BONAA 4
SIM1 Musa wèa à pì: Tó odi ma náani kɛro, akũ odi ma yã maro, tó ò pì mↄkↄ̃n mɛ́ n bo n sumaro sↄ̃ bi?
2 Akũ Dikiri a là à pì: Bↄ́n ń kũna gwee? À wèa à pì: Gòomɛ.
3 Dikiri pìnɛ: Ǹ gòo pì pãtɛ zĩtɛ. Kũ à pã̀tɛ, akũ à lì mlɛ̃̀ ũ, akũ Musa a zĩda gà gwe.
4 Dikiri pìnɛ: Ǹ ↄ bo ǹ a kũ a vlãa. Kũ à kũ̀, akũ à ɛ̀ra à lì gò ũ a ↄĩ.
5 Dikiri pìnɛ: Lɛn ĩni kɛ lɛ, de ò sí kũ makũ Dikiri ń dizinↄ Ibrahĩ kũ Isaakuo kũ Yakubuo Luda mɛ́ à bò à sùmma.
6 Dikiri ɛ̀ra à pìnɛ dↄ: Ǹ n ↄ sↄtↄ n utan. Akũ à sↄ̀tↄn. Kũ à bò, à è a ↄ lì kusu ũ, à kɛ̀ púu lán buu bà.
7 Dikiri pìnɛ: Ǹ ɛra ǹ n ↄ sↄtↄ n utan. À ɛ̀ra à sↄ̀tↄn. Kũ à bò, à è à kɛ̀ a gbɛ̀n.
8 Dikiri pìnɛ: Tó odi n náani kɛ ò sèeda káaku sìro, ò kpɛkpɛ pↄ́ sí.
9 Tó odi sèeda pla pìnↄ sí ò n yã mà sↄ̃ro, ǹ Nili í tↄ́ ǹ kↄ́tɛ zĩtɛ, ani li aru ũ.
10 Akũ Musa pìnɛ: N yã nna Dikiri! Zaa zĩ yã'onaa araga kũmaoro. Bee zaa gↄrↄ kũ n yã òmɛnɛ, ma lɛ́ tìkisimɛ.
11 Akũ Dikiri pìnɛ: Dí mɛ́ à lɛ́ dↄ̀ bisãsirinɛɛ? Dí mɛ́ àdi a nɛ́nɛ natɛ ke àdi a sãto kũu? Dí mɛ́ àdi tó à gu e ke àdi a vĩ̀na kũu? Makũ Dikiri, makũroo?
12 Ǹ gɛ́! Mani kpányĩ kũ yã'onaao, mani yã kũ ĩni o dannɛ.
13 Akũ à pì: N yã nna Dikiri! N yã nna! Ǹ gbɛ̃ pãnde zĩ.
14 Akũ Dikiri pↄ fɛ̃̀ kũ Musao à pì: N vĩ̀ni Haruna Levi buri kunloo? Má dↄ̃ kũ yã'ona zĩ'ũ kãaoro. Àtɛn su danlɛ. Tó á wɛ́ kɛ̀ pla, a pↄ ni kɛ nna.
15 Ǹ yã o kãao ǹ yã kũ ani o danɛ. Makũ, manigↄ̃ kpái kũ yã'onaao, manigↄ̃ yã kũ áni kɛ daárɛ.
16 Ani yã o gbɛ̃nↄnɛ n gɛ̃nɛ ũ, anigↄ̃ de n lɛ́gbɛkpari ũ, ĩnigↄ̃ denɛ lán Luda bà.
17 Ǹ gò dí sɛ́ ǹgↄ̃ kũna ǹ sèedanↄ kɛo.
18 Musa tà a anzure Yɛtoro kĩnaa à pìnɛ: Ǹ ma gba zɛ́ mà tá ma gbɛ̃nↄ kĩnaa Misila, mà e tó ò kpɛ́ kú kũ wɛ̃̀ndiio ari tera. Yɛtoro pìnɛ: Ǹ kipa aafia.
19 À sù à lè Dikiri ò Musanɛ Midiã bùsun à pì: Ǹ futɛ ǹ tá Misila, zaakũ gbɛ̃ kũ òtɛni n wɛtɛ ò n dɛ yãnↄ gàga ń pínki.
20 Akũ Musa a nanↄ sɛ̀ kũ a nɛ́gↄ̃gbɛ̃nↄ à ń dí zaakia, à ɛ̀ra àtɛn tá Misila à Luda gòo pì kũna.
21 Akũ Dikiri pìnɛ: Tó n ka Misila, ǹ daboyã kũ ma a gbãna kpàmmanↄ kɛ Firi'auna arɛ pínki. Ama mani a kùgbãna kũ, ani gí gbɛ̃nↄ gbarɛi.
22 Ǹ onɛ makũ Dikiri ma pì, Isaraila burimɛ ma daudu ũ,
23 akũ ma pìnɛ à ma daudu gbarɛ à gɛ́ donyĩ kɛmɛnɛ. Lákũ à gì a gbarɛi nà, mani a daudu dɛ sà.
24 Zɛ́ gũn Musa tɛn i gukea, akũ Dikiri a lè gwe à ye à a dɛ.
25 Akũ Zipora gbɛ̀ fɛ̃nɛ sɛ̀ à a nɛ́ tↄ̃̀ↄ zↄ̃̀o à a gyↄfↄrↄ nà Musa gbáa à pì: Yãpuramɛ, ń demɛnɛ gↄ̃ arude ũ.
26 Tↄ̃̀zↄ̃na bire yãin à pìnɛ gↄ̃ arude. Akũ Dikiri Musa tò.
27 Dikiri pì Harunanɛ: Ǹ gɛ́ da Musalɛ gbárannan. Akũ à gɛ̀ɛ à a lè Luda kpi kĩnaa, à lɛ́ pɛ̀a.
28 Musa yã kũ Dikiri a zĩ à o bàba Harunanɛ kũ sèeda kũ à pìnɛ à kɛnↄ.
29 Akũ Musa kũ Harunao tà Misila ò Isaraila gbɛ̃ zↄ̃kↄ̃nↄ kàkara.
30 Haruna yã kũ Dikiri ò Musanɛ bàbańnɛ ń pínki, akũ Musa daboyã pìnↄ kɛ̀ Isarailanↄ wára.
31 Ò yã pìi sì. Kũ ò mà Dikiri mɛ́ à sù ń gwa à ń yã'ũmmanaa è, akũ ò kùtɛ ò donyĩ kɛ̀nɛ.