Koulousi 3

1 Anɨtu kako Kɨlaisɨênji nakwoênjimo songo humayoêne nelɨkaêmentiso soêno nakwo Kɨlaisɨênji yoêmayo ahwomomjo soêntnneêno yomohuênyopo womehoênosyano. Kɨlais nakwoe Hwe Engo sohwo yofe engo manto Anɨtuye aho anga sohohntaêni nemokosyohumayoêne humaho. Nakwo kakoênji wohumantaneêno yɨhwono. 2 Sekwo yoêmayo hwahoponjo somneêno huno syafɨsyɨkutoho. Oêo, yoêmayo ahwomomjo somneêno fɨsyafɨhupmno. 3 Hwapɨngoso nakwo yoêmayo hwahoponjo somneêno poyo hopa peênontani songo humayo neso Jisasɨmo ufohiênɨngkahonɨngkuhwoni Jisas kako Anɨtumo ufohiênɨngkahonɨngki Anɨtu kako wopɨngo nemokosyohumaho. 4 Kɨlais nakwoe songo humayoêneso ne hweho. Kako utɨhwaênyopo iêmofapɨhwosoêno sekwo kakoênji nohumafɨkuji kakoe yokumpohnênyo soênji yofe engo soênji womantɨfeho. 5 Hwahoponjo yahino wonyo sɨmeho moêmo mnonawojoso poyo wapeênono. Yahino wonyoso olenoho. Aêmohufo, hungkuno wonyo, sɨmeho fefoyo, huno wonyo, nomêne aêamufe yoêmayo soêno hi namoênyo, osenoho. Aêamu nomêne aêamufe yoêmayo soêno hi umoênoso sohwo kako yoêmayo hoêyangoso kako anɨtu paênyo umokonto kako oso humnohini inɨngkowalofoho. 6 Aêamu oso yoêmayo hwahoponjo yahino wonyoso iwoênɨngkohofo somo Anɨtu kako sɨmeho wonyo uyonefoho. 7 Hohonta honɨngkano wonyo hiso sekumo yokumpohnênyo semokosyohumentanɨngki sekwo soku yoêmayo wonyoso imotofo kuyoho. 8 I osoêno olohonta sekwo yahino hopiênonohino loso fohoênaopmno. Sɨmeho wonyo, yoka, sitofo, oso fohoênaopmno. I sɨfajoênji wonyo hungkuno soênji sekwoe mango mtaêni noswapɨhwoloho. 9 Sekwo hwasyo hungkuno aêamu soênji nohnnɨngkutoho. Oêo, yoêmayo yahino wonyo imotofo somo nto hoênaoêmentohofofoho. 10 Osoêno sekwo aêamu songo imoênɨmentohofofoho. Oso aêamu songo imoênalokunjoso Anɨtu kako hwapɨngo hweho. Sɨkuno huhwo huhwi Anɨtu kako aêamu songo sokumo kakineêno huno wopɨngo sejaponto yahino songoênji Anɨtu kako paênyo semokalofoho. 11 Nakwo Anɨtuye yahino songo maêmentɨhwone hnênwi nakwo hinjohiênwi afaênwoho. I ole lɨwoênɨngkuhwoni, Aêamu temtitofo kengo kengo mtaêango hwafoho. U hungkuno kengoênjo hwafoho. U Jutafe honɨngkano hungkunomo inɨngkuwoênɨngkohofofoho. Honɨngkano hungkunomo minɨngkayoênjofoho. U aêamu weêmtaêangofoho. U hameponjo aêamufoho. U aêamu yofe engoênjo hwafoho. U aêamu sikinjofoho. Ose lɨwoênɨngkuhwoneso siki hungkunofoho. Hungkuno neso olenoho. Kɨlais nakwoe songo humayoso hwapɨngo sohwo kako nakwo aêamu kengo kengo hnênɨmo nonafohiênonto kako nakwo hinjohoênɨmo humaho. 12 Sekwo Anɨtuye aêamu ne kuyoho. Kako sekumneêno hitoho ulofoso soêno kakineêno sehwosopoêmentisofoho. Osoêno sekwo kakoe yahino lomo tɨfi finɨngkamno. Sekwo aêamu hopiênonohino somneêno hitoho selofɨhwosoêno hofɨkimo wopɨngo ulohopmno. Sekwoe yofe monje yasyɨkuji sekwo aêamu somneêno hwahopo pawomno. Aêamu fihwa sekumo wonyo selohopijoso sekwo sɨmeho wonyo uyɨkutoho. Oêo, sekwo sɨmeho wopɨngo uyɨmno. 13 Sekwo aêamu soênji foêmaênɨmno. U aêamu fihwa nomêni hwamneêno sɨmeho wonyo umoênoso soêno sekwo wonyo homo somo hohujwoêmo mehoênaopmno. Nakwoe Hwe Engo sohwo nakwoe wonyo wae enaoêmentiso oso paênyoso nakwo nomêne hwafe wonyo soêno hohujwo ukinjaofano. 