मत्‌‌ती 19

1 जत्‌यार ईसु जी वात कय देदलु, ती गलील जीला मां जाती रयु; ने यरदन नदीन पली धड़े यहुदीया जीला मां गुयु। 2 तत्‌यार माणसेन मट्‌लु टुळु ईसु पछळ चाली पड़्‌यु, ने ईसु चां मांदला माणसे काजे वारु कर्‌यु। 3 तत्‌यार फरीसी माणसे ईसुन पारख करने ईसु धड़े आवीन पारखणे करीन असा पुछ्‌या, “काय काहना बी उत्‌तर सी आपणी बायर काजे छुड़नु वारु छे?" 4 ईसु कह्‌यु, “काय तुहुं चुखली सास्‌तुर मां नी भण्‌या की, जु तीनुक बणायु चु सुरु सी अदमी ने बायरी काजे बणायु। 5 ईनी वजे सी माणुस आपणा आयस-बास सी अलग हयन, आपसी बायरी साते रवसे ने चे दुयु जणा एक डील बणीन रवसे। 6 अळतेन चे हय सी दुय नी, बाकुन एक डील छे। तेरेमां तीनाक भगवान जुड़लु छे, तीना काजे माणुस अलग नी करे।" 7 चे ईसु काजे पुछ्‌या, “ती मुसु ज्‌य काहा हुकुम आप्‌यु की छुड़णेन चिट्‌ठी आपीन घरवाळीक छुड़नु?" 8 ईसु तीनुक कह्‌यु, “मुसु तुंद्‌रे मनेन कयड़ाळा वजे सी तुहुंक आपणी-आपणी बायर काजे छुड़ देणेन हुकुम आप्‌यु, बाकुन सुरु सी असो नी हय। 9 ने मे तुंद्‌रे सी कह्‌व की, जे दीसरान उतरेन वजे सी आपणी बायर काजे छुड़ीन दीसरी सी ईयाव करे चु छीनाळो करे ने जे हीनी छुल्‌ली सी ईयाव करसे चु बी छीनाळो करे।" 10 चेला ईसुक कह्‌या, “कदी अदमीन बायर साते असु वेहवार छे, ती ईयाव करनु वारु नी हय।" 11 ईसु तीनुक कह्‌यु, “आखा जणा जी सीकापण हुकारी नी सके तीनु काजे अतरुत ज्‌य वाटु आपलु छे। 12 काहाकी काहनाक हीजड़ा असा छे, जे मायन पेट मां सी असा पयदा हवला छे; ने काहानाक हीजड़ा असा छे, तीनुक माणसे हीजड़ु बणाया; ने काहानाक हीजड़ा असा छे, चे सरगेन राज वाटे आपसा काजे हीजड़ा बणावला छे। जे तीना काजे हुकार सके चे हुकार लेय।" 13 तीनी टेमे थुड़ाक माणसे नानला पुर्‌या काजे ईसु धड़े लाया; की चु हींद्‌रे पर हात मेले ने दुवा करे, ईसुन चेला तीनु माणसेक लड़्‌या। 14 ईसु कह्‌यु, “पुर्‌या काजे मारे धड़े आवणे देवु, ने हीनुक मां रुकु, काहाकी सरग वाळा भगवानेन राज असलात छे।" 15 ने चु पुर्‌या पर हात मेलीन संयबरकत आपीन चां सी जाती रयु। 16 एक माणुस ईसु धड़े आवीन पुछ्‌यु, “ए मास्‌तर, मे काहनो भलो काम करो की जलमेन जीवाय जड़े?" 17 ईसु तीना काजे कह्‌यु, “तु मारे सी भलायन बारामां काहा पुछे? वारु ते एकुत छे, कदी तु जीवन मां जाणे चाहे ती भला काम करने वाळा भगवानेन हुकुम काजे मान्‌या कर।" 18 चु ईसुक कह्‌यु, काहनी हुकुम ईसु कह्‌यु, “खुन घुण करे।” छीनाळो घुण करे, झुट घुण देय; 19 आपणा बास ने आपणी मायन वात माननु, ने आपणे चांदे वाळा सी परम करजी। 20 चु जुवान ईसु काजे कह्‌यु, “जी आखी हुकुम काजे ते मे मानो; हय मारेमां काहानी वातेन कसर छे।" 21 ईसु तीना काजे कह्‌यु, “कदी तु पाक्‌कु बन्‌ने चाहे ती जां तारा धन काजे वेचीन गरीब काजे आप दे, ने तुसे सरगे मां धन जड़से; ने तु मारु चेलु बणीन मारे पुठ्‌ये चाल।" 22 बाकुन चु जुवान ईसुन वात सामळीन नराज हय्‌न जाती रयु, काहाकी चु बेसकु धन वाळु हतलु। 23 तत्‌यार ईसु तेरा चेला काजे कह्‌यु, “मे तुंद्‌रे सी छाचलीन कह्‌व की धन वाळा माणसे काजे सरग वाळा भगवानेन राज मां जाणु काठो छे। 24 तुंद्‌रे सी अळी कह्‌व की, भगवानेन राज मां धन वाळा काजे भरायणु उटड़ान सुईन नाचका मां भरायणु जादा सरल छे।" 25 ज्‌य सामळीन चेला बेसका घाबराय्‌न, “कवणे लाग्‌या पछे कुणीन छुटकारु हवसे?" 26 ईसु तींद्‌रे भीणी एक हेट्‌यु भाळीन कह्‌यु, “माणसे सी ज नी बणे, बाकुन भगवान सी आखो काय कर सके।" 27 ती पतरस ईसु काजे कह्‌यु, “देख, हामु ते आखो काय छुड़ीन तारा चेला बण गुयला छे। ती हामुक काय जड़से?" 28 ईसु तीनुक कह्‌यु, मे तुंद्‌रे सी छाचलीन कह्‌वो, की नवली कळी मां जत्‌यार माणसेन पुर्‌यु आपणी सेक-सींगारेन राजगादी पर बठसे, ती तुहुं बी जे मारे पछळ आवला छे, बारे राज गादी पर भरायन ईस्‌रायेलेन बारे खानदानी पर नीयाव करसु। 29 ने जु कुय बी घर, नीते भायसेक, नीते बहणीस, नीते बास, नीते माय, नीते नानला पुर्‌या नीते खेते काजे मारा नाव वाटे छुड़ देदला छे, तीना काजे सोव गुणा फळ जड़से, ने चे जलम जीवनेन हकदार्‌या बी हय जासे। 30 बाकुन बेसका माणसे हय अगळ छे, चे पछळ हय जासे, ने जे हय पछळ छे, चे अगळ हय जासे।