ZƏBUR 1

¹ Pislərin məsləhəti ilə getməyən, Günahkarların yolunda dayanmayan, Rişxəndçilərin arasında oturmayan insan nə bəxtiyardır!

² O ancaq Rəbbin Qanunundan zövq alar, Gecə-gündüz bu təlimatı dərin düşünər.

³ Axar sular kənarında əkilən ağac kimi Barını mövsümündə verər, Yarpağı solmaz, Etdiyi hər işdə uğur qazanar.

⁴ Pis adamlarsa belə deyil, Onlar yelin sovurduğu saman çöpünə bənzəyər.

⁵ Buna görə pis adamlar hökm günündə, Günahkarlar salehlərin məclisində dayana bilməz.

⁶ Çünki Rəbb salehlərin yolunu bilər, Pislərin yolu isə məhv olar.