NAANAA 42
SIM1 Kũ Yakubu mà pↄ́blewɛ kú Misila, à pì a nɛ́nↄnɛ: Ánigↄ̃ kátɛ la pã yá?
2 Ma mà pↄ́blewɛ kú Misila. À gɛ́ lúwɛrɛ gwe, de òsun garo, ògↄ̃ kun aafia yãi.
3 Akũ Yusufu vĩ̀ni gbɛ̃nↄn kurinↄ gɛ̀ɛ Misila pↄ́blewɛ lú.
4 Yakubu dí Yusufu dakũna Biliaminu zĩ kũńworo, zaakũ à pì: Òdigↄ̃ dↄ̃ro tó yã vãni ni a le.
5 Akũ Isaraila nɛ́ pìnↄ gɛ̀ɛ pↄ́blewɛ lú kũ gbɛ̃ pãndenↄ, zaakũ nàa pìi kà Kanaanↄ bùsun dↄ.
6 Yusufu mɛ́ à bùsuu pì gbɛ̃ zↄ̃kↄ̃ ũ. Àkũ mɛ́ àdi pↄ́blewɛ yía gbɛ̃ sĩnda pínkia. Akũ a vĩ̀ninↄ sù ò kùtɛnɛ ò ń arɛ pɛ̀tɛ zĩtɛ.
7 Kũ à a vĩ̀ninↄ è, à ń dↄ̃, akũ à a zĩda kɛ̀ńnɛ nibↄ ũ. Akũ à yã òńnɛ pãsĩpãsĩ à ń lá à pì: A bo máa? Ò wèa ò pì: O bo Kanaanↄ bùsun o su pↄ́blewɛ lúmɛ.
8 Yusufu a vĩ̀ninↄ dↄ̃̀, ama odi a dↄ̃ro.
9 Nana kũ à ò yã ń yã musu dↄ̀agu, akũ à pìńnɛ: Gu'asirigwarinↄn á ũ, a su ó bùsu kĩaki gwamɛ.
10 Ò wèa ò pì: Oi dikiri! N zↄ̀blerinↄn ó ũ, o su pↄ́blewɛ lúmɛ.
11 Dedokↄ̃nↄdenↄmɛ ó ũ ó pínki. Náanidenↄmɛ ó ũ. Ókↄ̃nↄ n zↄ̀blerinↄ, gu'asirigwarinↄmɛ ó ũro.
12 Akũ à pìńnɛ: Ɛ́kɛmɛ! A su ó bùsu asiri dↄ̃mɛ.
13 Ò pì: Ókↄ̃nↄ n zↄ̀blerinↄ, dedokↄ̃nↄdenↄmɛ ó ũ, ó gbɛ̃nↄn kuri awɛɛplamɛ. Kanaanↄ bùsu gbɛ̃nↄmɛ ó ũ. Ó dakũna gↄ̃̀ bɛ kũ ó deo, ó gbɛ̃ do kunlo.
14 Akũ Yusufu pìńnɛ: Lákũ ma òárɛ nà, gu'asirigwarinↄmɛ á ũ.
15 Yã kũ ani tó mà á yãpura dↄ̃n dí. Kũ Firi'auna kunnaao áni bↄtɛ laro, séto á dakũna pìi sù la baasiro.
16 À á gbɛ̃ do zĩ à á dakũna sɛ́, á gbɛ̃ kparanↄ ni gↄ̃ kpɛ́siran la, mani dↄ̃ tó á yã yãpuramɛ. Tó lɛnlo, kũ Firi'auna kunnaao gu'asirigwarinↄn á ũ.
17 Akũ à ń ká kpɛ́n ari gↄrↄ aakↄ̃.
18 A gↄrↄ aakↄ̃de zĩ à pìńnɛ: Má Luda vĩna vĩ. À yã kũ mani oárɛ kɛ áni bo aafia.
19 Tó náanidenↄmɛ á ũ, à á gbɛ̃ do tó da kpɛ́n la, á gbɛ̃ kparanↄ ni tá kũ pↄ́blewɛo á bede nàdɛrinↄnɛ,
20 áni ɛra à sumɛnɛ kũ á dakũna pìio, mani dↄ̃ kũ á yã yãpuramɛ, oni á dɛdɛ doro. Akũ ò wèi lɛ.
