3 Joun 1
PNG1 Ngko Anɨtuye mehomi somo mokosyohumawoênɨngkohe sohwoêni ngko nje nɨngkwahwo Ngkaiyos sohwo hnneêno olo iyoswo loso kumtɨêmokiyalokweno. Ngko kikimo nehopi sɨmeho kijopalokweno. 2 Nje aêamu sohwosi, kɨko yoêmayo syoho wopɨngo yontanɨngkini Anɨtu kufoêmalokunjo soênji kɨko wopɨngo humahnno soêno ngko Mpohumo jomo ulalokweno. Jɨje huyoêmango soêno ngko huno niyohoho wopɨngo humaho. I jɨje huyoêmango wopɨngo humaso hopaso jɨje aêapaho hiênji wopɨngo osenohini humahnno soêno Mpohumo jomo ulalokweno. 3 Aêamu fehohnjo Anɨtumo sɨmeho hiêntnnono uyɨwoênɨngkohofoso jɨje angopo ntaêni nɨêmantɨfi ntɨmalofi, Ngkaiyos sohwo kako Anɨtuye hungkuno ne somo aho yokumpohnênyo kemokosyohumanto hofiyoêno inɨngkowalofoho. Ose ntahonɨngkofi ngko sɨmonyo imalefoho. 4 Nje mehomi hofɨko Anɨtuye hungkuno ne somo inɨngkowalokwofo soêno upaênonji osoêno ngko sɨmonyo iwoênɨngkohe hwoênyoho. Oso sɨmonyo iyo hiso nomêne yoêmayo soêno sɨmonyo iwoênɨngkohofo somo yakoloênnyofoho. 5 U nje aêamu sohwosi, kɨko aêamu Anɨtuye hungkuno lɨkuêmofɨwoênɨngkohofo sohwamo ufoêmawoênɨngkinoso oso wonyoangkafofoho. Jɨje aêamuênohinɨêmaho. Oêo, aêamu kengo mtaêango sohwanjoho. 6 Oso aêamu huhwo sohwa hofɨko olopo nɨêmantɨfi kɨko hofɨkimo wopɨngo ulohoêmahnno soêno nakwo Anɨtuneêno uhuêmokontanɨngkuhwoni nalɨmalofofoho. Kɨko aêamu Anɨtuye hungkuno lɨkuêmofo sohwamo jɨje angopo ntaêni hano hofiyoêno hmmofɨhwajo. Ose yahonɨngkiji Anɨtuye sɨmeho wopɨngo umoênɨmontonoho. 7 Hofɨko oso syoho yalokwofoso Kɨlaisɨye yofe hoênomayoêne yalokwofo. Aêamu Anɨtumo sɨmeho hiêntnnono muyoênjo sohwa mtaêni hofɨko hamniyoho yoêmayoso momasoênjo yalokwofo. 8 Nakwo Anɨtuye aêamu ne hnênwi nakwo oso aêamu huhwo sohwamo ufoêmano. Ose ihwasi oso hungkuno syoho neênjo soêno nakwo syoho afaêno womojokuênantanoho. 9 Ngko oso aêamu Ntiyoutɨlefesɨênji Anɨtumneêno uhuêmokuwoênɨngkohofo somneêno ngko iyoswo nomêneso nto mtɨêmokumalefoho. Ntiyoutɨlefes sohwo kako aêamu hiso hofɨko nakwoe hwe engo hwosoho ulantɨfeêno yalokunjo soêno kako nje hungkunomo haloho manɨpewoênɨngkiso hweho. Oêo, kako nje hungkunomo hwotoho nɨfewoênɨngkiso hweho. 10 Oseso ngko sekumo seêmaêmeêmanji ngko yoêmayo kako iwoênɨngkiso soêno waselɨmonnoho. Kako nakuneêno yoêmayo hungkuno wonyo lalofoho. Kako hwasyo hungkuno lalofoho. Osoênohiniêmaho. Oêo, kako aêamu Anɨtuye hungkuno lɨkuêmofo sohwamo kakoe angomo mipemotasyɨwoênɨngkiso hweho. I aêamu nomêneso hofɨko oso aêamu Anɨtuye hungkuno lɨkuêmofo somo nje angomo upemokosyawoêmo loso sohumo Ntayoutɨlefis sohwo kako hofɨkoe honɨngkano pɨjumofɨwoênɨngkiso hweho. Oseso kako oso aêamu homo somo hofɨko Anɨtumneêno uhuêmokiyo somtaêni wae weeoêmto yalofoho. 11 U nje aêamu sohwosi, kɨko yahino wonyo somo tɨfi inɨngkahutoho. Oêo, honɨngkano wopɨngo somnohini tɨfi finɨngkayo. Aêamu kako yahino wopɨngoênjo sohwo kako Anɨtuye aêamu hweho. Aêamu kako yahino wonyo iwoênɨngkiso oso hwo kako Anɨtuneêno huno mosyafɨsiyo hweho. 12 Aêamu hopiênonohino sohwa hofɨko Ntemitɨliyosɨye yofe hoênomalokwofo. Nakwo Ntemitɨliyos osohumo uhwonontani nakwo Kɨlaisɨye yahino ne somo uhwonalokuhwono. Osoêno ngko huhwoêni kakoe yofeso hoênomalokweno. Osoêno kɨko huno kiyohoho, Nje hungkunoso neênjofoho. 13 Oseso ngko hungkuno sawemo waselɨmonji ko yoheso osoêno ngko iyoswomo mamtɨêmokumnehono. 14 Weêenepi ngko nokuêmahmêmeêno nekwo hungkuno wohnnantaeho. 15 Jɨje sɨmehoso pompengo ufɨsyakumofono. Jɨje aêamu olopo humalofo sohwa hofɨko nje hwomuhwe kilalokwofo. Nje aêamu kɨkoênji humalofo sohwamneêno nje aêamufo ulalokweno. Kɨko hofɨkimo njiyo. Osohopeho. Ngko Jounêni hungkuno loso mtɨêmokohono.