གསུང༌མགུར། 139

¹ ༼དབུ་མཛད་ལ་སྤྲད་པའི་དཱ་བིད་ཀྱི་མགུར༌མ།༽ ཡ་ཝཱེ་ཁྱེད་ཀྱིས་ང་ལ་བརྟགས་ཤིང༌མཁྱེན།།

² ང་རང་ལངས་དུས་འདུག་དུས་ཁྱེད་ཀྱིས༌མཁྱེན། །ང་ཡི་བསམ་ཚུལ་ཁྱེད་ཀྱིས་རྒྱང་ནས༌མཁྱེན།།

³ ལམ་དུ་འགྲོ་བ་དང་ནི་མར་ཉལ༌བ། །ཁྱེད་ཀྱིས་དེ་ཀུན་ཞིབ་ཏུ་གཟིགས་པ༌དང༌། །ང་ཡིས་ཅི་བྱས་ཚང་མ་ཁྱེད་ཀྱིས༌མཁྱེན།།

⁴ ཀྱེ་ཀྱེ་ཡ་ཝཱེ་ང་ཡི་ལྕེའི་སྟེང༌དུ། །ཁྱེད་ཀྱིས་མི་མཁྱེན་ཚིག་རྡོག་གཅིག་ཀྱང༌མེད།།

⁵ ཁྱེད་ཀྱིས་ང་རང་མདུན་རྒྱབ་གཉིས་ནས༌བསྐོར། །ཁྱེད་ཀྱི་ཕྱག་ནི་བདག་གི་སྟེང་དུ༌ཡོད།།

⁶ འདི་འདྲའི་ཤེས་རིག་ང་ཡིས་དཔག་ཐབས༌བྲལ། །བླ་ན་མཐོ་བས་ངས་དེར་སྙོབ་པར༌དཀའ།།

⁷ ཁྱེད་ཀྱི་ཐུགས་ཉིད་ལས་བདག་གང་དུ༌འགྲོ། །ཁྱེད་ཀྱི་དྲུང་ནས་ང་རང་གང་དུ༌འབྲོ།།

⁸ ནམ་མཁར་འཛེགས་ན་ཁྱེད་ཉིད་དེར་བཞུགས༌ཤིང༌། །གལ་ཏེ་གཤིན་པོའི་ཡུལ་དུ་མལ་བཅོས༌ཀྱང༌། །ཁྱེད་ཉིད་དེ་ག་རུ་ཡང་བཞུགས་པ༌ལགས།།

⁹ ཐོ་རངས་བདག་གིས་གཤོག་ཟུང་བརྐྱངས་ནས༌ནི། །རྒྱ་མཚོའི་ཕ་མཐར་འཕུར་ཏེ་བསྡད་ན༌ཡང༌།།

¹⁰ དེར་ཡང་ཁྱེད་ཀྱི་ཕྱག་གིས་ལམ་སྣ༌འདྲེན། །ཁྱེད་ཕྱག་གཡས་པས་ང་རང་སྐྱོར་བྱེད༌དོ།།

¹¹ མུན་པས་ང་རང་ཡོངས་སུ་སྦ་བར༌ཤོག །ཕྱོགས་བཞིའི་འོད་ཀྱང་མཚན་མོར་འགྱུར་སྨྲ༌ཡང༌།།

¹² ཁྱེད་ལ་མུན་པ་མུན་པར་མི་སྣང༌ཞིང༌། །མཚན་མོས་ཉིན་མོ་ནང་བཞིན་འོད་སྣང༌སྤྲོ། །ཁྱེད་དྲུང་འོད་དང་མུན་པ་ཁྱད་མེད༌ཡིན།།

