Mak 1

1 Ngko Makêni Anɨtuye Hwomu Jisas Kɨlais sohuneêno hungkuno wopɨngo wamtɨêmokumonneêno yohono. 2 Hungkuno ae lomayoso ole. Hohonta Anɨtu kako Aisaiya sohumo hungkuno uyahonɨngki iyoswo ole mtɨêmokumento, Anɨtu kakoe hwomumo ulɨmento, Upaênyo. Ngko hwe fihumo nje hungkuno motaweêne wolɨhwatɨmonnoho. Oso huhwo sohwo kako kikimo sɨmoêmo kupe-eêne hweho. Kako jɨje honɨngkano itoêno esyohumayoêne hweho. 3 Olo hwe huhwo lohwo hwaho aêamumo humunyo fiêmo hwe fihwoe mampaho engo ole hoênɨmento, Hwe Engo sohumneêno honɨngkano itoêno fehumamno. Kakoe hano emoyoêne soêno honɨngkano hiso itoêno mɨhwatɨmno. Oso hungkunoso Aisaiya mtɨêmokumentisofoho. 4 Oseso Joun aêamumo mijo kiyomaêmojo sohwo hwaho aêamu mohumunyopo iêmofaponto aêamu piênɨngo uhuêmokahonɨngkofi ole lutɨhwamento, Sekwo sekwoe honɨngkano wonyo somneêno hohujo ikinjaofɨkujoêno Anɨtu kako sekwoe wonyo hiso wae yasemofɨhwasoêno ngko mijo wokiyosemaêmo. Ose ulɨmentisofoho. Aêamumo sekwoe honɨngkano songoso utɨhwayoênefoho. 5 Aêamu hwaho Jutiyantaêango soênji pone engo Jelusalem mtaêango piênɨngo engo soênji Jounɨmo uêmantɨfi kakoe hungkuno upaênontɨfi hofɨkoe wonyo yoloho lɨjwaofahonɨngkofi Joun hofɨkimo Mijo Joutan sohumo kiyomaêmentisofoho. 6 Jounɨye nemêno manjiêmofo hwaho fiênjohwe yahu kamel lohwaênji mtɨêmokumentisofoho. Yahu paho ahulohoso lohoênɨmentisofoho. Kako kusɨmoênji tɨme mijoênji nɨmojo hweho. 7 Joun aêamumo ole lutɨhwamojofoho. Hwe nomênehwo tɨfi noponefoho. Oso hwe huhwo sohwo kakoe yokumpohnênyoso nje yokumpohnênyomo nɨyakolofonefoho. Ngko sohwoêni oso hwe huhwo sohwoe yofe engo soêno ngko kakimo momayo ulohofiyoêne hwoênyoho. 8 Ngko sekumo mijoênohino kiyosemawoênɨngkono. Hwe tɨfinjo sohwo kako Anɨtuye Towahuno Wopɨngonjo sohwo wokiyosemaêmontonoho. 9 Osohonta Jisas pone Nasalet hwaho Ngkalili ulɨkoêmanto Jounɨmo nuêmahonɨngki Joun kakimo Mijo Joutan sohumo kiyomaêmentisofoho. 10 Jisas mijo mtaêango nosɨêmofaponto uhwonɨmentisoso ahwomo mtampo lohofahonɨngki Anɨtuye Towahuno yɨhufo ntolofiyo paênyo sohwo Jisasɨmo wekehumapmmentisofoho. 11 Oso hohosohonta ahwomo mtaêni ole hoênɨmento, Kɨko nje Hwomu sohwohnneêno, ngko sɨmeho wopɨngo mɨkunɨmposo kijapalokweno. Kɨko yoêmayo wopɨngo iwoênɨngkino soêno nje sɨmeho wopɨngo nɨmoênantofoho. Ose hoênɨmentisofoho. 12 Ose hoênɨngkahonɨngki Mijo Joutanntaêango Anɨtuye Towahuno Wopɨngo sohwo Jisasɨmo nomêne hwaho aêamu mohumunyo iyo yoêmayo ane sopono uhwatɨmentisofoho. 13 Osopo Jisas nohumentanɨngki sɨkuno fouti (40) memjaofahonɨngki Seten Jisasɨmo wonyo umokumo lonto Jisasɨmo yamofo ulohoêmentisofoho. Oso hwaho sopo sikisɨwojo yoêmayoso nohumentanɨngkofi aêamu ahwomomjo sohwa Jisasɨmo ufoêmaêmentohofofoho. 