Toho Wojo Honajo Hungkuno 11
PNG1 Ngko nohumentanɨngko ango imayo iyoêne iyo ntapontɨfi ntɨmentohofi, Nolɨkafohoji Anɨtuye tojo ango engo Jelusalem lohojwo soênji oso ijempoho yoêmayo Anɨtumneêno hoênasyɨwoênɨngkohofo soêntnneêno sawemo soêno yamofo fiyo. Ose yohoji kɨko aêamu Anɨtuye angomo Anɨtu kakoe yofe hoênomayoêne humalofo somo atofo fiso. 2 Oseso kɨko oso angkuhwafo weêe mempo hohnjo somo yamofo yohotoho. Oêo, oso aêamu Anɨtumo sɨmeho hiêntnnono muyoênjo iwoênɨngkohofo sofeponoho. Osoêno kɨko yamofo yohotoho. Aêamu hiso hofɨko ango Jelusalem soênji oso angkuhwafo weêe mempo hohnjo soênji fonɨfonyo yontanɨngkuji soswo hufaêu sɨhune uyakolofɨhwosi nomêne hamno aho fehohnjo hopiênono nomêne mtaêni angaêno uyakolofɨhwosoêno fonɨfonyo wesojwaofantɨfeho. 3 Fonɨfonyo hiso yontanɨngkuji aêamu hufaêu hwaêu nje hungkuno ujoêne yokumpohnênyo uyɨme sohwaêu siko ifa nano hoêyoso mekiênisoso hofɨkoe sɨmeho tango unyoso aêamumo utɨhwayo sohwaêu tɨfi yoêmayo imoênone soêno ulanjiyoho. 4 Ulontanɨngkohosɨsi soswo hufaêu sɨhune nomêne hwasyopo uyakolofonefoho. Ose ntahonɨngki uhwonɨmentoheso, oso hwe hufaêu sohwaêumneêno hohonta hwe fihwo Sekolaiya kako hungkuno ifalifaliyo mtɨêmokumentisofoho. Siko iyo hufaêu ipisayoênjo sikiloho hufaêu Anɨtu yoêmayo hwaho mokosyohumayo sohwoe sɨmanopo lohoêmentisiye hwaêuyoho. Ose uhwononji Sekolaiyafe hungkuno hiso ne imoênɨmentisoso uhwonɨmentohefoho. 5 Ose uhwonɨmentoho, aêamu wonyoso hofɨko hwe sohwaêumo wonyo umokantɨfi sikoe mango mtaêni toho sosɨjaofaponto sikoe mango sohwamo toho ulasyɨwoênɨngkisofoho. Ou, aêamu hwe hufaêu hwaêumo wonyo umokumo lɨhwosi yoso sohwo kako oso paênyoso wapeênɨmontonoho. 6 Oso hwe sohwaêumo Anɨtu kako yokumpohnênyo mɨkunɨmposo uyɨmentiso soêno siko ifoyo honɨngkano ifoyo masiyoêne pɨjwasiyoso siko hoponoho. U siko ole lisoêmanji, Aêamu somo yoêmayo tango uêmano. Ose lisoêmanji ne umoênono lisoso siko hoponoho. Oso hohosohonta siko Anɨtuye hungkuno ulonji yoêmayoso imentisiyefoho. 7 Siko Anɨtuye hungkuno moiêwo losojwaofahonɨngki piênɨmo hwapɨngo ane somtaêni sikisɨwojo engo sɨêmofapmmentisofoho. Nosiêmofaponto hwe sohwaêumo toho wolofahumo lonto ikujoho fongkiênontɨfi sɨwojo sohwo hwe sohwaêumo hwotoho fento toho lofahumentisofoho. 8 Sikoe pijafoso honɨngkano engo sopo woêmentisofoho. Oso pone engo homo somo hohonta sikoe hwe engo sohumo iyopo fonjintoêofahumentohofofoho. Oso pone engo soêno pahnnɨmo hungkuno lɨwoênɨngkuhwoneso ole, Soutomênji Ijipɨênjoho. Hwapɨngoso oso aêamu huhwo sohwa hofɨkoe honɨngkano wonyoso aêamu Soutomênji Ijipɨênjo paênyo hwafoho. 9 Sikoe pijafoso neêno nowentanɨngki aêamu temtitofo kengo kengoêmtaêangoso hungkuno kengo kengo hwaho kengo kengoêmjoso nohumantɨfi oso pijafo somo uhwonontanɨngkofi sɨkuno hufaêu sɨhune nomêne ajwopo mtɨhupemjaoêmentisofoho. Aêamu honɨngkano wonyoênjoso hofɨko ole lɨmentohofi, Nomêne aêamu sohwa oso hwe sohwaêuye pijafoso ijopijɨsyasyɨkutoho. Ose lɨmentohofofoho. Hwapɨngoso hwe sohwaêuye yofeso monje yasiyoênefoho. 