NAANAA 11
SIM1 Andunia gũn yã pínki buri mɛ̀n domɛ, yã dokↄ̃nↄn òdi o.
2 Lákũ gbɛ̃nↄ tɛn sↄ̃sↄ̃ ifãboki kpa nà, kũ ò kà Babilↄnia bùsu gusaran, akũ ò vùtɛ gwe.
3 Ò pìkↄ̃nɛ: Ò gɛ́ ò kúnku bo ò kpáta manamana. Kúnkumɛ ń gbɛ̀ ũ, ↄ̀daamɛ ń simiti ũ.
4 Akũ ò pì: Ò wɛ́ra kátɛ ò kpɛ́didikↄ̃ana bo a mìsↄ̃ntɛ zↄ̃ ludambɛa. Ò ó zĩda tↄ́ bo de òsungↄ̃ fãkↄ̃ana dodo andunia gũnlo yãi.
5 Akũ Dikiri kìpa à wɛ́ra pìi gwà kũ kpɛ́ lei kũ bisãsirinↄ bòoo.
6 Akũ à pì: Ń pínki ń buri dokↄ̃nↄmɛ, yã dokↄ̃nↄn òdi o, akũ yã kũ òtɛn boon dí yá? Yã kũ ò a laasun lɛ̀ tera sà oni kɛmɛ, pↄ́ke ni kpáńnɛ a kɛnaa gũn doro.
7 Ò kipa ò gɛ́ gwe ò ń yã yãkatɛńnɛ de òsun kↄ̃ yã ma doro.
8 Akũ Dikiri ń fãkↄ̃a gwe dodo andunia gũn pínki, akũ ò ń wɛ́ra katɛnaa tò.
9 A yã mɛ́ à tò, ò tↄ́ kpà wɛ̃tɛ pìinɛ Babɛli, zaakũ gwen Dikiri tò andunia buri sĩnda pínki yã bòn. Zaa gwen à ń fãkↄ̃a andunia gũn pínki.
10 Sɛmu burinↄ yãn dí. Sɛmu wɛ̃̀ basↄↄrode gũn à Apasada ì ídana anduniala gbɛra wɛ̃̀ pla.
11 A gbɛra à kɛ̀ wɛ̃̀ wàa pla kpɛ́ basↄↄro à nɛ́ pãndenↄ ì dↄ gↄ̃gbɛ̃nↄ kũ nↄgbɛ̃nↄo.
12 Apasada wɛ̃̀ baraakuri awɛɛsↄↄrode gũn à Sela ì.
13 A gbɛra à kɛ̀ wɛ̃̀ wàa pla kũ aakↄ̃o à nɛ́ pãndenↄ ì dↄ gↄ̃gbɛ̃nↄ kũ nↄgbɛ̃nↄo.
14 Sela wɛ̃̀ baraakuride gũn à Eberu ì.
15 A gbɛra à kɛ̀ wɛ̃̀ wàa pla kũ aakↄ̃o à nɛ́ pãndenↄ ì dↄ gↄ̃gbɛ̃nↄ kũ nↄgbɛ̃nↄo.
16 Eberu wɛ̃̀ baraakuri awɛɛsiikↄ̃de gũn à Pɛlɛgi ì.
17 A gbɛra à kɛ̀ wɛ̃̀ wàa pla kũ baraakurio à nɛ́ pãndenↄ ì dↄ gↄ̃gbɛ̃nↄ kũ nↄgbɛ̃nↄo.
18 Pɛlɛgi wɛ̃̀ baraakuride gũn à Rɛu ì.
19 A gbɛra à kɛ̀ wɛ̃̀ wàa do awɛɛkɛ̃ndo à nɛ́ pãndenↄ ì dↄ gↄ̃gbɛ̃nↄ kũ nↄgbɛ̃nↄo.
20 Rɛu wɛ̃̀ baraakuri awɛɛplade gũn à Serugu ì.
21 A gbɛra à kɛ̀ wɛ̃̀ wàa do awɛɛsuppla à nɛ́ pãndenↄ ì dↄ gↄ̃gbɛ̃nↄ kũ nↄgbɛ̃nↄo.
22 Serugu wɛ̃̀ baraakuride gũn à Nao ì.
23 A gbɛra à kɛ̀ wɛ̃̀ wàa do à nɛ́ pãndenↄ ì dↄ gↄ̃gbɛ̃nↄ kũ nↄgbɛ̃nↄo.
24 Nao wɛ̃̀ baraakuri donsaride gũn à Tera ì.
25 A gbɛra à kɛ̀ wɛ̃̀ basuddo donsari à nɛ́ pãndenↄ ì dↄ gↄ̃gbɛ̃nↄ kũ nↄgbɛ̃nↄo.
26 Tera kɛ̀ wɛ̃̀ baaakↄ̃ akuri, akũ à Abramu kũ Nao kũ Aranao ì.
27 Tera burinↄ yãn dí. Tera Abramu kũ Nao kũ Aranao ì, akũ Arana Lutu ì.
28 Arana gà a de Tera wára zaa Urumɛ Kaladia bùsun, gu kũ ò a ìn.
29 Abramu kũ Nao nↄ sɛ̀. Abramu nanↄ tↄ́n Sarai, Nao nanↄ sↄ̃ tↄ́n Milika, Arana nɛ́. Arana pì mɛ́ à Isika ì dↄ.
30 Sarai sↄ̃ paramɛ, adi nɛ́ iro.
31 Akũ Tera a nɛ́ Abramu kũ a daikore Lutuo kũ Abramu nanↄ Saraio sɛ̀ bona Uru, Kaladia bùsun, òtɛn gɛ́ Kanaanↄ bùsun. Kũ ò kà Arana, ò vùtɛ gwe.
32 Tera wɛ̃̀ wàa do awɛɛsↄↄrode gũnn à gà zaa Arana.