YAASINƆ 3
SIM1 Ma nɛ́, ǹsun tó ma yãdannɛna sãnguro, ǹgↄ̃ yã kũ ma dìtɛnnɛnↄ kũna n swɛ̃̀n.
2 Zaakũ ani n ká wɛ̃̀ndi gbã̀naa, ani aafia karannɛ.
3 Gbɛ̃kɛ kũ náanio sún kɛ̃mmaro, ǹgↄ̃ dana mↄ̀wakarɛ ũ, ǹ kɛ̃ n swɛ̃̀ɛa lákũ òdi yã kɛ̃ anloa nà,
4 n tↄ́ nigↄ̃ nna, ĩnigↄ̃ mana Luda kĩnaa kũ bisãsirinↄ.
5 Ǹ Dikiri náani kɛ kũ nɛ̀sɛ mɛ̀n doo, ǹsun gbãna kpá n zĩda dↄ̃naaaro.
6 Ǹgↄ̃ a dↄ̃ n yã sĩnda pínki kɛnaa gũn, ani zɛ́ poronnɛ súsu.
7 Ǹsun n zĩda gwa ↄ̃ndↄ̃de ũro, ǹgↄ̃ Dikiri vĩna vĩ ǹ kɛ̃ yã vãnia.
8 Abirekũ nigↄ̃ de n mɛ̀ aafia ɛzɛ ũ, ani n wánↄ gba gbãna.
9 Ǹ bɛ̀ɛrɛ lí Dikirinɛ kũ n aruzɛkɛo kũ n burapↄ káakunↄ pínki,
10 pↄ́blewɛnↄ ni n dↄ̃̀ pa ari àgↄ̃ kↄ́tɛ, n lo zↄ̃kↄ̃nↄ ni pa yɛ́rɛrɛ kũ sèwɛ̃ dufuo.
11 Ma nɛ́, tó Dikiri tɛn foru dↄmma, ǹsun dↄkɛ kũ a yãoro, tó à kpã̀kɛ̃nyĩ, ǹsun tó à kɛnnɛ ĩniro.
12 Zaakũ gbɛ̃ kũ Dikiri yeiin àdi toto, lákũ de dì kɛ a nɛ́ kũ à kɛ̀nɛ mananɛ nà.
13 Arubarikaden gbɛ̃ kũ à ↄ̃ndↄ̃ lè à kũ̀ à dↄ̃naa lè à pàpa ũ.
14 Zaakũ à àre vĩ de andurufula, àdi karana kɛńnɛ de wurala.
15 À bɛ̀ɛrɛ vĩ de gbɛ̀ bɛ̀ɛrɛdela, pↄ́ kũ ń a ni vĩnↄ ke dí ká a ũro.
16 Wɛ̃̀ndi gbã̀na kú a ↄplan, aruzɛkɛ kũ gakurio kú a ↄzɛn.
17 A yãkɛnanↄn nna, a zɛ́ sĩnda pínki aafia vĩ.
18 À de lí wɛ̃̀ndide ũ gbɛ̃ kũ ò kũnanↄnɛ, arubarikadenↄn gbɛ̃ kũ ò sìnↄ ũ.
19 Dikiri gonikɛ gũn à zĩtɛ kàtɛ, a ↄ̃ndↄ̃ gũn à musu kɛ̀.
20 À ísira wɛ̀ɛ bò a dↄ̃naa gũn, à tò ludambɛ luku mↄtↄ vĩ.
21 Ma nɛ́, ǹgↄ̃ wɛ́zɛ̃ vĩ kũ fayaao, ǹsun wɛ́ vĩalaro.
22 Anigↄ̃ de n nini wɛ̃̀ndi ũ, anigↄ̃ de mↄ̀wakarɛ ũ n wakaaa.
23 Ĩnigↄ̃ kure n laakariia, pↄ́ke ni kpánnɛro.
24 Tó n wutɛ, vĩna ni n kũro, ĩni wútɛ ǹ i o nna.
25 Ĩni vĩna kɛ kariinɛro, ke kisira kũ àdi yãvãnikɛrinↄ le kãnto.
26 Zaakũ Dikiri nigↄ̃ de n mìkpaki ũmɛ, ani tó n gbá vĩ tankutɛla.
27 Tó n ↄ tɛni n kpɛ le, ǹsun gí ǹ yã mana kɛ gbɛ̃ kũ à de ǹ kɛnɛɛnɛro.
28 Tó ń kpányĩ zɛ́ vĩ, ǹsun pi n gbɛ̃dakenɛ à gɛ́ gĩa ari ziaro.
29 N gbɛ̃dake kũ à kú n sarɛ kũ à n náanikɛna, ǹsun a kũ yã vãnioro.
30 Tó gbɛ̃ dí yãke kɛnnɛro, ǹsun lɛ́kpakↄ̃a kɛ kãao pãro.
31 Ǹsun gbãnamↄnnɛri kunna ni dɛro, ǹsun tɛ́ a yãkɛna keiro.
32 Zaakũ Dikiri tɛ̃̀ɛmɛ manafikidenↄ ũ, nɛ̀sɛpuradenↄn àdi kɛ a kpàasinↄ ũ.
33 Dikiri dì láari bo gbɛ̃ vãninↄ ↄnnwa, àdi arubarika da gbɛ̃ mananↄ bɛn.
34 Àdi lalandidenↄ lalandi kɛ, ama à gbɛ̃kɛ vĩ kũ zĩdabusarinↄ.
35 Ɔ̃ndↄ̃de dì bɛ̀ɛrɛ le, yↄ̃nkↄ sↄ̃ àdi wé'i da a zĩdaa.