¹³ བདག་གི་སེམས་ཁོང་ཁྱེད་ཀྱིས་མཛད་པ༌དང༌། །མ་ཡི་མངལ་ནང་ཁྱེད་ཀྱིས་ང་རང༌སྦྲེལ།།

¹⁴ ངོ་མཚར་འཇིགས་རུང་ལམ་ནས་ང་མཛད༌པས། །བདག་གིས་ཁྱེད་ལ་གཏང་རག་འབུལ་བར༌བྱ། །ཁྱེད་ཀྱི་མཛད་པ་ཤིན་ཏུ་ངོ་མཚར༌ཆེ། །ང་ཡི་སེམས་ཀྱིས་དེ་རྣམས་ལེགས་པར༌ཤེས།།

¹⁵ ང་རང་ལྐོག་གྱུར་གནས་སུ་བཟོས་པ༌དང༌། །ས་ཡི་གཏིང་ནས་མཉམ་དུ་སྦྲེལ་བའི༌ཚེ། །ང་ཡི་གཟུགས་རིས་ཁྱེད་ལ་སྦས་མ༌ཡིན།།

¹⁶ ང་རང་གཟུགས་སུ་མ་གྲུབ་སྔོན་རོལ༌དུ། །ཁྱེད་ཀྱི་སྤྱན་གྱིས་སྔར་ནས་གཟིགས་པ༌དང༌། །ཁྱེད་ཀྱིས་ཐུགས་ཐག་བཅད་པའི་ཚེ་ཚད༌ལས། །བདག་གིས་ད་དུང་ཉིན་གཅིག་མ་རོལ༌གོང༌། །ཐམས་ཅད་ཁྱེད་ཀྱི་ཕྱག་དཔེའི་ནང་དུ༌བཀོད།།

¹⁷ ཀྱེ་ཀྱེ་དཀོན་མཆོག་ཁྱེད་ཀྱི་བཞེད་དགོངས༌རྣམས། །བདག་གི་ཕྱིར་དུ་ཅི་འདྲའི་རིན་ཐང༌ཆེ། །དེ་རྣམས་བསྡོམས་གྲངས་གང་འདྲ་འབོར་ཆེ༌ཨང༌།།

¹⁸ རྩིས་གྲངས་བླངས་ན་བྱེ་མ་ལས་ཀྱང༌མང༌། །གཉིད་ལས་སད་དུས་ད་དུང་ཁྱེད་མཉམ༌གནས།།

¹⁹ ཀྱེ་ཀྱེ་དཀོན་མཆོག་མི་ངན་གསོད་གྱུར༌ཅིག །ལག་དམར་ཁྱོད་རྣམས་ང་དང་འབྲལ་བར༌གྱིས།།

²⁰ དེ་ཚོས་ཁྱེད་ལ་རྒོལ་བའི་ཚིག་ངན༌ལབ། །ཁྱེད་ཀྱི་དགྲ་བོས་ཁྱེད་མཚན་དོན་མེད༌བརྗོད།།

²¹ ཡ་ཝཱེ་ཁྱེད་ལ་སྡང་བའི་མི་རྣམས༌ལ། །ང་རང་ཡང་ནི་སྡང་བར་མི་འགྱུར༌རམ། །ཀྱེ་མ་ཁྱེད་ལ་རྒོལ་བའི་མི་རྣམས༌ལ། །ང་རང་ཞེན་ཁ་ལོག་པ་མ་ཡིན༌ནམ།།

²² ང་རང་དེ་ཚོར་ཞེ་འཁོན་སྙིང་ནས༌སྐྱེ། །བདག་གིས་དེ་རྣམས་དགྲ་རུ་རྩི་བྱེད༌དོ།།

²³ ཀྱེ་ཀྱེ་དཀོན་མཆོག་ང་ལ་བརྟགས་ནས༌ནི། །ང་ཡི་སེམས་པ་མཁྱེན་པར་མཛོད་ཅིག༌ཀྱེ། །ང་ལ་དཔྱད་ནས་བསམ་ཚུལ་མཁྱེན་པར༌མཛོད།།

²⁴ ངའི་ནང་སྤྱོད་ངན་ཡོད་མེད་གཟིགས་ནས༌ནི། །གཏན་གྱི་ལམ་ནང་ང་རང་འཁྲིད་པར༌མཛོད།།