14 Hwangku sohonta Helout hwe yofe engoênjo hwaho mokosyohumayo sohwo kako Jounɨmo impoêangomo intofahumentisoso Jisas hwaho Ngkalili sopo nowento Anɨtuye hungkuno lutɨhwomaêmentisofoho. 15 Ole ulɨmento, Upaênɨmno. Olohonta Anɨtuye sɨkuno mofoneponoho. Weêenepi Anɨtu kako kakoe aêamu soênyumo yokumpohnênyo enemokosyohumanefoho. Sekwoe honɨngkano wonyo somneêno hohujo ikinjaofɨkuji Anɨtumo sɨmeho hiêntnnono uyɨmno. Ose lutɨhwamentisofoho. 16 Sɨkuno fihwi Jisas Mijo Ayo Ngkalili momɨngopo hano emoyonto uhwonɨmentisoso Saimoun konɨngkwaêwehwo Entɨluênji siko inanɨku hoêyo mijomo hoênaofontanɨngki uhwonɨmentisofoho. Inanɨku ifamiyoso sikoe hamniyoho syohofoho. 17 Jisas nuhwononto ulɨmento, Siko ngkimo tɨfi nnɨngkapinyo. Siko inanɨku mawoênɨngkisiye paênɨngoso Anɨtumneêno aêamu mayoêne wolosetɨhwamo. 18 Ose ulahonɨngki sikoe inanɨku hoêyo komoêno nulɨkoêmanji Jisasɨênji umentohofofoho. 19 Hofɨko weêenepi mitɨmomɨngo somo nokuêmokwawentɨfi Jisas uhwonɨmentisoso Sepetiye hwomu sohwaêu Jemɨsɨênji Jounênji siko yofayokinomo nohumanji inanɨku hoêyo itoêno esyohumentanɨngki uhwonɨmentisofoho. 20 Jisas nuhwononto sikineêno komoêno joho ulɨmento, Oyoninyo. Ose ulahonɨngki Jemɨsɨênji Jounênji siko komoêno kanɨngkwohumo ulɨkoêmaêmentisiyefoho. Kanɨngkwohwo Sepeti kakoe aêamu syoho ulohofiyo sohwanji hofɨkoe yofayokinomo nohumentanɨngkofi Jemɨsɨênji Jounênji siko ulɨkoêmanji Jisasɨênji umentohofofoho. 21 Jisasɨênji kakoe inomokomoyo sohwanji nowentɨfi pone Koponeyam iêmofawentɨfi sɨkuno Salolemo aêamu iyoho fosyohumayoêne sɨkuno somo hofɨko aêamu Jutafe tajo angomo noswontɨfi Jisas hwe moyaêmimo hungkuno lutɨhwamentisofoho. 22 Aêamuso hofɨko kakoe hungkunomo upaênontɨfi yomo imentohofofoho. Hwapɨngoso hofɨko aêamu honɨngkano hungkuno lutɨhwamotofo sohwa paênyo hwoêmaho. Oêo, Jisas sohwo kako hungkuno hwapɨngo woênnyo hweho. 23 Osohonta hwe towahuno wonyoênjo sohwo tajo ango homo somo joho mohmêno ulɨmento, 24 Jisas Nasaletnntaêango sohwosi kɨko nakumo peho wonalohoêmneêno sopalokuno. Kɨko nakumo wonyo wonamokumonneêno losopalokuno. Ngko kikineêno huno niyohoho. Kɨko Anɨtuye Hwomu Wopɨngo Ne hwosoho. 25 Ose ulahonɨngki Jisas kako towahuno wonyo sohumo yoka ulɨmento, Mampiênyo fosyohumaho. Kɨko olo hwe lohumo ulɨkoêmaho. 26 Ose ulahonɨngki towahuno wonyo huhwo sohwo joho mohmêno lonto hwe sohumo yomo yomo engo umasiyonto ulɨkoêmaêmentisofoho. 27 Aêamuso ose uhwonontɨfi yomo engo yontɨfi hnnɨmentohofi, Olo pehotɨkeno. Olo hungkuno nomêne songofoho. Olo hwe lohwo yokumpohnênyoênjo lohwo hungkuno lahonɨngki towahuno wonyo sohwa kakoe hungkunomo haloho pentɨfi tɨfi inɨngkahwofo. Ose hnnontɨfi 28 olo yoêmayo Jisas imentiso soêno hwaho Ngkalili sopo mjahoênɨmɨmentisofoho. 