གསུང༌མགུར། 104

¹ ཀྱེ་ཀྱེ་ང་ཡི་སེམས་ཀྱིས་ཡ་ཝཱེར༌བསྟོད། །ང་ཡི་དཀོན་མཆོག་ཡ་ཝཱེ་ཤིན་ཏུ༌ཆེ། །ཁྱེད་ཀྱིས་དཔལ་དང་གཟི་བྱིན་ན་བཟའ་གསོལ།།

² འོད་ཟེར་ན་བཟའ་བཞིན་དུ་གསོལ་བ༌དང༌། །ནམ་མཁའི་དབྱིངས་རྣམས་གུར་བཞིན་ཐར་བརྐྱངས༌སོ།།

³ སྟེང་ཁང་རྣམས་ཀྱི་གདུང་མ་ཆུ་སྟེང༌འཛུགས། །གནམ་གྱི་ཆུ་འཛིན་ཉིད་ཀྱི་ཤིང་རྟར༌མཛད། །རླུང་གི་འདབ་གཤོག་རྣམས་ཀྱི་སྟེང་ནས༌ཕེབས།།

⁴ ཁོང་གིས་རླུང་རྣམས་ཉིད་ཀྱི་ཕོ་ཉར༌མཛད། །མེ་ལྕེ་ཉིད་ཀྱི་ཞབས་ཕྱིར་མཛད་པ༌འོ།།

⁵ གཞི་གདན་སྟེང་དུ་ས་གཞི་བཞག་ནས༌ནི། །དེ་ནི་གཏན་དུ་གཡོ་བ་མེད་པར༌མཛད།།

⁶ གཏིང་ཟབ་ཆུ་ཡིས་ས་གཞི་གོས་ལྟར༌གཡོགས། །ཆུ་རྣམས་རི་རྩེ་དག་ལས་བརྒལ་བར༌གྱུར།།

⁷ ཁྱེད་ཀྱིས་བཀའ་བཀྱོན་གནང་བས་ཆུ་རྣམས༌བྲོས། །ཉིད་ཀྱི་འབྲུག་སྒྲ་དབང་གིས་ཆུ་རྣམས༌བྱོལ།།

⁸ རི་རྣམས་འབུར་ཞིང་ལུང་པ་བརྡིབས་ནས༌ནི། །ཁྱེད་ཀྱིས་བཤམས་པའི་གནས་སུ་སླེབས་པ༌ཡིན།།

⁹ ཆུ་རྣམས་ཕར་ལ་བརྒལ་ནས་ས་གཞི༌ནི། །འགེབ་པར་མི་བྱ་ཆེད་དུ་ས་མཚམས༌བཅད།།

¹⁰ ཡ་ཝཱེས་གྲོག་མོར་ཆུ་མིག་འབབ་བཅུག༌ཅིང༌། །དེ་རྣམས་རི་བོའི་གསེབ་ནས་བཞུར་བར༌མཛད།།

¹¹ ཐང་གི་རི་དྭགས་རྣམས་ཀྱིས་དེ་འཐུང༌ཞིང༌། །རྐྱང་གིས་རང་གི་སྐོམ་པ་དེ་ཡིས༌སེལ།།

¹² དེ་ཡི་ཉེ་འཁོར་ནམ་མཁའི་བྱ་རྣམས༌གནས། །ཡལ་གའི་གསེབ་ནས་དེ་དག་མགུར་མ༌ལེན།།

¹³ སྟེང་ཁང་རྣམས་ནས་རི་ལ་ཆུ་གཏོང༌ཞིང༌། །ཁོང་གི་མཛད་པའི་འབྲས་བུས་ས་གཞི༌ཚིམས།།

¹⁴ ཕྱུགས་ཀྱི་ཕྱིར་དུ་རྩྭ་སྔོན་སྐྱེས་པར༌མཛད། །མི་ཡིས་སྤྱོད་ཕྱིར་སྔོ་ཚོད་བསྐྱེད་ནས༌ནི། །ས་ནས་མི་ལ་ཁ་ཟས་འཐོབ་པ༌དང༌།།

¹⁵ མི་སེམས་དགའ་བར་བྱེད་པའི་རྒུན་ཆང༌དང༌། །གདོང་ལ་འོད་མདངས་སྦྱིན་པའི་སྣུམ་རྩི༌དང༌། །ལུས་ཤུགས་བསྐྱེད་པའི་འབྲུ་རིགས་ཐོབ་པར༌མཛད།།

¹⁶ ཡ་ཝཱེས་བཙུགས་པའི་ཡིད་འོང་ཤིང་སྡོང༌སྟེ། །ལེ་པཱ་ནོན་གྱི་ཐང་ཤིང་ཚིམ་པར༌མཛད།།

¹⁷ འདབ་ཆགས་བྱ་ཡིས་དེའི་སྟེང་ཚང་བཟོ༌ཞིང༌། །ཁྲུང་ཁྲུང་དཀར་མོའི་ཚང་ནི་གསོམ་ཤིང༌ཡིན།།

