2 Timouti 1
PNG1 Nje hwomu Timouti sohwosi, ngko Poul Kɨlais Jisasɨye hungkuno aêamumo lutɨhukuêmofo (apousel) syohoênjo sohwoêni olo iyoswo loso kikimneêno mtɨêmokalokweno. Anɨtu kakoe huno mtaêni nonɨhwosopento ntɨmento, Aêamu Kɨlais Jisasɨmo songo humayoêne sejopalofoho. Kakoe temtitofo imoênɨngkahonɨngkuji ango songo neêno humayoêne uyɨmonnoho. Osoêno olo hungkuno hiso kɨko aêamu angoêmeemjo somo filutɨhukuêmofo. Ose ntonto nɨhwatɨmentiso hwoênyoho. 2 Timouti, kɨko nje mehomi sohwosimo ngko sɨmeho kijopalokweno. Nanɨngkwohwo Anɨtu sohwoênji nakwoe Hwe Engo Kɨlais Jisasɨênji sikoêmontaêi siko yoêmayo wopɨngo kilohofohosɨsi kikineêno hitoho ulofɨhwosoêno jɨje sɨmeho pompenjiyo wokijopanjiyoho. 3 Nje ajuyohwosa hofɨko Anɨtuye yahinomo tɨfi inɨngkamotofo paênyoso ngko huhwoêni Anɨtumo tɨfi inɨngkowalokweno. Nje sɨmeho ole manjofoho. Kɨko wonyo hwosoho. Ose manjofoho. Oêo, Anɨtumneêno hi nɨmoênɨngkahonɨngki kakoe sɨmeho wopɨngo umokumonneêno yohono. Imɨngoênji hinjopo sɨkwoêmiyomo ngko Mpohumo jomo ulɨwoênonji kikineêno huno syakufɨsyonji isamoyoka ulɨwoênɨngkohono. 4 Ngko nokilɨkoêmahonɨngko kɨko humotaho sontɨmahnno soêno huno syakufɨsyonji nje sɨmeho wopɨngo wanɨmoênono lonji wakohonɨmonneêno yohono. 5 Kɨko Anɨtumo sɨmeho hiêntnnono ne uyalokuno soêno huno nɨfohotokwoho. Sɨmoêmo jɨje atohwo Louis kako Anɨtumo sɨmeho hiêntnnono uyahonɨngki hnnaêwohi Yunis kako Anɨtumo sɨmeho hiêntnnono uyahonɨngki olohonta ngko huno ole niyohi, Kɨko Anɨtumo sɨmeho hiêntnnono uyalokuno. Mangoênohini molalokuyohino. Oêo, sɨmeho hiêntnnono ne uyalokuno. 6 Osoêno jɨje hunoso olo soêno kufohotofalokweno. Hohonta nakwo kikimo aho kilonjɨmokumentɨhwone sohonta nje aho kisokisyahonɨngko Anɨtuye Towahuno kakoe yokumpohnênyo kijapmmentisofoho. Oso kijapeso engo umoênono. Hwe fihwo kako toho fuyo intofososo toho engo wosijaoêmontonoho. Oso hopaso Anɨtu kikimo kijapeso engo umoênono. 7 Kɨko huno kiyohoho. Anɨtu kakoe Towahuno nejapeso nakwo aêamumneêno iyoho nanyoêne nejapmmentisoêmaho. Oêo, oloêne nejapmmentono. Nakwo Anɨtuye yokumpohnênyoênji yoêmayo iyoêne aêamu somneêno hitoho nalofoêne nakwoe aêapahomnohini syafɨsiyoêneêmaho. Oêo, hwahoponjo yahino wonyo somo monje esyɨhwasi Anɨtuye honɨngkanomo ntoêno inɨngkayoêne, osoêno nejapmmentono. 8 Osoêno oso hiso Anɨtu kijapeso engo iêmokohoji kɨko nakwoe Hwe Engo sohwoe hungkuno aêamu somo lutɨhwahoji wonɨmango kinɨngkuhwoloho. Ngko nakwoe Hwe Engofe hungkuno lutɨhwanji impoêangomo humale soêno kɨko wonɨmango kinɨngkuhwoloho. Oêo, Anɨtu kakoe yokumpohnênyoênji kakoe hungkuno lutɨhwahoji yoêmayo tango ngkimo nɨêmaso paênyoso kikimo wokuêmano. Anɨtu wokufoêmaêmontonoho. 