ZABURA 39

SIM

¹ Ma pì, manigↄ̃ ma zĩda kũna dↄ̃, mani tó ma lɛ́ ma da durunnakɛnaa gũnlo. Tó gbɛ̃ vãni kú kũmao, mani ma lɛ́ kũ.

² Ma lɛ́ nakↄ̃ana, ma yĩtɛ kítikiti, mádi yãke oro, bee yã mana se, akũ ma yã'ũmmanaa ɛ̀ra à kàra.

³ Ma swɛ̃̀ɛ puusu bò ma gũn, kũ ma laasunn lɛ̀, ma nɛ̀sɛɛ wã̀, akũ ma lɛ́ bò ma pì:

⁴ Dikiri, ǹ tó mà a wɛ̃̀ndigↄrↄ lɛ́ dↄ̃ kũ ma gↄrↄ dasi lɛ́o. Ǹ tó màgↄ̃ dↄ̃ lákũ ma wɛ̃̀ndii ni láka nà araga.

⁵ N ma wɛ̃̀ndi lɛ́ yↄ̃̀ n ↄla lɛ́n, ma kunna de wɛ́ kũ yĩola n kĩnaaro. Gbɛ̃ sĩnda pínki dì gɛ̃tɛ lán ĩa bàmɛ,

⁶ bisãsiri tɛna dìgↄ̃ de lán uraa bàmɛ. Àdi kɛ gàragara à aruzɛkɛ kakara, ama à dↄ̃ ke dín ani gↄ̃nɛro.

⁷ Tó lɛmɛ, bↄ́ tãmaan manigↄ̃ vĩi? Mↄkↄ̃mmɛ ma wɛ́ donyĩ, Dikiri.

⁸ Ǹ ma taarinↄ kɛ̃ma, ǹsun tó yↄ̃nkↄnↄ ma foboro.

⁹ Ma lɛ́ nakↄ̃ana, mádi ma lɛ́ wɛ̃kↄ̃aro, zaakũ mↄkↄ̃n mɛ́ n yã bire kɛ̀.

¹⁰ Ǹsun ma lɛ́ doro, n okũ tɛni ma ká gaa.

¹¹ Ndì gbɛ̃ toto ndì wɛ́ tãa a durunna yãi, ndì a aruzɛkɛ ble lán blɛ́ bà. Gbɛ̃ sĩnda pínki dì gɛ̃tɛ lán ĩa bàmɛ.

¹² Ǹ ma aduakɛna sí Dikiri, ǹ sã kpá ma wikilɛnaaa. Ǹsun sã tata ma ↄ́ↄdↄnaanɛro, zaakũ n nibↄↄn ma ũ, má de gbɛ̃ zĩ̀tↄ ũ lán ma dizinↄ bà.

¹³ Ǹ wɛ́ goma de ma pↄ le àgↄ̃ nna dↄ, ari màgↄ̃ gɛ́ andunia tó.