¹⁸ རི་བོ་མཐོན་པོ་གནའ་ཡི་གནས་གཞི༌ཡིན། །བྲག་རྣམས་འཕྱི་བ་དག་གི་སྐྱབས་གནས༌ཡིན།།

¹⁹ དུས་ཚིགས་འབྱེད་ཕྱིར་ཁྱེད་ཀྱིས་ཟླ་བ༌བཞག །ཉི་མས་ནམ་ཞིག་ནུབ་དགོས་ཤེས་པ༌ཡིན།།

²⁰ ཁྱེད་ཀྱིས་མུན་པ་མཛད་པས་མཚན་མོར༌གྲུབ། །ནགས་ཀྱི་རི་དྭགས་ཐམས་ཅད་ཕྱི་རུ༌ཐོན།།

²¹ སེང་གེས་ང་རོ་དང་བཅས་བརྔོན་ཤ༌འཚོལ། །དཀོན་མཆོག་ལས་ནི་རང་ལ་ཁ་ཟས༌སློང༌།།

²² ཉི་མ་ཤར་བ་ཙམ་གྱིས་དེ་རྣམས༌ནི། །རང་གི་ཚང་ལ་ཡིབས་ནས་ཉལ་བ༌ཡིན།།

²³ མི་ནི་ལས་ཀ་བྱེད་དུ་ཕྱི་རོལ༌ཐོན། །དགོང་མོའི་བར་དུ་ངལ་ལས་བྱེད་པ༌ཡིན།།

²⁴ ཡ་ཝཱེ་ཁྱེད་ཀྱི་འཕྲིན་ལས་ཇི་ལྟར༌མང༌། །ཁྱེད་ཀྱིས་དེ་ཀུན་ཤེས་རབ་ལམ་ནས༌བཀོད། །ས་གཞི་ཡོངས་ལ་ཁྱེད་ཀྱི་བཀོད་པས༌ཁེངས།།

²⁵ ཡངས་ཤིང་ཆེ་བའི་རྒྱ་མཚོ་ཕ་རོལ་གནས། །སྲོག་ཆགས་ཆེ་ཆུང་གྲངས་མེད་འཕྱོ་བར༌བྱེད།།

²⁶ དེ་རུ་གྲུ་གཟིངས་ཕར་འགྲོ་ཚུར་འོང༌བྱེད། །ཁྱེད་ཀྱིས་བཀོད་པའི་ཆུ་སྲིན་དེ་རུ༌རྩེ།།

²⁷ དུས་ཐོག་ཁྱེད་ཀྱིས་ཁ་ཟས་གནང་བའི༌ཆེད། །དེ་རྣམས་ཀུན་གྱིས་ཁྱེད་ལ་སྒུག་བྱེད༌དོ།།

²⁸ ཁྱེད་ཀྱིས་ཅི་གནང་དེ་ཚོས་སྡུད་པ༌དང༌། །ཁྱེད་ཕྱག་ཕྱེས་པར་དེ་རྣམས་བཟང་པོས༌ཚིམས།།

²⁹ ཁྱེད་ཀྱི་ཞལ་རས་སྦ་དུས་དེ་རྣམས༌དངངས། །ཁྱེད་ཀྱིས་དེ་ཚོའི་དབུགས་ནི་འཁྱེར་མཛད༌པས། །དེ་རྣམས་འཆི་ཞིང་སླར་ཡང་རྡུལ་དུ༌འགྱུར།།

³⁰ ཁྱེད་ཀྱིས་ཐུགས་ཉིད་མངགས་ཤིང་དེ་རྣམས༌བཀོད། །ས་གཞིའི་ངོས་ནི་ཡང་བསྐྱར་གསར་དུ༌བསྒྱུར།།

³¹ ཡ་ཝཱེའི་གཟི་བྱིན་གཏན་དུ་གནས་པར༌ཤོག །ཡ་ཝཱེ་ཉིད་ཀྱི་མཛད་པར་དགྱེས་གྱུར༌ཅིག།

³² ཁོང་གིས་ས་གཞིར་གཟིགས་པས་ས་གཞི༌འདར། །རི་བོར་རེག་པས་རི་ལས་དུ་བ༌འཕྱུར།།

³³ བདག་གིས་ཚེ་གང་ཡ་ཝཱེར་མགུར་མ༌ལེན། །གསོན་པའི་རིང་ལ་ང་ཡི་དཀོན་མཆོག༌བསྟོད།།

³⁴ ང་ཡི་བསམ་བློར་ཁོང་ཉིད་མཉེས་པར༌ཤོག །ཡ་ཝཱེའི་ནང་དུ་ང་རང་དགའ་མགུ༌རངས།།

³⁵ སྡིག་ཅན་མི་རྣམས་ས་ནས་ཡལ་བ༌དང༌། །སྡིག་སྤྱོད་ཅན་རྣམས་རྩ་མེད་འགྲོ་བར༌ཤོག །ཀྱེ་ཀྱེ་ང་ཡི་སེམས་ཀྱིས་ཡ་ཝཱེར༌བསྟོད། །ཡ་ཝཱེ་ཁོང་ལ་བསྟོད་པར་གྱིས་ཤིག༌ཨང༌།།