29 Jisas tajo ango mtaêni noswaponto kako Saimounênji Entɨluênji sikoênɨkwaêiye angomo humentohofofoho. Jemɨsɨênji Jounênji hofɨkoênji humentohofofoho. 30 Saimoun konemi siye aêapaho tohohmtnno uhnnɨngkahonɨngki kako ijempohopo humamentisofoho. Osoêno Jisas noswopahonɨngki oso hungkuno hiso komoêno ulɨmentohofofoho. 31 Ose ulahonɨngkofi aêmusi mnokinoênji nohumentanjopo uêmanto Jisas kakoe aho nomanto aêmu simo nulɨkofahonɨngki aêapaho tohohmtnno moiêwo imoênɨngkahonɨngki kako wopɨngo imoênɨmentisofoho. Wopɨngo imoênonto kako aêamumne wopayo iloho humisyofoho. 32 Oso sɨkuno somo aêamuso hofɨko aêamu nomêne yoêmayo yoêmayo mnokinoênjo soênji aêamu towahuno wonyoênjo soênji ipemotapmmentohofofoho. 33 Aêamu hopiênono oso ango Jisas humentanjo hokuêyo sopo uhuêmokumentohofofoho. 34 Aêamu yoêmayo yoêmayo mnokinoênjo soênji towahuno wonyoênjo soênji wopɨngo umokumentisofoho. Towahuno wonyo huhwo sohwa Jisas Anɨtuye hwomu sohumo yofe uhwoêmentohofo soêno Jisas hofɨkimo hungkunojo soêne mampiênyo umokumentisofoho. 35 Iyohohweênji Jisas nolɨkafonto kengopo aêamu mohumunyo sopo nowento osopo kako Anɨtumo jomo ulɨmentisofoho. 36 Saimoun kakoe aêamuênji Jisasɨneêno tɨpeentɨfi 37 Jisasɨmo tɨpɨhwonontɨfi ulɨmentohofi, Aêamu hopiênono kikineêno wotɨpekohonɨmoênantɨfi yalokwofo. 38 Ose ulahonɨngkofi Jisas ulɨmento, Hofɨkoe syohofoho. Nomêne ango mofone sopo wohwano. Nomêne aêamumo hungkuno wopɨngo wolutɨhwamneêno yohono. Osoêne pmmentohe hwoênyoho. 39 Ose ulahonɨngki nowentɨfi hwaho Ngkalili hoêmo soêmo tajo ango somo lutɨhwanto towahuno wonyo somo wae yaoêmentisofoho. 40 Hwe aêapaho sompoteênjo sohwo Jisasɨmo humotaho sulonto hwahopo hwomtame ulohofonto jomo yokumpohnênyo ulɨmento, Kɨko ngkimo wopɨngo wanɨmokumo lisoêmanji, jɨje yokumpohnênyoso hoponoho. 41 Jisas nupaênonto hitoho ulofahonɨngki aho kisusyonto hwe sohumo ulɨmento, Ou wopɨngo wakumokumonneêno yohono. Kɨko wopɨngo hmmoênyo. 42 Ose ulɨmentiso soêno oso uyo wonyo huhwo sohwo moiêwo komoêno iêmoênɨkahonɨngki kako wopɨngo humamentisofoho. 43 Wopɨngo humentanɨngki Jisas hwe sohumo yoka yokumpohnênyo ulɨmento, Olo yoheso nomêne aêamumo nulohotoho. Oêo, kɨko komoêno nowehoji oso aêamu tajo ango syohoênjo sohumo jɨje aêapaho utɨhwahoji yoêmayo Mouses selɨmentiso soêno Anɨtumo yano uyo. Oseso aêamu hopiênonohinoso uhwonɨngkuji jɨje aêapaho uyo wonyoso wopɨngo imoênɨngkiso soêno huno wosyofɨsyantafeho. Jisas ose ulɨmentisofoho. 45 Lɨhwojahonɨngki hwe huhwo sohwo kako aêamu hopiênonohinomo oso Jisas kakoe aêapaho wopɨngo umokumentiso soêno ulɨmentisoso oso hungkuno hiso angoêmeemo hoênɨmentisofoho. Osoêno Jisas kako nomêne angkuhwafopo mêmofayofoho. Kako mempo hohntaêni humentanɨngki aêamu ango kengo kengopontaêni kakimo uêmaêmentohofofoho.