ZABURA 115

¹ Adi kɛ ókↄ̃nↄnlo Dikiri, adi kɛ ókↄ̃nↄnlo, mↄkↄ̃mmɛ ń de ò n tↄ́ bo n gbɛ̃kɛ kũ n náanio yãi.

² À kɛ̀ dera burinↄ dì ó la ò pi ó Luda kú máa?

³ Ó Luda kú musu, pↄ́ kũ à yein àdi kɛ.

⁴ Ò ń tãnanↄ pì kũ andurufuuo kũ wuraao, bisãsiri ↄzĩmɛ.

⁵ Ò lɛ́ vĩ, ama òdi yã oro, ò wɛ́ vĩ, ama òdi gu ero.

⁶ Ò sã vĩ, ama òdi yã maro, ò yĩ vĩ, ama òdi pↄ́ gbĩ maro.

⁷ Ò ↄ vĩ, ama òdi pↄ́ kũro, ò gbá vĩ, ama òdi táa oro, òdi kòto kɛkɛro.

⁸ Ń pìrinↄn lɛɛlɛ kũńwomɛ kũ gbɛ̃ kũ òtɛni ń náani kɛnↄ ń pínki.

⁹ Isarailanↄ, à Dikiri náani kɛ! Àkũmɛ á kpanyĩri ũ kũ á sɛ̃gbakoo.

¹⁰ Haruna burinↄ, à Dikiri náani kɛ! Àkũmɛ á kpanyĩri ũ kũ á sɛ̃gbakoo.

¹¹ Dikiri vĩnakɛrinↄ, à Dikiri náani kɛ! Àkũmɛ á kpanyĩri ũ kũ á sɛ̃gbakoo.

¹² Dikiri dↄ̀ ó yãn, ani arubarika daógu. Ani arubarika da Isaraila burinↄgu, ani arubarika da Haruna burinↄgu,

¹³ ani arubarika da a vĩnakɛrinↄgu, nɛ́ fíti gbɛ̃ zↄ̃kↄ̃.

¹⁴ Dikiri á buri kara, ákↄ̃nↄ kũ á nɛ́nↄ.

¹⁵ Dikiri arubarika daágu, musu kũ zĩtɛo Kɛ̀rii.

¹⁶ Musu bi Dikiri pↄ́mɛ, ama à zĩtɛ nà bisãsirinↄnɛ ń ↄĩ.

¹⁷ Adi kɛ gɛ̀nↄ mɛ́ òdi Dikiri táaki lɛ́ro, kesↄ̃ gbɛ̃ kũ ń lɛ́ yĩtɛnↄ.

¹⁸ Ókↄ̃nↄ, ónigↄ̃ Dikiri sáabu kpá zaa tera ari gↄrↄ sĩnda pínki. Aleluya!