Yeremi 14

¹ Sɑnɑm mɛ nim gɔ̃ɔrɑ wɑ̃ɑ, Yinni Gusunɔ u Yeremi sɔ̃ɔwɑ u nɛɛ,

² Yudɑbɑ bɑ gɔɔ wooru sɔ̃. Goo mɑɑ sɑri ben wuu mɑrosun kɔnnɔsɔ. Wee bɑ wɔrukɑ temɔ bɑ nuki sɑnkire. Mɑ Yerusɑlɛmugibu bɑ nɔɔgiru sue bɑ fɑɑbɑ kɑnɑmɔ.

³ Dɑmgibu bɑ bwɛ̃ɛbwɛ̃ɛbu gɔrimɔ bu nim kɑsumɑ. Adɑmɑ bɑ̀ n dɔkɔ dɑ bɑ ku rɑ nim wɑ. Bɑ rɑ gɔsirɑmɛwɑ kɑ koto gbebusu, kpɑ seku bɑkɑru tɑ n bu mɔ̀, bɑ n wuswɑɑ gɑ̃ɑnu wukiri.

⁴ Tem mu bɛsikirɑ yèn sɔ̃ gurɑ kun nɛmɔ. Mɑ sekurɑ gbee wukobu mɔ̀ bɑ wuswɑɑ gɑ̃ɑnu wukiri.

⁵ Yɑkɑ bekusu sɑri. Bɑtumɑ sɔɔrɑ nɛnnu rɑ mɑ kpɑ nu doonɑ nu binu deri.

⁶ Wee gbeeku kɛtɛkunu nu wɑ̃ɑ guunu wɔllɔ, nu wom gɑbirimɔ nge gbeeku bɔ̃nu. Nin nɔni tondɑ yèn sɔ̃ yɑkɑsu sɑri.

⁷ Yudɑbɑ bɑ gerumɔ bɑ mɔ̀, bɑɑ mɛ sɑ tɑɑrɛ mɔ bɛsɛn durum sɔ̃, Yinni Gusunɔ, ɑ sun somiɔ wunɛn yĩsirun bɛɛrɛn sɔ̃. Wee sɑ kuɑ mɛm nɔɔ sɑribɑ, mɑ sɑ nun torɑri.

⁸ Wunɛ wi bɛsɛ Isirelibɑ sɑ nɑɑnɛ sɑ̃ɑ, wunɑ ɑ rɑ sun fɑɑbɑ ko wɑhɑlɑn sɑɑ sɔɔ. Mbɑn sɔ̃nɑ kɑɑ n sɑ̃ɑ nge sɔɔ wi u sɑrɔ bɛsɛn temɔ u kpunɑ wɔ̃ku teeru tɔnɑ.

⁹ Mbɑn sɔ̃nɑ kɑɑ n sɑ̃ɑ nge wi bɑ wɔri subɑru sɔɔ, ǹ kun mɛ nge tɑbu durɔ wi u kpɑnɑ u sun fɑɑbɑ ko, ɑ sere wɑ̃ɑ bɛsɛn suunu sɔɔ. Yinni Gusunɔ, mɑ sɑ wunɛn yĩsiru sɔɔwɑ, ɑ ku sun deri.

¹⁰ Wee ye Yinni Gusunɔ u geruɑ win tɔmbun sɔ̃. U nɛɛ, bɑ rɑ kɑ̃ bɑ n yɑɑyɑɑre mɔ̀. Bɑ ku rɑ kpĩ bu sinɑ bu tii nɛnɛ. Bɑ ǹ mɑɑ nùn wɛ̃remɔ. U ben durum yɑɑye. Yen sɔ̃nɑ u bu sɛɛyɑsiɑmɔ.

¹¹ Mɑ Yinni Gusunɔ u Yeremi sɔ̃ɔwɑ u nɛɛ, ɑ ku tɔn be kɑnɑru kuɑ n kɑ bu geɑ kuɑ.

¹² Domi bɑɑ bɑ̀ n nɔɔ bɔkuɑ, nɑ ǹ ben kɑnɑru nɔɔmɔ. Bɑ̀ n mɑɑ yɑ̃ku dɔ̃ɔ mwɑɑrɑruginu kɑ kɛ̃nu gɑnu kuɑ, nɑ ǹ nu mwɑɑmɔ. Kon de bu gbiwɑ gɔ̃ɔrun sɔ̃ kɑ kɛ̃si kɛ̃si bɑrɑrun sɔ̃ kɑ mɑɑ tɑbu sɔɔ.