10 Hwe sohwaêu poyo peênyosoêno aêamuso sɨmeho wopɨngo umoênɨngkahonɨngki sɨmonyo engo yontɨfi wosopayo engo iloho yontɨfi hofɨkoe sɨmeho wopɨngo umoênyo soêno hofɨkoe aêamu somo hoêyango engo uyɨmentohofofoho. Hwapɨngoso ole, oso hwe sohwaêu siko songo nohumentanɨngkiye sohonta siko aêamufe honɨngkano wonyo somneêno Anɨtuye hungkuno ulonji tohino uyɨmentisiyefoho. 11 Oseso sɨkuno hufaêu sɨhune nomêne ajwopo mtɨhupo lohofonto memjaofahonɨngki Anɨtu sikimo songo ulɨkaêmentisofoho. Siko nolɨkofahonɨngki aêamuso hofɨko sikimo uhwonontɨfi iyoho engo imentohofofoho. 12 Hofɨko mampaho ahwomo mtaêni ole upaênɨmentohofo, Siko olopono fisapinyo. Ose upaênontɨfi mango huhwo sohwa nuhwonontanɨngkofi siko ahwomomno himopo sɨmentisiyefoho. 13 Nosahonɨngki hwomɨhwo engo imentisofoho. Imentisoso pone engo Jelusalemmjo poneso homo homtaêni kengaêno kengaêno yaêmi yaême yaoêmentisofoho. Olo hopa pɨwahuêmentiso, pone aho hufaêu mtaêni hotitoênohini angaêno pɨwahuêmentisofoho. Aho fehohnjo hopiênono nomêne mtaêni osofosofahuêno lohoêmentisofoho. Nopɨwesyahonɨngkofi aêamu sefen tausen (7,000) peênɨmentohofofoho. Aêamu poyo mapeênɨmmentohofoso iyoho engo unɨngkahonɨngki ole lɨmentohofi, U Anɨtu ahwomomo songo humaso sohwo Hwe Engo nehopeho. Ose lɨmentohofofoho. 14 Tango hufaêu moiêwo nto imoênɨmentisofoho. Tango aeêuyoso iêmofaponeso uhwonɨmentohefoho. 15 Oso hohosohonta aêamu ahwomomjo aho fehohnjo hopiênono nomêne mtaêni hufaêuyo sohwo kako kounoho yoka lahonɨngki mampaho piênɨngo ahwomo mtaêni ole hoênɨmento, Seten olo hwaho lomo mokosyohumamojofoho. I olohonta nakwoe Hwe Engo Anɨtuênji Kɨlais uhwatɨmentiso sohwoênji siko hwaho loso nɨhuênahone womokosyohumanjiyoho. Kakoe yofe engo hwaho mokosyohumayoêneso neêno nowentɨhwonefoho. 16 Ose hoênɨngkahonɨngki oso hwe engo sɨfe aho hopiênono nomêne mtaêni osofosofahuênohino sohwa Anɨtuênjopo hofɨkoe epohumayo sopo humawoênɨngkohofo sohwa hofɨko Anɨtumneêno hwomtame ehumantɨfi Anɨtuye yofe hoênomaêmentohofofoho. 17 Ole lɨmentohofi, U nakwoe Hwe Engo sohwosi kɨko jɨje yokumpohnênyoso hwofiloênnyoênjo hwosoho. Oseso kɨko hohonta humamopmmentohino sohwosi olohonta neêno humahnno. Kɨko jɨje yokumpohnênyoênji hwaho homo somo mokosyohumomopalokuno. Osoêno nakwo isamoyoka engo kilalokuhwono. 18 Aêamu kikimo sɨmeho hiêntnnono mokijapeênjoso hofɨko sɨmeho tango engo uyalofoho. Hwapɨngoso jɨje sɨkuno hofɨkimo tango uyoêneso nto iêmofapohoho. Olohonta kɨko aêamu poyo peênyo sofe yahino somneêno yano ulofimonnoho. Hohonta aêamu jɨje hungkuno ulɨmotofo sohwanji jɨje aêamu yofe engoênjo sohwanji yofe engo aneênjo soênji kikimo enjwaêmo humamotofo somo hoêyango wopɨngo uyɨmonnoho. Aêamu hwahopo wonyo imentohofo somo wae weeoêmonnoho. 19 Ose ulahonɨngkofi ahwomomjo Anɨtuye ango engo somjo hwosompoênowentanɨngki uhwonɨmentoheso oso ipofo aêamu Juta hohonta mtɨêmokumentohofo paênyoso Anɨtuye hungkunoênjo nakwoênji makotɨkuênyoêneso nowentanɨngki uhwonɨmentohefoho. Oso hiso ngko nuhwonɨngkahonɨngko emtaêmɨngo yahonɨngki yoêmayo mampaho hoênɨngkahonɨngki ahwomo yoka lahonɨngki hwomɨhwo yonto ifoyo sisayoênjo huêmentisofoho.