1 SAMUƐLI 3

SIM

‹ Chapter 2 1 SAMUƐLI — All Chapters Chapter 4 ›

¹ Nɛ́gↄ̃gbɛ̃ Samuɛli tɛn zĩ kɛ Dikirinɛ Ɛli ↄĩ. Gↄrↄ birea Dikiri yã dì su gbɛ̃a likalikaro, akũ wɛ́gupu'ena kun dasiro.

² Zĩkea Ɛli wutɛna a wútɛkia. A wɛ́ bùsa, àtɛn gu e manamana doro.

³ Samuɛli wutɛna Dikiri kpɛ́n, gu kũ Luda àkpati kunwa. Luda fitila dí ga kↄ̀ro.

⁴ Akũ Dikiri lɛ́ zù Samuɛlii. À wèa à pì: Makũ dí!

⁵ Akũ à bàa lɛ̀ à gɛ̀ɛ Ɛli kĩnaa à pì: N lɛ́ zùmain yá? Ma su. Akũ à pìnɛ: Mádi lɛ́ zunyĩro. Ǹ gɛ́ wútɛ. Akũ à ɛ̀ra à gɛ̀ɛ à wùtɛ.

⁶ Dikiri ɛ̀ra à lɛ́ zùi dↄ, akũ à ɛ̀ra à gɛ̀ɛ Ɛli kĩnaa à pì: N lɛ́ zùmain yá? Ma su. Akũ à pì: Ma nɛ́, mádi lɛ́ zunyĩro. Ǹ gɛ́ wútɛ.

⁷ Samuɛli sↄ̃ à Dikiri dↄ̃ gĩaro, Dikiri yã dí sua yã kↄ̀ro.

⁸ Dikiri ɛ̀ra à lɛ́ zùi a gɛ̃̀n aakↄ̃de, akũ à fùtɛ à gɛ̀ɛ Ɛli kĩnaa dↄ à pì: N lɛ́ zùmain yá? Ma su. Akũ Ɛli dↄ̃̀ sà kũ Dikiri mɛ́ àtɛn lɛ́ zu kɛfɛnna pìii.

⁹ Akũ à pìnɛ: Ǹ gɛ́ wútɛ. Tó à lɛ́ zùnyĩ sà, ǹ pi: Ǹ yã o Dikiri, n zↄ̀bleri sã dↄ. Akũ Samuɛli gɛ̀ɛ à wùtɛ a wútɛkia.

¹⁰ Dikiri sù à zɛ̀ gwe, à lɛ́ zùi lákũ à kɛ̀ yã nà à pì: Samuɛli! Samuɛli! Akũ Samuɛli pì: Ǹ yã o Dikiri, makũ n zↄ̀bleri ma sã dↄ.

¹¹ Akũ Dikiri pìnɛ: Ǹ ma! Mani yã kɛ Isarailanↄ tɛ́, gbɛ̃ kũ à a baaruu mà ni kɛkɛ à sã wɛ̃mɛ.

¹² Gↄrↄ birea mani àlesi kũ ma dↄ̀ Ɛli bedenↄa kɛ pínki zaa a naanaa ari a mìdɛnaaa.

¹³ Ma pìnɛ mani tó yã gↄ̃ wí a bedenↄ musu ari gↄrↄ sĩnda pínki yã vãni kũ à a yã dↄ̃ yãi. A nɛ́nↄ ń zĩda kpe bò, akũ adi gíńnɛro.

¹⁴ Abire yãi ma la dà Ɛli bedenↄ yã musu ma pì: Sa'ona ke gbadana ni Ɛli bedenↄ taari kɛ̃ḿma zikiro.

¹⁵ Samuɛli wùtɛ ari gu dↄ̀, akũ à Dikiri kpɛ́ gbànↄ wɛ̃̀wɛ̃. À wɛ́gupu kũ à è ona Ɛlinɛ vĩna vĩ.

¹⁶ Akũ Ɛli a sìsi à pì: Samuɛli ma nɛ́! À wèa à pì: Makũ dí!

¹⁷ Akũ à a là à pì: À pìnnɛ deraa? Ǹsun yã pì utɛmɛnɛro. Tó n yã kũ à ònnɛ ke ùtɛmɛnɛ, Luda yã kɛnnɛ pãsĩpãsĩ.

¹⁸ Akũ Samuɛli yã pìi bàbanɛ pínki, adi a ke utɛnɛro. Akũ Ɛli pì: Dikirimɛ a ũ. Lákũ à kɛ̀nɛ mana nà à kɛ.

¹⁹ Samuɛli tɛn zↄ̃kↄ̃ kũ, akũsↄ̃ Dikiri kú kãao. Adi tó yã kũ à òo lɛ̀tɛ pãro.

²⁰ Akũ Isaraila kũ ò kú zaa Dã ari Bɛsɛbanↄ dↄ̃̀ ń pínki sà kũ Samuɛli bi Dikiri annabiimɛ yãpura.

²¹ Dikiri dìgↄ̃ bo àgↄ̃ su Samuɛlia Silo, gu kũ à a zĩda mↄ̀nɛn káaku. Àdi yã onɛ, akũ Isarailanↄ tɛni a yã ma ń pínki.

‹ Chapter 2 1 SAMUƐLI — All Chapters Chapter 4 ›

1 SAMUƐLI 3

Cite / Share This Page