Rómu 10

1 Maanááímó simátíménda ísáaro. Kesí waási Yúndaa-waasi sáwíꞌo úmaimo méraampinkemba Maníkó faútinkaindasafena áfááraumai sirááíma wétaisaꞌa Maníkómpáꞌá inaí símaeꞌa iyúne. 2 Yúndaa-waasi Maníkóní kísau maénae sésa fasiꞌaambánifo Maníkón-aaigoni áwáuma ímba ísaraamba tuwánaraumne. 3 Maníkómó wenaúrankaꞌo arupísemo uwátínkáín-amba ímba awánésa karoꞌ-ántáfésa éraiꞌ-amban-iye sésa pósa Maníkóní éraiꞌ-amba ímba wéaraaiwaewe. 4 Ámáámba arááíwaundasafena Maníkó wenaúrankaꞌa arupíse uwásinkainiye sésa Yúndaa-waasi arááíwáén-amba Ísu Káráísiti séna minámbá taíꞌáífo kesááisafesa timankúnkúmba owísáféna Maníkó wenaúrankaꞌa arupíse uwátínkáímbanifo Yúndaa-waasi minámbá ímba wéaraaiwaewe. 5 Maníkó Mósesembo simámakain-amaamba arááíwáénanasa Maníkó arupísesa uwásinkainiye sen-ááísáféna naaófáꞌá Mósese agaimaréna séna minámáámbó seyaafáꞌó arááíwaiyawi kaweꞌ-úmai ménaawe siyáiye. 6 Maníkón-aaisafesa timankúnkúmbo owímó arupíse uwátínkáín-aaisafena agaimaréna séna maarán-ááí ímba seró. Nááwa wíyómpaꞌa iyénawa Káráísitimba áíꞌmaenawa kumíníyo. 7 Nááwa pukáan-kwaasimo méraapaꞌa kuréwa Káráísitimba áíꞌmaenawa tíníyo. Miyán-ááí ímba seró. 8 Maníkón-aai kentirumpimbá ewaaꞌá wéraisaꞌa wésewe agaimaréna siyáiye. Ísu Káráísitin-aaisafeꞌa timankúnkúmba oró-ááí simátimunda 9 minááí maarán-iye. Ísu kentáásí Fasiꞌaénkón-iye aforaꞌó simátimeꞌo kentirumpinkémbó séꞌo Ísu pukáimpinkemba Maníkó íyáfasinankaraiyemo síyanamo éna sáwíꞌo úmaimo méraampinkemba Maníkó faútinkainiye. 10 Maníkón-aaisafeta kesirumpintá simankúnkúnta úndasa wenaúrankaꞌa arupísesa uwásínkáísata aforaꞌó minááímó simátimundasa sáwíꞌo úmaisaamo méraundafinkenta wéfausinkaiye. 11 Maníkón-aai aúfáífimba agaimaréna séna siyáintembo índawimpaꞌo timankúnkúmbo íyawi ímba tigaesáfésa ónááwe siyáiye. 12 Minááí seyaafáꞌ-wáásí Yúndaa-waasiye fíꞌonkaa-waasiye Maníkón-aúrankaꞌa mimbóráíꞌa ontáféna siyáiye. Maníkó seyaafáꞌnánkáꞌó káráwiyaiwai éna súwaꞌnai ínkwae sésamo simámén-kwaasi óraa-kaweꞌa wéuwatinkaiye. 13 Maníkón-aai aúfáífimba agaimaréna séna Fasiꞌaénkóntáfésa sésa sáwíꞌo úmaimo méraundafinkemba siyáínonemo sewí seyaafáꞌnánká miyá íníye agaimaréna siyáiye. 14 Maníkó ímba méraiye-aaimo sewímó ombá súwaꞌnai uwo ímba kanaaꞌá wésewe. Maníkón-aaimo ímbo ísááwimo ombá minááísáfésa timankúnkúmba ímba kanaaꞌá wéowe. Maníkón-aaimo ímbo kosimátíméwasamo ombá minááí ímba kanaaꞌá ísááwe. 15 Ímbo tiꞌmárááwasamo ombá ímba kanaaꞌá kowásimatimewe. Maníkón-aai aúfáífimba agaimaréna séna ásé-aaimo kosimátíméwi aamoí wéuwatinkaawe agaimaréna siyáiye. 16 Minásé-ááí isésamanifo tuwímbai taráíyaawe. Mindásafena naaófáꞌá Maníkón-aai simátímakowin-awiꞌa Áísáya agaimaréna séna Fasiꞌaénkóo kaweꞌ-ááí kosimátimunasasa minááísáfésa ímba timankúnkúmba owe agaimaréna siyáiye. 17 Ísu Káráísitin-aaimo simátíméwasamo isésamo ombá kanaaꞌá timankúnkúmba wéowe. 18 Yúndaa-waasi Ísu Káráísitin-aai éraiꞌa éꞌa ísaraawe súne. Mindásafena naaófáꞌá Maníkón-aai aúfáífimba agaimaréna séna seyaafáꞌ-máráfáꞌá wénesa simátímúwana minááígó wété uráiye agaimaréna siyáiye. 19 Yúndaa-waasi mindá Ísareri-waasi minááígóní áwáuma éꞌa ísaraamba mindá éraiꞌ-aain-iye. Naaófáꞌá Mósese Maníkómó siyáin-aai agaimaréna séna Yúndaa-waasi fíꞌonkaa-waasisafeꞌa séꞌa úwoi-waasin-owe siyáamba miwísáféꞌa kesí waásin-owe sendasáféꞌa aaisambá tiyéꞌa tirunkó sáwíꞌa uwátinkainiye Maníkó siyáiye Mósese agaimaréna siyówana 20 ánaaemba Áísáya ímba ááꞌa úwana agaimaréna séna Maníkó séna nóra símaisaawa Maníkómpáꞌá ténaumno-aai ímba sewífáꞌá paápé uráumne. Maníkómbá aráásíméro-aai ímba sewífáꞌá paápé uráumne séna 21 Ísareri-waasisafena séna túwaꞌnai ónaumne séꞌa kempáꞌá teró símaeꞌa iyúnasa kesáái taraisésa kembá tínaaeniꞌa wéowe Maníkó siyáiye Áísáya agaimaréna siyáiye.