Osee 11

¹ Yinni Gusunɔ u nɛɛ, sɑɑ Isirelin bweserun torubun diyɑ nɑ tu kĩɑ. Mɑ nɑ tu yɑrɑmɑ Egibitin di nɑ tu sokɑ nɛn bii.

² Adɑmɑ nge mɛ nɑ bu sokumɔ nge mɛyɑ bɑ kɑ mɑn tondɑmɔ. Bɑ dɑ bɑ bũu ni bɑ mɔ̀ Bɑɑli sɑ̃ɑmɔ. Mɑ bɑ nu turɑre dɔ̃ɔ dokeɑmmɛ.

³ N deemɑ nɛnɑ nɑ bu kpɑre, nɑ ben nɔmɑ nɛni. Adɑmɑ bɑ ǹ tubɑ mɑ nɛnɑ nɑ bu nɔɔrimɔ.

⁴ Nɑ bu gɑwɑmɑ nɛn mi kɑ kĩru mɑ nɑ bu dĩɑnu wɛ̃ nge wi u yɑɑ sɑbenun sugu yiiyɑmɔ u kɑ nu nɔɔri.

⁵ Adɑmɑ bɑ yinɑ bu nɑ nɛn mi. Yen sɔ̃nɑ nɑ nɛɛ, bɑ koo dɑ Egibitiɔ kpɑ Asirigii u ko ben sunɔ.

⁶ Bɑ koo ben wusu tɑbu wɔri, kpɑ bu ben dɑmgibu kɔsuku yèn sɔ̃ bɑ ben tiin kpunɑɑ swĩi.

⁷ Wee nɛn tɔmbu bɑ yɔ̃rɑri bu kɑ mɑn tondɑ. Bɑ bu sokɑ bu gɔ̃ru gɔsiɑ bu wurɑmɑ nɛ, Wɔrukoon mi. Adɑmɑ ben goo kun wure.

⁸ Kɑ mɛ, bɛɛ Isirelibɑ, nɑ ǹ kpɛ̃ n bɛɛ deri, n bɛɛ tɔnu kɑndu kuɑ. Nɑ ǹ kpɛ̃ n bɛɛ kɑm koosiɑ nge mɛ nɑ wuu si bɑ mɔ̀ Adimɑ kɑ Seboimu kuɑ. Wee nɛn gɔ̃ru gɑ sɑnkire, nɛn bwɛ̃rɑ kun kpunɛ.

⁹ Nɑ ǹ mɑɑ bɛɛ kpeerɑsiɑmɔ kɑ nɛn mɔru bɑkɑ ye. Nɑ ǹ mɑɑ wee n bɛɛ kɑm koosiɑ. Domi nɑ sɑ̃ɑwɑ Gusunɔ n ǹ mɔ tɔnu. Nɑ sɑ̃ɑwɑ Dɛɛro bɛɛn suunu sɔɔ. Nɑ ǹ bɛɛ wɔrim wee kɑ mɔru.

¹⁰ Bɛɛ nɛn bibu, i ko nɛ, Yinni Gusunɔ swĩi nɑ̀ n kukurɑ nge gbee sunɔ kpɑ i duki nɑ sɑɑ sɔ̃ɔ duu yerun di.

¹¹ I ko duki nɑ sɑɑ Egibitin di nge gunɔ mɔri kpɑ i nɑ sɑɑ Asirin di nge totobɛrɛnu, kpɑ n de i sinɑ bɛɛn yɛnusɔ. Nɛ, Yinni Gusunɔwɑ nɑ yeni geruɑ.