ZABURA 103
SIM1 Ma swɛ̃, ǹ Dikiri sáabu kpá, ma gu sĩnda pínki, ǹ a tↄ́ kũ à kú adona bo.
2 Ma swɛ̃̀, ǹ Dikiri sáabu kpá, ǹsun sã a yãmanakɛna kenlo.
3 Àdi ma taarinↄ kɛ̃ma pínki, àdi ma werekↄ̃a kũ ma gyãnↄ pínki.
4 Àdi ma wɛ̃̀ndi bo gyãwãn, àdi a nna diramɛnɛ a gbɛ̃kɛ kũ a wɛ̃ndaoo gũn.
5 Àdi tó pↄ́ mana kũ má yeinↄ mↄ́ma, de ma kɛfɛnnakɛ le àgↄ̃ dufu lán vãu pↄ́ bà.
6 Dikiri dì yã kɛ a zɛ́a, àdi tó yã bo gↄ̃nawɛ̃ndadenↄo nna.
7 À tò Musa a pↄyeina yã dↄ̃̀, à a yãbonsarɛnↄ mↄ̀ Isarailanↄnɛ.
8 Dikiri sùru vĩ kũ wɛ̃ndao, a pↄ dì fɛ̃ likaro, a gbɛ̃kɛ dasi manamana.
9 Ani ń taari le gɛ̃̀n baaakↄ̃ro, ani pↄfɛ̃ da a nɛ̀sɛn gↄrↄ sĩnda pínkiro.
10 Àdi yã kɛwɛrɛ lán ó durunnanↄn de nàro, àdi fĩna bowá lán ó sãtɛnanↄn de nàro.
11 Lákũ ludambɛ lei de nà kũ zĩtɛo, lɛn à gbɛ̃kɛ zↄ̃kↄ̃ kũ a vĩnakɛrinↄo lɛ.
12 Lákũ ifãboki zã̀kↄ̃nɛ kũ a lɛ́tɛ kpao nà, lɛn àdi ó taarinↄ kɛ̃wá lɛ.
13 Lákũ de dì a nɛ́nↄ wɛ̃nda gwa nà, lɛn Dikiri dì wɛ̃nda dↄ̃ a vĩnakɛrinↄnɛ lɛ.
14 Zaakũ à dↄ̃ pↄ́ kũ à ó kɛ́o, à dↄ̀n kũ bùsuumɛ ó ũ.
15 Bisãsiri wɛ̃̀ndi kutu lán sɛ̃̀ɛ bà, àdigↄ̃ gakuri vĩ gↄrↄ pla lán lávu bà.
16 Tó ĩa pàa, àdi gɛ̃tɛ, gu kũ à kunn pìi dì dↄ a yãn doro.
17 Dikiri dìgↄ̃ gbɛ̃kɛ vĩ kũ a vĩnakɛrinↄ zaa káaku ari gↄrↄ sĩnda pínki, àdi yã mana kɛ ń nɛ́nↄnɛ kũ ń daikorenↄ,
18 gbɛ̃ kũ ò zɛ̀ kũ a bàka kunna kũńwo yão akũsↄ̃ ò yã kũ à dìtɛnↄ kũnanↄ.
19 Dikiri a kpataa dìtɛ musu, à gbãna vĩ gbɛ̃ sĩnda pínkia.
20 À Dikiri sáabu kpá, ákↄ̃nↄ a malaikanↄ, ákↄ̃nↄ gbãnade kũ adì a yã ma à zĩ kɛanↄ.
21 À Dikiri sáabu kpá, ákↄ̃nↄ ludambɛ zĩ̀karinↄ á pínki, ákↄ̃nↄ a zĩkɛri kũ adì a pↄyenyĩna yã kɛnↄ.
22 À Dikiri sáabu kpá, ákↄ̃nↄ a pↄ́kɛnanↄ á pínki gu kũ àtɛn kí blennↄ pínki. Ma swɛ̃̀, ǹ Dikiri sáabu kpá.