ZƏBUR 23

¹ Rəbb mənim çobanımdır, möhtac olmaram.

² O, məni yaşıl çəmənlərdə dincəldir, Sakit axan sular kənarında gəzdirir.

³ Məni yenə də canlandırır, İsmi şərəfinə salehlik yolları ilə aparır.

⁴ Ölüm kölgəsinin dərəsində gəzsəm belə, Şərdən qorxmaram, çünki Sən mənimləsən, Sənin əsan, Sənin dəyənəyin mənə təsəlli verir.

⁵ Düşmənlərimin qarşısında Mənim üçün süfrə açırsan, Başıma ətirli yağ çəkirsən, Ağzınadək camımı doldurursan.

⁶ Bəli, bütün həyatım boyu Yaxşılıq, məhəbbət məni izləyir. Bütün ömrüm boyu Rəbbin evində yaşayacağam!