ gbà pↄ́ n manakɛ yãi.
11 Dikiri yã ò, akũ nↄgbɛ̃nↄ gↄ̃̀ a baarukparinↄ ũ dasi.
12 Kínanↄ kũ ń zĩ̀karinↄ tɛn bàa lɛ́ likalika, nↄgbɛ̃ kũ ò gↄ̃̀ bɛnↄ tɛni ń pↄ́nↄ kpaatɛtɛ.
13 Bee kũ a wutɛ a kpàsa guragura, andurufu í kú ma potɛ̃nɛ dɛ̀mbɛrɛnↄa, a kãnↄ tɛn tɛ́ kɛ lán wuraa bà.
14 Kũ Gbãnasĩndapinkide kínanↄ fã̀kↄ̃a, ò kↄ̀tɛ Zalamↄ kpia lán legũgbɛɛ bà.
15 Basã kpi gakuri vĩ, Basã kpi mìsↄ̃ntɛnↄn dasi.
16 Ákↄ̃nↄ kpi mìsↄ̃ntɛnↄ, bↄ́yãi átɛn kpi kũ Luda sɛ̀ a kíbleki ũ gwa kũ nɛ̀sɛgↄ̃baaoo? Gwen Dikiri nigↄ̃ kun gↄrↄ sĩnda pínki.
17 Luda sↄ̃gonↄ lɛ́ vĩro, à kà dúbu lɛu ũgbangba, Dikiri bòo zaa Sinai, à sù à kìpa a gu kũ à kú adonan.
18 N futɛ n ta musu dona zĩ̀zↄnↄnɛ arɛ, n gba sì gbɛ̃nↄa ari kũ sãgbãnadenↄ, akũ n vutɛ gwe, Dikiri Luda.
19 Arubarikademɛ Dikiri Luda ó surabari ũ, àkũmɛ àdigↄ̃ ó asonↄ sɛna lákũ gu dìgↄ̃ dↄ nà.
20 Ó Luda bi Luda kũ àdi ń sura bamɛ, Dikiri Luda mɛ́ àdi ó bo ga lɛ́i.
21 Luda ni a ibɛrɛnↄ mì wíwińnɛ, bisãsiri mìkã dↄrɛ kũ ò tɛ́ ń durunnaanↄ.
22 Dikiri pì: Mani ń bↄtɛ Basã bùsun, mani ń bↄtɛ ísira lↄ̀n,
23 de à á gbá ya á ibɛrɛnↄ arun, á gbɛ̃danↄ ni nɛ́nɛ matɛn ò ń baka ble.
24 Luda, o n gbɛ̃nↄ è ò tɛ́tɛkↄ̃i, ma Luda ma Kína, òtɛn su n kúkia.
25 Lɛ̀sirinↄn tɛ́ arɛ, batanↄn tɛ́ ń kpɛ, nↄkpare sɛ̃gɛ̃sɛ̃gɛ̃parinↄn tɛ́ ń guragura.
26 À Luda tↄ́ bo pari kↄ̃kakaranaa gũn, à Dikiri sáabu kpá ákↄ̃nↄ Isaraila burinↄ.
27 Nɛ́ kpɛde Biliaminu burinↄn tɛ́ arɛ gwe, abire gbɛra Yudanↄ kínɛnↄ kũ ń gbɛ̃nↄ kũ Zɛbuluni buri kínɛnↄ kũ Nafatali buri kínɛnↄo.
28 Luda, ǹ n gbãna mↄwɛrɛ, Luda, ǹ bo kũ n gbãna kũ n mↄ̀wɛrɛ yão.
29 Kínanↄ ni sunnɛ kũ ń gbanↄ n kpɛ́ kũ à kú Yurusalɛmu yãi.
30 Ǹ kpãkɛ̃ Misila ítɛnↄbↄↄi, ǹ pata burinↄ zùsanↄa kũ ń gbɛ̃nↄo. Ǹ andurufu gò tↄ̃ḿma, ǹ gbɛ̃ kũ zĩ̀kanaa dì kɛńnɛ nnanↄ fãkↄ̃a.
31 Misilanↄ ni zĩ̀rinↄ gbarɛmma, Etiopianↄ ni ↄ dↄmma, Luda.
32 Andunia kpatablerinↄ, à lɛ̀ sí Ludanɛ, à Dikiri táaki lɛ́,
33 àkũ kũ à di ludambɛ kũ à kun zaa zĩzĩa. À ma, àtɛn pũtã gbãnagbãna.
34 À Luda gbãna kpàkpa kɛ, ò a zↄ̃kↄ̃kɛ dↄ̃ Isarailanↄa, a gbãna kú ludambɛa.
35 Luda, ń naasi vĩ n kúkia, Isarailanↄ Luda dì gbãna kũ ikooo kpá a gbɛ̃nↄa. Arubarikademɛ Luda ũ!