ZABURA 17

SIM

¹ Dikiri, ǹ ma yãzɛde ma, ǹ sã kpá ma wikilɛnaai, ǹ ma wɛ́kɛna sí, zaakũ matɛn kɛ kũ manafikioro.

² N kĩnaan mani yã nna len, n wɛ́ tɛn yã kũ à zɛ́ vĩ e sãnsãn.

³ N ma swɛ̃̀ɛ gwà, n wɛ́ tɛ́mai gwãani, n ma tàasii kà, ńdi yãke emaro, zaakũ ma zɛo kũ ma lɛ́ ni ma kari boro.

⁴ Madì tɛ́ bisãsiri yãkɛnanↄiro, madì gbɛ̃ pãsĩnↄ turuba sɛ́ro.

⁵ Ma kure n zɛ́n súsu, mádi pã n yãnɛro.

⁶ Matɛn lɛ́ zunyĩ, zaakũ ĩni wema. Luda, ǹ sã kpá ma aduakɛnaai.

⁷ Ǹ n gbɛ̃kɛ yãbonsarɛ kɛmɛnɛ, ǹ gbɛ̃ kũ ò nànyĩnↄ bo ń ibɛrɛnↄ ↄĩ.

⁸ Ǹ laakari dↄma lán n wɛ́nɛ bà, ǹ ma sↄtↄ n orun.

⁹ Ǹ ma sí gbɛ̃ pãsĩ kũ òdi wari dↄmanↄa, ma ibɛrɛ kũ ò likanamai pìnↄ.

¹⁰ Òdi gbɛ̃ke wɛ́ gwaro, ń lɛ́ dì zĩda sɛna lei yã o.

¹¹ Ò pɛ̀tɛmai ò lìkamai, ò wɛ́ pìtima de ò le ò ma pãtɛ zĩtɛ.

¹² Ò ye ò ma kɛ yákiyaki lákũ músu nàdɛri dì kɛ nà, lán músu kũ à natɛna gukpado bà.

¹³ Dikiri, ǹ futɛ ǹ dańlɛ ǹ ń nɛ, ǹ ma sí gbɛ̃ pãsĩnↄa kũ n fɛ̃nɛdao.

¹⁴ Ǹ ma bo ń ↄĩ kũ n gbãnao. Ń baka kú andunia díkĩna gũn, ń aruzɛkɛ dìgↄ̃ dińyĩ, ń nɛ́nↄ dì kã, òdi pↄ́ kũ à dìńyĩnↄ kátɛ ń nɛ́nↄnɛ.

¹⁵ Makũ sↄ̃, mani wɛ́ kɛ pla kũnwo ma nɛ̀sɛmana yãi, tó ma n e ma vugↄrↄa, abirekũ ni ma kã.