14 Yahino wonyoangkafo selohe soênji nomêne yahino angaênohino nomêne somo hwofiloênnyo soênji ufohiênɨmno. Oso sɨmeho inyo yahino soênji ufohiênɨmno. Sɨmeho inɨfijoêmanji sɨmeho afaênjo wonyoangkafoênjo wohumantɨfeho. 15 Kɨlais kako sɨmeho pompenjiyo nejapɨwoênɨngkiso sohwo nakumo yokumpohnênyo wonemokosyohumano. Kɨlais kako nakwoe aêapaho angaênohino paênyo sɨmeho pompenjiyoênji humayoêne soêno nakumneêno joho nalɨmentisofoho. Osoêno sekwo soku sɨkuno huhwo huhwi kakimo isamoyoka ulɨwoênɨmno. 16 Kɨlaisɨye hungkuno wonyoangkafoso sekwoe sɨmeho moêmo nomafɨkuji huno wopɨngo sejapɨhwosi yoêmayo iwoênɨngkohofo somo ufehuêmokasesyono. Ose ifijoêmanji sekwo Kɨlais mtaêni huno wopɨngo tɨpemafɨkuji sekwo filutɨhunɨmno. Honɨngkano wopɨngo somo mɨhwatnnɨmno. Ose ifijoso sekwo Anɨtumneêno sɨmeho wopɨngo semoênɨngkuhwosoêno sekwo Anɨtuye hungkunoênjo Taênjo Iyoswo ta filɨmno. Osoênji tajo angomjo ta soênji ta nomêneso Anɨtuye Towahuno sejapeso Anɨtuye yofe hoênomayoêne filutɨhunɨmno. 17 Sekwo yoêmayo hungkuno wolano lɨkuji ou syoho uyano lɨkuji sekwo Jisasɨênji ejokuênohumafɨkuji sekwo Mpohwo Anɨtumo isamoyoka ulɨkuji yoêmayoso nakwoe Hwe Engo Jisasɨye yokumpohnênyoênji fiyɨmno. 18 Sekwo moyaêmi sofasi sekwoe hwehwamneêno hwahopo pawomno. Hofɨkimo enjwaêmo fosyohumamno. Hofɨkoe hungkunomo haloho itoêno popmno. Oso yahino nakwoe Hwe Engo moyaêmi sofa hofɨko ifitnneêento imentisofoho. 19 Sekwo hwe sohwasi sekwoe moyaêmisafamneêno wasemoênono. Sekwo sɨmeho wonyo semoênɨngkuhwosoêno ape sofamo yoka hungkuno nulɨkutoho. Oêo, hungkuno hofiyoênohino ulɨmno. 20 Sekwo mehomi soku, senɨngkwohwo senaêwohijafe hungkunomo sɨkuno huhwo huhwi haloho popmno. Ose ikujoêno Anɨtu kakoe sɨmeho wopɨngo umoênɨmontonoho. 21 Sekwo homnɨngkwohwosasi homnaêwohijasi sekwoe mehomife sɨmeho wonyo umokukutoho. Oso hwapɨngo hiso ole, yoka, sitofo, sɨfajo hungkuno ulɨwoênɨngkutoho. Yoêmayo ulohofɨkujoêno hofɨko sɨmeho tohino umnɨngkuhwosoêno honɨngkano wonyomo wowantɨfeho. 22 Sekwo syoho ulohofiyo soku, sekwoe hwe engo sohwafe hungkunomo tɨfi finɨngkamno. Sekwoe syoho somneêno wasemoênono. Syoho homo somo semokosyohumayo sohwo kako nosehonɨngkahonɨngki syoho yokumpohnênyo iwoênɨngkohofo oso paênyoso neêno fiyɨkuno. Hwapɨngoso sekwo Anɨtuye yofe hoênomayoêne syoho yalokwofo. 23 Yoêmayo hopiênonohino uyano lɨkuji sɨmoêmo ole fɨsyafɨhupmno. Olo syoho weêe loso aêamumneêno miyalokuyɨhwono. Oêo, nakwoe Hwe Engo Anɨtumneêno yalokuhwono. Ose syafɨsyɨkuji syoho yokumpohnênyo fiyɨkuno. 24 Sekwo inɨngo seyɨhwoloho. Nakwoe Hwe Engo Anɨtu sohwo sekwoe syoho yoêmayo soêno hoêyango ne sejaponefoho. Oso hoêyango neso Anɨtu nto hwosopeehumentisofoho. Sekwo Kɨlaisɨye syoho ulohofiyo soku kako sekwoe Hwe Engo hweho. 25 Aêamu fihwo kako wonyo yosoêmanji kako tohino nomanefoho. Nakwoe honɨngkano wonyomneêno Anɨtu kako tango monejapeênjo iyosoêno afofo hungkuno mulanehwono.