Yoube 32

1 Yoube da ea hou da moloidafa dafawaneyale dawa:beba:le, ea sama da ema bu adole ima:ne yolesi dagoi. 2 Be dunu eno la:ididili esalu, ea dio amo Ilaihiu, da ougi ba:i amola amo bu gumimu hamedei ba:i. Bai Yoube da hina: hou gaga:le, Godema diwaneya udidilalu. (Ilaihiu da Ba:lagele ea mano amola Ba:lagele da Base egaga fi dunu. Ea sosogo fi da La:me.) 3 E da Yoube ea sama udiana ilima amolawane ougi galu. Bai ilia da Youbema bu adole imunu logo hamedei ba:i. Amaiba:le, dunu eno ba:ma:ne, Gode Hi da giadofaiyale, eno dunu ilia da agoane dawa:i galu. 4 Ilaihiu e fawane da goi ayeligi galu. Amaiba:le, e da ouesalu, eno dunu ilia da sia:i dagoiba:le fawane sia:i. 5 E da eno dunu udiana da Yoube ea adole ba:su amoga dabe hame adole iabeba:le, e da ougi ba:i. 6 E da muni amane sia:i, “Na da ayeligi, be dilia da asigilai dunu. Amaiba:le, na da na asigiga dawa:i liligi dilima adomu beda:i galu. 7 Na da nisu amane sia:i, asigilai dunu dilia fawane sia:mu da defea. Dilia bagade dawa:su amoga ninia huluane dawa:ma:ne adomu da defea galu. 8 Be Gode Bagadedafa Ea A:silibu, Hi fawane da ninima misini, ninima asigi dawa:su bagade iaha. 9 Ninia da:i hamosea, bagade asigi dawa:su amola moloidafa hou dawa:i hame laha. 10 Amaiba:le, na hanai da dilia na sia: nabimu! Na asigiga dawa:i amo na da dilima adomusa:, logo doasima. 11 Dilia sia:nanoba, na da gebewane nabalu. Dilia da asigi dawa:su bagade sia: hogolalebeba:le, na da ouesalu. 12 Na da ha:giwane sosodolalu, amola dilia dafabe ba:i. Dilia da Yoube ea sia:be da giadofaiyale, dilia didili hame hamoi. 13 Dilia abuliba:le, dilia da bagade dawa:su hou ba:i dagoi, amo sia:sala:? Dilia da dafai dagoi. Amaiba:le, Gode Hi fawane da Youbema bu adole imunu gala. 14 Yoube da nama hame sia:i. E da dilima sia:su. Be na da dilia adole iabe defele, ema hame adole ia:noba. 15 Yoube! Ilia sia: da dafai dagoi. Ilia dima bu adole imunu gogolesa. 16 Ilia da wali sia: hamedene agoane udigili lela. Amaiba:le, na da ouiya:le bu ouesaloma:bela:? 17 Hame mabu! Na da dima adole imunu. Na asigi dawa:su liligi, na da dima adomu. 18 Na da sia:ma:ne ouesalumu hamedei. Na da na sia:negabe logo hedofamu hamedei ba:sa. 19 Na da sia:mu logo hame ba:sea, na da ohe gadofo amo da gaheabolo waini hano amoga nabai gala, amo defele fudagala:mu. 20 Hamedei! Na da bu ouiya:le esalumu da hamedeidafa. 21 Na da dunu afae amomagale hame sia:mu. Na da dunu afae amoma dabua hahayafuli hame sia:mu. 22 Na da osobo bagade dunuma hahayafuli sia:mu hamedei ba:sa. Amane hamoi ganiaba, Gode da hedolowane nama se dabe ia:noba.