21 Ò pìkↄ̃nɛ: Yãpuramɛ taaridenↄn ó ũ yã kũ o kɛ̀ ó dakũnanɛ yã yãi. O è gↄrↄ kũ àtɛn kútɛ kɛwɛrɛ, à kɛ̀ wɛ̃nda, akũ ódi a yã maro. Abire yãin yã dí ó lé.
22 Akũ Rubɛni pìńnɛ: Kũ ma òárɛ àsun yãke kɛ nɛ́ pìinɛro, ádi ma yã maro. A aru fĩnan Luda tɛn bowá dí.
23 Ò dↄ̃ Yusufu tɛn maro, zaakũ kũ àtɛn yã ońnɛ, òtɛn litɛńnɛmɛ.
24 Akũ à gò ń kĩnaa à gɛ̀ɛ à ↄ́ↄ dↄ̀. Kũ à sù, à yã òńnɛ, akũ à Simɛↄ bò ń gũn à a yĩ̀ ń wára.
25 Yusufu pì ò pↄ́blewɛ káńnɛ ń asasanↄ pa ò ń baadi ↄgↄ danɛ a pↄ́n ò zɛ́ kusuna kɛńnɛ. Kũ ò kɛ̀ńnɛ lɛ,
26 ò ń pↄ́blewɛnↄ dì ń zaakinↄnɛ, akũ ò dà zɛ́n.
27 Kũ ò kà gu kũ òtɛn in, kũ ń gbɛ̃ do a asasa pòro de à pↄ́ kpá a zaakia, akũ à a ↄgↄ è a asasa lɛ́n.
28 Akũ à pì a gbɛ̃nↄnɛ: À ma asasa gũn gwa, ò ma ↄgↄ sùkpamɛnɛ! Akũ swɛ̃̀ɛ kɛ̃̀ńgu, ò pìkↄ̃nɛ kũ lukanaao: Bↄ́ yãn Luda kɛ̀wɛrɛ lɛɛ?
29 Kũ ò kà ń de Yakubu kĩnaa Kanaanↄ bùsun, ò yã kũ à ń lé bàbanɛ pínki ò pì:
30 Bùsu gbɛ̃ zↄ̃kↄ̃ↄ pì yã òwɛrɛ pãsĩpãsĩ, a ó dítɛ gu'asirigwarinↄ ũ.
31 O pìnɛ náanidenↄmɛ ó ũ, gu'asirigwarinↄmɛ ó ũro.
32 Dedokↄ̃nↄdenↄmɛ ó ũ, ó gbɛ̃nↄn kuri awɛɛplamɛ, ó gbɛ̃ do kunlo, ó dakũna gↄ̃̀ Kanaanↄ bùsun kũ ó deo.
33 Akũ bùsu gbɛ̃ zↄ̃kↄ̃ↄ pìi pìwɛrɛ yã kũ ani tó á ó dↄ̃ náanidenↄ ũn dí. À pì ò ó gbɛ̃ do tó kãao, ò pↄ́blewɛ sɛ́ ò táo ó bede nàdɛrinↄnɛ,
34 ò ɛra ò suárɛ kũ ó dakũnao, áni dↄ̃ sà kũ gu'asirigwarinↄmɛ ó ũro, náanidenↄmɛ ó ũ, áni ó gbɛ̃ndo kpáwá, óni laga tá bùsuu pìn.
35 Kũ òtɛn pↄ́blewɛ bↄtɛ ń asasanↄ gũn, ń baadi a ↄgↄsↄ̃nↄnↄ è a pↄ́ gũn. Kũ ò ń ↄgↄnↄ è lɛ, vĩna ń kũ ń pínki kũ ń deo.
36 Akũ ń de pìńnɛ: Á ye mà gↄ̃ nɛ́ sarin yá? Yusufu kunlo, Simɛↄ kunlo, akũ á ye à Biliaminu síma dↄ yá? Yã sĩnda pínki tɛn bomɛnɛ vãnimɛ.
37 Akũ Rubɛni pì a denɛ: Tó mádi su kãaonnɛro, ǹ ma nɛ́gↄ̃gbɛ̃ planↄ dɛdɛ. Ǹ a kpáma, mani su kãaonnɛ.
38 Akũ Yakubu pì: Ma nɛ́ ni gɛ́ kãáoro, zaakũ a vĩ̀ni dadokↄ̃nↄde gà, àkũ à gↄ̃̀ ado. Ma zĩ kũ̀. Tó yãke a lè tá kũ átɛn o gũn, ani tó mà tá miran kũ pↄsiraomɛ.