¹³ Mɑ Yeremi u wisɑ u nɛɛ, Yinni Gusunɔ, wee wunɛn sɔmɔbu bɑ wunɛn tɔmbu sɔ̃ɔmɔ bɑ mɔ̀, bɑ ǹ tɑbu wɑsi. Gɔ̃ɔrɑ kun mɑɑ duɔ ben temɔ. Kɑɑ de bɑ n wɑ̃ɑwɑ bɔri yɛndu sɔɔ kɑ toro sindu.

¹⁴ Yinni Gusunɔ u mɑɑ nùn sɔ̃ɔwɑ u nɛɛ, weesɑ bɑ gerumɔ kɑ nɛn yĩsiru. Nɑ ǹ bu gɔre, nɑ ǹ bu woodɑ gɑɑ wɛ̃. Mɛyɑ nɑ ǹ mɑɑ bu gɑri gɛɛ sɔ̃ɔwɑ. Kɑ̃sinu kɑ siɑn gɑri kɑ ben gɔ̃rusun gɑri yi bɑ gerumɔ, ye kpuro weesɑ.

¹⁵ Yen sɔ̃, sɔmɔ be nɑ ǹ gɔre mi, bɑ kɑ tɔmbu sɔ̃ɔmɔ bɑ mɔ̀, bɑ ǹ tɑbu wɑsi ben temɔ, gɔ̃ɔrɑ kun duɔ mi, kon de bu gbi tɑbu sɔɔ, kɑ gɔ̃ɔrun sɔ̃.

¹⁶ Kpɑ tɔn be bɑ mɑɑ weesun gɑri sɔɔmɔ mi, bɑ n wɔrukɑ Yerusɑlɛmun swɛɛ sɔɔ gɔ̃ɔ te, kɑ tɑɑ bin sɔ̃. Bɑ ǹ goo wɑsi wi u koo bu sike, be kɑ ben kurɔbu kɑ bibu. Kon de ben nuku kɔ̃suru tu wɔriwɑ ben tii sɔɔ.

¹⁷ Yeremi u nɛɛ, Gusunɔ u mɑn sɔ̃ɔwɑ n tɔn be sɔ̃ n nɛɛ, nɛn nɔni yĩresu su kokumɔ bururu kɑ yokɑ, su ǹ yɔ̃re. Domi wɑhɑlɑ bɑkɑ yɑ nɛn tɔmbu deemɑ. Bɑ bu so bɑ mɛɛrɑ kuɑ.

¹⁸ Nɑ̀ n yɑrɑ nɑ dɑ yɑkɑsɔ, nɑ rɑ tɔn be bɑ go tɑbu sɔɔn gonu wɑwɑ nu kpĩ. Nɑ̀ n mɑɑ wurɑmɑ wuuɔ, kpɑ n deemɑ tɔmbɑ bɑrɔ gɔ̃ɔrun sɑɑbu. Gusunɔn sɔmɔbu kɑ yɑ̃ku kowobu bɑ rɑ n den sirenɛwɑ tem mɛ sɔɔ. Bɑ ǹ yɛ̃ ye bɑ mɔ̀.

¹⁹ Yinni Gusunɔ, ɑ bɛsɛ Yudɑbɑ biru kisiwɑ mɑm mɑm? A sun bwɛ̃rɑ yɑrɑwɑ? Mbɑn sɔ̃nɑ ɑ sun sɛɛyɑsiɑmɔ ɑ mɛɛrɑ mɔ̀ ye yɑ ǹ bɛkurɑmɔ. Sɑ bɔri yɛndu mɑrɑ, ɑdɑmɑ sɑ ǹ tu wɑ. Sɑ mɑrɑ ɑ sun bɛkiɑ, ɑdɑmɑ nɔni swɑ̃ɑru sɔɔrɑ sɑ wɑ̃ɑ.

²⁰ Yinni Gusunɔ, sɑ durum kuɑ wunɛn mi. Sɑ tubɑ mɑ nuku kɔ̃surɑ sɑ kuɑ, bɛsɛ kɑ bɛsɛn bɑɑbɑbɑ.

²¹ A wunɛn ɑrukɑwɑni yɑɑyo ye ɑ kɑ sun bɔkuɑ. Wunɛn yĩsirun sɔ̃, ɑ ku sun gɛm. A ku mɑɑ Yerusɑlɛmu funɛ wĩɑ mi ɑ wunɛn sinɑ gɔnɑ yiikogiɑ yii.

²² Bũu goo sɑri wi u koo kpĩ u gurɑ nɛɛsiɑ, wɔllun tii, tɑ ǹ kpɛ̃ tu gurɑ nɛɛsiɑ. Gusunɔ bɛsɛn Yinni, wunɑ ɑ rɑ de gurɑ yu nɛ. Wunɑ sɑ mɑɑ nɑɑnɛ sɑ̃ɑ. Domi wunɑ ɑ rɑ ye kpuro ko.