ПСАЛЬМЫ 54

1 Кіраўніку хору: на струнных інструмэнтах. Навучаньне Давіда, 2 калі прыйшлі Зіфеі і сказалі Саўлу: “Ці ж гэта не Давід схаваўся у нас? 3 Божа, імем Тваім збаў мяне, і магутнасьцю Тваёю вядзі справу маю! 4 Божа, пачуй малітву маю, прыхілі вуха да словаў вуснаў маіх! 5 Бо чужынцы паўсталі супраць мяне, і моцныя шукаюць душы маёй; яны ня маюць Бога перад сабою. (Сэлях) 6 Вось, Бог – дапамога мая; Госпад падтрымлівае душу маю. 7 Зьвяртаючыся, зьвернецца ліха на ворагаў маіх. У праўдзе Тваёй Ты вынішчы іх! 8 Тады ахвотна буду ахвяроўваць Табе; буду славіць імя Тваё, ГОСПАДЗЕ, бо Ты – добры! 9 Бо Ты вызваліў мяне ад усіх трывогаў, і на [загубу] ворагаў маіх глядзелі вочы мае.