9 Anɨtu kako nakumo asomo netɨmayoêne honɨngkano nto hwosampento kakoe mehomi ne wopɨngoênohini imoênyoêne joho nelalofoho. Nakwo honɨngkano wopɨngo imotohwone soêno Anɨtu kako joho monelalofiyohoho. Awonoho. Anɨtu kakoênohini huno syafɨsyonto sɨmeho nejaponto joho nelalofoho. Hohonta Anɨtu nakwoe hwaho mamtɨêmokummentiso sohonta kako nakumneêno huno syonafɨsyonto sɨmeho nejaponto hwangku Kɨlais Jisas nejapmneêento lɨmentisofoho. 10 I olohonta Kɨlais Jisas kako nakumo nto noneêmanto kako nakumo asomo netɨmayoêne honɨngkanoso utɨhwaênyopo weho. Kɨlais Jisas kako songo lɨkaêmentiso sohonta kako poyo peênyo somjo yokumpohnênyo somo hwotoho fento kako songo neêno humayoêne honɨngkano hwosampoêmentisofoho. Osoêno aêamu kakoe hungkuno wopɨngo somo sɨmeho uyososoêno songo neêno humayoso womaêmontonoho. 11 Kako kakoe hungkuno wopɨngo ujoêne nɨhwosopoêmentisofoho. Osoêno ngko hungkuno lutɨhukuêmofo (apousel) syohoênjo hwoênyoho. 12 Oso hisoêno olo tango hiloso nɨêmahonɨngki ngko wonɨmango mannyofoho. Oêo, ngko Kɨlais Jisasɨmo sɨmeho hiêntnnono uyalokwe lohumneêno huno niyohoho. Olo syoho ntapmmentiso somo kako hofiyo nɨmokosyohumentanɨngkuhwosi olo syoho loso neêno nowentanɨngkuhwosi oso Sɨkuno Engo aeêuyoso iêmofaponefoho. 13 Oso hungkuno lokitɨhwamotesoêno kɨko yokumpohnênyo kesyohumahoji yahino hisomo hofiyo finɨngkayo. Kɨlais Jisasɨênji nohumahoji kakoe hungkunomo inɨngkahuji aêamu somo sɨmeho hiêntnnono engo uyo. 14 Olo syoho wopɨngo loso Anɨtu jɨje ahomo hoênakohumentisoso kɨko ntoêno mokosyohumaho. Anɨtuye Towahuno Wopɨngo kikimo humaso sohwo kakoe yokumpohnênyo kijapɨhwosi wokufoêmano. 15 Kɨko huno moiêwonoho. Hwe hufaêu Fijelosɨênji Hemoujenesɨênji oso hwaêuênji aêamu hopiênono hwaho Esiyantaêangoso olopo ngko nohumanji ngkineêno hohujo nto ikinjanɨmoêmalofofoho. 16 I hwe angaênohino Ounesifoulos, ngko impoêangomo nohumentahonɨngko kako ango Loum iêmofaponto ngkineêno hafɨhafe tɨpento tɨpenohonɨmaênɨmasofoho. Kako ngkineêno wonɨmango munyofoho. Oêo, sɨkuno piênɨngo engo kako nonɨêmahonɨngki nje sɨmeho wopɨngo nɨmokonto yokumpohnênyo nɨsosofitoêmasofoho. Oseso nakwoe Hwe Engo sohwo Ounesifoulosɨêmontohwamo wopɨngo umokosyohumamontonoho. 18 Hohonta ngko Efesos osopo nohumentanɨngko Ounesifoulos kako nɨfoêmawoênɨmentisofoho. Osoêno kɨko huno kiyohoho. Oso Sɨkuno Engo hungkuno ikwolofoêne somo Anɨtu kako Ounesifoulosɨmneêno hitoho ulofɨhwosi wopɨngo ulohofonefoho.