Romanthek 10

1 Gu khuiinothek nane bumuiithek, gui bran shii ragia rey yi pha nyie khi-èrek ne gui lubu rog shii yang! Nyie khi-èrek ne ithek shii sia phi! 2 Gu ithek shii izai yao ithek ne Hamangkhung-aphuii shii iliing è sia; jishii ithek ro misia ne izai khani è asi ro. 3 Ithek ne Hamangkhung-aphuii rog shii branthek ne nyie khi-èrek ne ruii pha ji ne athieg pha rek srane, ji pha chiang shii, ithek ne awaithek lum ne lumuii rab ne; ji è ithek ne awaishii Hamangkhung-aphuii pha lumuii è giang ruii pha ji shii ne awaithek shii ne aphi. 4 Masi è Iphey yi srane jong muii, ji è hanyie magungde migi rek arone Hamangkhung-aphuii rog shii giang rey yi. 5 Moses è hì zey pha ji ne Hamangkhung-aphuii rog shii giang ruii pha ji ne Iphey nuii pha ji è ro, â Hanyie magungde muyungthek ji nuii arone ai ne sieng ne rai phro.â 6 Jishii jigigam shii migi è Hamangkhung-aphuii rog shii giang ruii phro è yao pha ji ne hì ro: â Nane nawaishii asai rabo,â hamangkhung hà ne hanyie dun pha lei? (Chiih-è Masi shii ne thazam hanyie è noh pha). 7 Din ne hì de nawaishii asai rabo, hanyie yi sohjambling bucho hà dun pha lei? (Chiih-è Masi shii iy dun pha ji è hanyie è hòi ne noh pha). 8 Nyie hì yao pha ji ne hì ro: â Hamangkhung-aphuii ro mua ne na moe shii nane na sem shii chiih-è na lubu shii um ro.â Jine gethek yua muii pha mua migi ji ro. 9 Gethek è Isu Ithong shii Hamangkhung-aphuii è iy pha ji è hòi phi rone migi rek arone nathek ne ragia rey phro. 10 Hì ne gethek ro migi è Hamangkhung-aphuii rog shii giang ruii phro; chiih-è gethek sem è yao arone gethek ne ragia rey phro. 11 Jigigam shii yao, â Hanyie magunde aishii migi rek arone azo ruii phro.â 12 Hì zabjia shii lua ne, nyieliieshii thiisa hà ne Jewthek nane Gaibranthek shii yo oi rai phro; Hamangkhung-aphuii ne ò Ithong ro, chiih-è ai è hanyie aishii ho pha ji shii ne bajo khirzey phi ro. 13 Jigigam shii yao, â Hanyie magunde Ithong beng yi arone ai ne ragia rey phro.â 14 Jishii ithek è migi arek arone nyie khi-èrek ne aishii nong pha yao phlei? Chiih-è ithek mua anuii pha nyie khi-èrek ne migi rek mage phlei? Chiih-è ithek è mua ayoi ba arone nyie khi-èrek ne yoi mage phlei? Chiih-è mua ayao ba arone khi-èrek ne yoi mage phlei? 15 Chiih-è muaphothek shii athoh arone nyie khi-èrek ne mua thieg mage phlei? Jigigam shii yao, â Hanyie è Mua Wie yi ne wuii ruii pha muapho ne bajo wie ro!â 16 Jishii zab ne Mua Wie shii anuii ro. Aijaya è yao, â Ithong, hanyie è gethek ro mua shii migi rek phlei?â 17 Ji-è chiihphado, migi yi mua nuii pha ji è thog phro, chiih-è miyaogam yi Masi ro yua pha ji è thog phro. 18 Jishii gu sai: Ithek è mua ayoi pha ji ne izai bey? Um ithek è rekâ jigigam shii yao: â ithek è ro pha goh ne zab pha sohnyiak hà yoidun ro: ithek ro miyaogamthek ne sohjong bsa hà thogdun ro.â 19 Din ne gu sai: Israel pha branthek ne agao chak bey? Moses awai ne igobi shii yao: â Gune guro bran è miegriie yi pha gai jad shii ho; gune guro branthek shii miegriie yi pha; chiih-è bi-ìethek shii khoh ne ithek shii lijieg yi pha ro.â 20 â Chiih-è Aijaya è lububo rek ne yaoâ â Gune hanyie gu shii asow pho shii doh yi; hanyie è gu shii asai pho shii gune aishii dong ruii phro.â 21 Jishii Israel pha chiang shii ai è yao, â Muyua anuii pho chiih-è wiangwe rek pho shii thawuii bo è yao ne zab pha inai gune wad phia ne rai.â