Yobu 34

SIM

¹ Ɛlihu pɛ̀ a yã́lɛ à mɛ̀:

² Á ↄ̃nↄnaↄ, à ma yãma! Á yãdↄ̃naↄ, à swã́kpa à ma!

³ Asa swã́ ì yã́ dↄ̃kↄ̃ɛ, lá lɛ́ ì blɛ dↄ̃kↄ̃ɛwaɛ.

⁴ Wà zɛ ń yã́zɛdeo, wíↄ yãmaa dↄ̃ wá zãnguo.

⁵ Yobu lɛ́ mɛ á tàae vĩo, ↄ̃ Lua lɛ́ gí a yãnakpáiwà.

⁶ À mɛ̀ ń a yã́ nao, Lua lɛ́ a dilɛ ɛɛde ũɛ, ń a tàaesaidekɛo a bↄá fↄ̃naɛ.

⁷ Démɛ kú lán Yobuwa dↄ́ɛa ń Luao ìↄ dɛ aà imia ũi?

⁸ À gbɛ̃kpà ń duunkɛnaↄ, à bɛ̀bɛ ń vãikɛnaↄ.

⁹ Asa ì mɛ̀ gbɛ̃́ wɛɛlɛa a yã́ ká Luagu ài vĩo.

¹⁰ Á nↄ̀sɛdeↄ, à ma yãma! Yãdↄↄsai i kↄ̃'e ń Luaoo, Gbãapiide lí yãvãikɛo.

¹¹ Ì fĩabo baadeɛ a yãkɛawaɛ, gbɛ̃́pii zĩa yã́ ↄ̃ ì wiɛ̀ a musu.

¹² Lua lí yãdↄↄsai kɛo fá! Gbãapiide lí yã́zɛde fuangbao.

¹³ Démɛ aà dìlɛ dṹnia kía ũi? Démɛ dṹnia bṹu nàɛ̀ aà ↄzĩi?

¹⁴ Tó à zɛ̀ò à nisĩna ń ĩ́an wɛ̃nideo si baadewa,

¹⁵ gbɛ̃́pii a gaga gↄ̃̀ↄɛ, gbɛ̃nazĩna i ɛa gɛ̃ tíu.

¹⁶ Yobu, tó n ↄ̃nↄ kà, yã́ɛ bee ma, swã́sɛ ma yã́i.

¹⁷ Gbɛ̃́ pↄ́ ye yã́zɛdeio a kɛ dↄaana ũe? Lua zↄ̃ↄ mɛ́ a maa, ↄ̃ ńyↄ̃ yãdaaàlaa?

¹⁸ Luapi ì o kíaↄnɛ, pↄ́ giaↄ, ì o kíabuiↄnɛ, gbɛ̃vãiↄ.

¹⁹ Ìli kíaↄ dilɛ ńdoao, ìli zɛ ń ↄdeↄ à bↄ̀ taasideↄ kpɛo, asa ampiiá aà pↄkɛaↄnɛ.

²⁰ Aaì gaga kã́ndo wɛɛdo, aaì gbãsĩlɛ aa gɛ̃zɛa, zɛdeↄ ì ã́nuato gbɛ̃nazĩna ↄ sai.

²¹ Lua ì wɛ́tɛ gbɛ̃nazĩnaↄ yãkɛai, lá aalɛ gbásɛ, ìↄ e píiɛ.

²² Gusia ge gusisie ku kɛ́ vãikɛna ulɛuɛ̀o.

²³ Lua lí gbɛ̃́ lala yã́i à gbasa yãdaaàlao.

²⁴ Ì zɛdeↄ wíwi yã́gↄ̃gↄ̃ańnↄ sai, ↄ̃ ì gbɛ̃pãleↄ dilɛ ń gbɛu.

²⁵ Kɛ́ ìↄ ń yãkɛaↄ e yã́i, ì ń fuangba gwãasĩna à ń wíwi.

²⁶ Ì ń wɛtã ń vãi yã́i gupuau,

²⁷ kɛ́ aa bↄ̀ aà yã́ kpɛ, aai laaidↄ aà yã́wao yã́i.

²⁸ Aa tò pↄesaideↄ wii Lua lè, ↄ̃ à wɛ̃nadepiↄ wii mà.

²⁹ Lua nílɛa kpɛ̃́, démɛ a fↄ̃ aà tàae ei? À azĩa kpàgui, démɛ a bↄwài? A iko vĩ bui píiwa ń baadeo,

³⁰ kɛ́ luayãdansai su kpalable, i kↄ̃nikɛ gbɛ̃́ↄnɛo yã́i.

³¹ Tó gbɛ̃́ ò Luaɛ tàaeden a ũ, á yãdↄↄsai kɛ lↄo,

³² yã́ pↄ́ á dↄ̃o Lua dadaɛ, tó a duunakɛ̀ yãaɛ, á kɛ lↄo.

³³ Lua a ĩadawà yã̀? N Lua tàae è, ń è kpelewa ni? Lá ńlɛ e, o, n yã́ɛ, i kɛ mámɛo.

³⁴ Nↄ̀sɛdeↄ òmɛɛ, ↄ̃nↄna pↄ́ aa ma yãmàↄ mɛ̀,

³⁵ Yobu lɛ́ yã́ pↄ́ á dↄ̃o o, aà yã'oa dↄ̀ↄ vĩo.

³⁶ Yobu ĩadama aↄ gɛɛ, asa àlɛ yã́zãsi lán gbɛ̃vãiwaɛ.

³⁷ Àlɛ tàae kã́fĩ duunaa, àlɛ ↄtaalɛ wá guu, àlɛ lɛnakasa Luaɛ.