रोमी 2

1 हेरेसी ए दीसरान वाक नीकाळन्‌या, तु काहनु बी हय, तुसेक जपाप नी देवाये; काहाकी तु तीनी वात मां दीसरान वाक नीकाळे तीनीत वात मां तारु बी वाक छे, तेरेमां की तु तीनीत वात मां वाक नीकाळे चेत गलत काम करे। 2 काहाकी आपणु काजे मालम छे की छाचला-छाचला गलत काम करने वाळा पर भगवान भीणी सी छाचला-छाचला टेम मां डंडेन हुकुम जड़से। 3 ए माणुस, तु ज असला-असला गलत कामे करने वाळान वाक नीकाळे ने आपसुत असला गलत काम करे; ती तु ज समजी र्‌यु काय की मे भगवानेन नीयावेन डंड सी बची जायस? 4 काय तु भगवानेन भलाय, ने तेरो सहणु, तेरी सेण काजे असलुत समजी र्‌यु काय? ने तुसेक जी वात नी समज मां आवती काय की तेरी मट्‌ली दया पाप भीणी सी मन फीरावणे करीन सीकाड़े? 5 बाकुन तु आपणा काठला ने कदी नी पसतावु करने वाळा मनेन वजे सी हेरे रीसेन दाहड़ा वाटे, तेरेमां भगवानेन छाचला नीयाव आवसे, तारे वाटे रीस कमाय र्‌यु। 6 चु एक-एक काजे तींद्‌रा कामेन अनसारे बदलु आपसे। 7 जे भगवान काजे वारु गमे असो काम काठु रवीन सेक-सींगार, ने आव-भाव, ने अमरेन जीवन काजे हेरसे, तीनु काजे चु जलमेन जीवन आपसे; 8 बाकुन जे झगड़ा वाळा छे ने छाचाय काजे नी माने बाकुन पाप जाणे हींद्‌रे पर रीस लागसे। 9 दुख ने गरा एकेक माणसेन जीव पर चे भुंडात काम करे तींद्‌रे पर आवसे, पेहेल यहुदी पर अळतेन नी-यहुदी पर; 10 बाकुन सेक-सींगार ने आव-भाव ने वारलु सांती एकेक काजे जड़से, जे वारु करसे, पेहेल यहुदी काजे अळतेन नी-यहुदी काजे। 11 काहाकी भगवान काहनान बी छीट राखीन कुयन नीयाव नी करे। 12 हेरेसी जीनु काजे मुसान साहरे लिखलु कायदु नी जड़्‌यु, पाप कर्‌या चे मुसान साहरे लिखला कायदा पाखुर सरी जासे; ने जीनु काजे मुसान कायदु जड़्‌यु ने पाप कर्‌या, तीनु काजे कायदान अनसारे डंड जड़से; 13 काहाकी भगवानेन चां मुसान साहरे लिखला कायदा काजे सामळने वाळा वारलु नी, बाकुन मुसान साहरे लिखला कायदा पर चालने वाळा वारलु ठेहरायसे। 14 अळतेन जत्‌यार नी-यहुदी तींद्‌रे धड़े मुसान साहरे लिखली सास्‌तुर नी हय, तेबी वारु मन सी मुसान साहरे लिखला सास्‌तुरेन वात पर चाले, ती कायदु हींद्‌रे धड़े नी रवे तेबी चे तींद्‌रे वाटे आपसान कायदु छे। 15 चे कामेन साहरे ने चां कायदा लिखला देखाड़े ने तींद्‌रो हीयो मन गवा देय, ने हींद्‌रा वीच्‌यार एक दीसरा पर गुनु लागाड़े, नीते हीनुक नी-गुनावाळा ठेहरावे; 16 जी खुस-खबर मे सामळावो तीनी खुस-खबरेन अनसारे ईसु मसीन साहरे भगवान तीने दाहड़े माणसेन सातायला वातेन नीयाव करसे। 17 कदी तु आपसा काजे यहुदी कहें, ने कायदा मां भुरसु करे, ने तु तारा भगवानेन बारामां मटाय करे, 18 ने भगवानेन मरजी काजे जाणे ने कायदान सीकाड़नेन वात काजे वारु-वारु वात काजे पाळे; 19 ने आपसा पर भुरसु करे की मे आंदळा काजे वाट देखाड़्‌यु, ने आंदारला मां भटकी रवला माणसे काजे वीजाळो आपलु छे, 20 ने डेड़-अकल्‌या काजे सीकाड़ने वाळु, ने पुर्‌या-पारी काजे सीकाड़न्‌यु छे; ने अकल, ने छाचाय सीकाड़नेन वात, जी कायदा मां छे, ची मेसे काजे जड़ली छे। 21 हेरेसी वीच्‌यार कर तु दीसरा काजे सीकाड़े, ती आपसा काजे नी सीकाड़े काय? तु जु चुरी नी करनु करीन परचार करु, ने आपसात चुरी करे? 22 तु ज कहें, “छीनाळो नी करनु” काय आपसु छीनाळो नी करतु काय? तु जु मुरत्‌या सी रीस करे, काय आपसुत मंदीरेन धन काजे नी लुटे काय? 23 तु जु मुसान कायदान बारामां मटाय ते करे, कायदा काजे तुड़ीन भगवानेन बदनामी काहा करे? 24 “काहाकी तुंद्‌रे वजे सी नी-यहुदी मां भगवानेन नावेन वाक वाळा हय रया।” जसों लिखलो बी छे। 25 कदी तु मुसान साहरे लिखला कायदा पर चाले ती ते फतरी काटाड़ने सी नफु हवसे, बाकुन कदी तु मुसान साहरे लिखला कायदा पर नी चाले, ती फतरी काटाणे सी काय बी नफु नी हवे। 26 हेरेसी कदी फतरी काटे पाखुर माणसे मुसान साहरे लिखला कायदान रीती काजे पाळे ती भले चु फतरी काटाड़्‌यु तेबी चु फतरी काटाड़न्‌या मां नी गीणाये काय? 27 ने चु माणुस डील मां फतरी नी काटाड़्‌यु ने मुसान साहरे लिखला कायदु पाळी र्‌यु, चु तुसे काजे गुनाळु ठेहरावसे भले तारे वाटे मुसान साहरे लिखला कायदा छे, काहाकी तु मुसान साहरे लिखला कायदा पर नी चालतु? 28 जे बाहार सी यहुदी छे, चे छाचलीन यहुदी नी हय ने डीलेन फतरी काटाड़े छाचलीन फतरी काटाड़न्‌यु नी हय। 29 बाकुन खास यहुदी हयुत छे जु मन मां यहुदी छे, ने फतरी काटाड़्‌लु हयुत छे जु मन मां ने जीव-आत्‌मा मां छे ने चु लिखली वातेन अनसारे फतरी काजे काटाड़लु बी नी हय, बाकुन असली ईज्‌जत माणसे काजे माणुस भीणी सी ईज्‌जत नी जड़े बाकुन भगवान भीणी सी ईज्‌जत जड़े।