Misee 2

¹ Bɔ̃rurobɑ be bɑ rɑ n kɔ̃sɑ bwisikumɔ wɔ̃kuru mi bɑ kpĩ. Bɑ̀ n seewɑ buru buru kpɑ bu ye ko yèn sɔ̃ bɑ yen dɑm mɔ.

² Bɑ̀ n goon gberu binɛ kuɑ, kpɑ bu tu mwɑ. Bɑ̀ n goon diru binɛ kuɑ, kpɑ bu tu mwɑ. Bɑ rɑ yɛ̃ro kɑ win yɛnugibu dɑm dɔrewɑ kpɑ bu du bu ben dukiɑ kpuro gurɑ.

³ Yen sɔ̃nɑ Yinni Gusunɔ u nɛɛ, wee nɑ kɔ̃sɑn sɔɔru mɔ̀ tɔn ben sɔ̃. Bɑ ǹ mɑɑ kpɛ̃ bu ye dukɑ suuri. Mɛyɑ bɑ ǹ mɑɑ kpɛ̃ bu sĩ bɑ n wĩiru yɔ̃rɑsie dɑm dɑm. Domi tɔ̃ɔ te tɑ wee mi, tɔ̃ɔ kɔ̃surɑ.

⁴ Yen tɔ̃ɔ te, bɑ koo gɔɔ wurɑ yeni ko bu nɛɛ, wee! Bɑ bu gurɑ kpuro mɑm mɑm. Ben tɔmbu bɑ ǹ mɑɑ tem mɔ. Bɑ bu girɑ ben gbeɑn di. Bɑ ye bɔnu kuɑ ben tii tiinɛ sɔɔ. Mbɑn sɔ̃nɑ bɑ bu gurɑ nge mɛ.

⁵ Adɑmɑ sɑɑ gɑɑ sisi yè sɔɔ ben goo kun mɑɑ tem wɑsi Yinni Gusunɔn tɔmbu bɑ̀ n tem bɔnu mɔ̀.

⁶ Ben gɑbɑ bɑ seewɑ bɑ Misee sɔ̃ɔwɑ bɑ nɛɛ, ɑ ku mɑɑ gɑri suni ɑ n mɔ̀, kɔ̃sɑ ye, yɑ weewɑ kɑm kɑm.

⁷ Bɑ Isirelibɑn bweseru bɔ̃rusiwɑ? Yinni Gusunɔ u suuru kpɑnɑwɑ? Nge mɛyɑ u rɑ rɑɑ sun kue? Adɑmɑ Misee bu wisɑ u nɛɛ, gɑri doriyɑ nɑ gerumɔ be bɑ kom gem mɔ̀n sɔ̃.

⁸ Adɑmɑ bɛɛyɑ Yinni Gusunɔ u sɔ̃ɔmɔ u mɔ̀, i kuɑ win tɔmbun yibɛrɛbɑ. I tɔmbu sɛ̃re be bɑ wee tɑbu gberun di i ben yɑ̃nu potirɑ.

⁹ I ben kurɔbu girɑ sɑɑ yɛnu si bɑ kĩn min di, mɑ i derɑ ben bibɑ kun mɑɑ girimɑ wɑsi sere kɑ bɑɑdommɑɔ yè nɑ rɑɑ bu wɛ̃.

¹⁰ I seewo i doonɑ, i ǹ mɑɑ bɔri yɛndu wɑsi tem mɛ sɔɔ. Wɑhɑlɑ bɑkɑ yɑ bɛɛ mɑrɑ bɛɛn mɛm nɔɔbu sɑrirun sɔ̃.

¹¹ Domi Gusunɔn sɔmɔ benin bweserɑ i rɑ kɑ̃ be bɑ rɑ bɛɛ weesu kue bu nɛɛ, i ko i tɑm wɑ i nɔ, yen tɑm bɔɔbɔm mɑm.

¹² Yinni Gusunɔ u nɛɛ, bɛɛ Isirelibɑ, Yɑkɔbun bweseru, kon bɛɛ be i tie kpuro mɛnnɑ. Kon bɛɛ mɛnnɑ nge yɑ̃ɑnu gɔ̃ɔ teu sɔɔ. Kpɑ i n wɑ̃ɑ sɑnnu nge yɑ̃ɑnu kpɑrɑ yerɔ. Bɛɛn tem mu koo tɔmbu yibu.

¹³ Nɛ, Yinni Gusunɔ bɛɛn sinɑ boko, nɛnɑ nɑ bɛɛ kpɑre. Kon nɑ n bɛɛ swɑɑ gbiiye. Nɛnɑ kon bɛɛ swɑɑ kɛniɑ i kɑ yɑkiɑrɑ. I ko i swɑɑ gĩɑ kpɑ i yɑri min di.