YAASINƆ 14

SIM

¹ Nↄgbɛ̃ ↄ̃ndↄ̃de dì ↄn kátɛ, a fayasaride sↄ̃ àdi ↄn fãkↄ̃a.

² Gbɛ̃ kũ àdi yã kɛ a zɛ́a Dikiri vĩna vĩ, gbɛ̃ kũ àdi zɛ́ sɛ́ súsuro sↄ̃ àdi a gya bo.

³ Fayasaride lɛ́mɛ a gbɛ̃bↄ ũ, ↄ̃ndↄ̃de yã'onaa dì a bo.

⁴ Tó zù kunlo, pↄ́ble gbàa dìgↄ̃ da korimɛ, òdi àre zↄ̃kↄ̃ le kũ zùnↄ gbãnao.

⁵ Sèeda yãpurade dì ɛ́kɛ toro, sèeda ɛ́kɛde yã dìgↄ̃ manafiki vĩ.

⁶ Lalandide dì kpátɛ kɛ ↄ̃ndↄ̃i à kurai, yãdↄ̃naa araga laakaridenɛ.

⁷ Ǹ kɛ̃ yↄ̃nkↄa zã̀zã, zaakũ ĩni dↄ̃na learo.

⁸ Ɔ̃ndↄ̃ dì tó laakaride laasun lɛ́ a zɛ́a, yↄ̃nkↄ fayasarikɛ dì a sãtɛ.

⁹ Fayasaridenↄ dì taari kutɛkɛna gya bo, gbɛ̃ mananↄ dìgↄ̃ nna kũ kↄ̃o.

¹⁰ Baadi a zĩda yã'ũmmana dↄ̃, gbɛ̃ pↄnna dìgↄ̃ de gbɛ̃ pãnde pↄ́ ũro.

¹¹ Gbɛ̃ vãninↄ ↄn ni mì dɛ, gbɛ̃ mananↄ bɛ ni ↄ tá.

¹² Zɛ́ ke kun àdi kɛ gbɛ̃nↄnɛ mana, ama a mìdɛki bi gamɛ.

¹³ Bee yáadↄnaa gũn nɛ̀sɛɛ dì yaka, pↄnna kun kũ àdi mì dɛ kũ pↄsirao.

¹⁴ Borukpɛde yãkɛnaa dì wí a musu, gbɛ̃ mana dì a yãkɛnaa gbɛ̀ le.

¹⁵ Laasunsaride dì yã sĩnda pínki símɛ, laakaride dì yã náani kɛ laasunlɛnaa sariro.

¹⁶ Ɔ̃ndↄ̃de dìgↄ̃ vãnikɛnaa vĩna vĩ àdi pãnɛ, yↄ̃nkↄ dì náani kpá a zĩdaa àdigↄ̃ wãna.

¹⁷ Pↄfɛ̃rii dì yã futa kɛ, manafikide dì zãngu i a zĩdanɛ.

¹⁸ Ɔ̃ndↄ̃saridenↄ dì gↄ̃ faya sari, laakaridenↄ dì dↄ̃na kú fùra ũ.

¹⁹ Gbɛ̃ vãninↄ ni mì natɛ gbɛ̃ mananↄnɛ, yãvãnikɛrinↄ ni kútɛ nɛ̀sɛpuradenↄ kpɛ́lɛlɛa.

²⁰ Takaside, bee a gbɛ̃dake dì zãn, ama aruzɛkɛde gbɛ̃nnanↄ dìgↄ̃ dasi.

²¹ N gbɛ̃dake gyabona bi durunnamɛ. Arubarikaden gbɛ̃ kũ àdi wɛ̃nda dↄ̃ takasidenↄnɛ ũ.

²² Yã vãni lɛ́kpakũsũrinↄ ń sãtɛnaroo? Yã mana laasunlɛrinↄn sùru vĩ kũ náanio.

²³ Mɛ̀kpana zĩa dìgↄ̃ àre vĩ, yãbↄtɛna pã dì su kĩanaao.

²⁴ Ɔ̃ndↄ̃denↄ aruzɛkɛmɛ ń fùra ũ, yↄ̃nkↄnↄ fayasarikɛ dì su kũ fayasariyão.

²⁵ Sèeda yãpurade dì gbɛ̃ sura ba, ama sèeda ɛ́kɛde yã manafiki vĩ.

²⁶ Vĩnakɛna Dikirinɛ bi gbãnaleki náanidemɛ, à de surabaki ũ a nɛ́nↄnɛ.

²⁷ Vĩnakɛna Dikirinɛ bi ísɛ̃boki wɛ̃̀ndidemɛ, àdi tó ò bo ga bàn.

²⁸ Tó kína gbɛ̃nↄn dasi, àdigↄ̃ gakuri vĩ, bùsugbɛ̃sarikɛ bi kpatableri kisiramɛ.

²⁹ Gbɛ̃ kũ àdi pↄfɛ̃ likaro wɛ́ kɛ̃na, pↄfɛ̃rii dì a futakɛ sɛ́ lei.

³⁰ Laakarikpatɛna bi mɛ̀ aafiaamɛ, zãngu dì mɛ̀kɛmuna zĩḿma.

³¹ Wɛ̃ndade wɛ́tãmmarii dì a Kɛ̀ri kpe bo, takaside wɛ́gwarii dì a Kɛ̀ri kpe ta.

³² Tó kisira sù, àdi yãvãnikɛri nɛmɛ, bee tó gbɛ̃ mana gà, à utɛki vĩ.

³³ Ɔ̃ndↄ̃ dì vutɛki le laakaride nɛ̀sɛn, ama òdi e yↄ̃nkↄaro.

³⁴ Yãzɛde dì bùsu sɛ́ lei, durunna dì wé'i da gbɛ̃nↄa, bee dímɛ.

³⁵ Zↄ̀bleri laakaride yã dì ká kínagu, ama àdi a pↄfɛ̃ kipa a wé'idammariia.