2 Pita 1

1 Ngko Saimoun Pitaênyoho. Ngko Jisas Kɨlaisɨye syoho ulohofiyo sohwoêni kakoêne hungkuno lɨkuêmofo (apousel) syohoênjo hwoênyoho. Jisas Kɨlais kako yahino wopɨngoênjo sohwo nakwoe Anɨtuyoho. Kako nakwoe wonyo somjo tohino somtaêni isɨhutofonemayoêne hweho. Sekwo soku oso hisoêno upaênontɨfi hungkuno homo somo sɨmeho hiêntnnono nakwo uyalokuhwone hopa uyontɨfi Anɨtuye hungkunomo aho yokumpohnênyo kemokosyohumalofo. Olo hungkuno loso sekumneêno mtɨêmokalokweno. 2 Sekwo Anɨtuênji nakwoe Hwe Engo Jisasɨêntnneêno sekwo sɨkuno huhwo huhwi huno engo fɨtɨpemapmno. Huno engo tɨpemapijoso siko sekumo wopɨngo selohofohosɨsi sekwoe sɨmeho wopɨngo engo wasemoênɨmontonoho. 3 Anɨtuye yokumpohnênyoso yoêmayo hopiênono Anɨtuye yahino wopɨngo somo inɨngkayoêne nejapmmentisofoho. Nakwo Jisasɨmneêno huno engo tɨpemehwasi yoêmayo nejapmmentiso soêno huno wonayɨmontonoho. Jisas huhwo sohwo kakoe yofe engo soênji kakoe yahino itoênohino soênji mayoêne joho nalɨmentisofoho. 4 Kakoe yokumpohnênyo engo soênji Anɨtu kako yoêmayo wopɨngo wonyoangkafo engo nakwo kakoe honɨngkano itoêno inɨngkayoêne wosejapmmo nalɨmentisoso olohonta kako nakumo nto nejapmmentono. Osoêno olo hwaho lopo yoêmayo wonyo nakwoe sɨmeho nelɨkafoso nakumo wonyo wonamokumonto yonte somo nakwo Anɨtuye yokumpohnênyoênji hwotoho fehwasi nakwo Anɨtuye yahino wopɨngoso womantanoho. 5 Oseso nakwo Anɨtuye honɨngkano itoênohino inɨngkayoêne nakwo Anɨtumo sɨmeho hiêntnnono uyoso ntoênohinɨêmaho. Oêo, nakwo Anɨtumo sɨmeho hiêntnnono uyɨhwasi nakwo honɨngkano wopɨngo imoênyoêne syoho yokumpohnênyo uyano. Osoênohinoso ntoênohinɨêmaho. Oêo, osopo nakwo sɨkuno huhwo huhwi Anɨtuneêno huno engo tɨpemayoêne huno ntoêno syofɨsyɨhwasi Anɨtu kako yoêmayo hofɨko ifitnneêento imentiso soêno nakwo huno wonayono. 6 Nakwo osoêno huno ntoêno naihwosoêno osopo nakwoe aêapaho wonyoêne syofɨsyasoso hwotoho wofeeno. Nakwo yoêmayo wonyoso hwotoho monje fesyɨhwasi yoêmayo tango neêmahwosoêno nakwo yokumpohnênyo wolohofano. Nakwo yokumpohnênyo lohofɨhwasoêno nakwo Anɨtuye yahino hopa uyano. 7 Ose ihwasoêno ou osopo nakwo nomêne aêamu somo nakwoe aêamu kuyoho ulano. Ose ulɨhwasi hofiyo ufoêmano. Hofiyo ufoêmehwasi nakwo sɨmeho nehopi unano. 8 Oso yahino ngko seloheso neêno mjɨmɨhwasi nakwo nakwoe Hwe Engo Jisas Kɨlaisɨye yahinoso nakumo toyo enaofɨhwosoêno yoêmayo syoho nakwo kakineêno yasoso ne umoênɨmontonoho. 9 Anɨtuye aêamu ne fihwo kako oso yoêmayo yahino homo somo momasoênjo yosoêmanji oso aêamu huhwo sohwo kako tɨmpiênyo paênyo hweho. Oso aêamu tɨmpiênyo huhwo sohwo kako Anɨtu kakoe wonyo wae yɨmoêmentiso soêno kako huno muyofoho. Kako inɨngo mofalofoho. 10 Oseso nje aêamu soku sekwo oso hopa ikutoho. Anɨtu kako sekuneêno joho selonto kakoe aêamu ne imoênyoêne sehwosopoêmentisofoho. Oso yahino ngko selohe somo mayoêne syoho yokumpohnênyo yohoênɨngkuji aêamu hofɨko nosehonɨngkuji ole woselantɨfeho. Sekwo Anɨtuye aêamu ne kuyoho. Sekwo ose ifijoso mopɨwahupitnnehofo. 11 Oêo, sekwo Anɨtuye yahino wopɨngoso nomafɨkujoêno oso honɨngkano Anɨtumo uêmayoêneso sekuneêno hwosompoênaweho. Osopo nakwoe Hwe Engo Jisas Kɨlais kako nakwoe wonyomneêno poyo imoênɨmentiso sohwoênji sekwo engolopohamo neêno nohumafɨkuji kako sekumo hofiyo semokosyohumanefoho. 12 Oseso olo hungkuno loso ngko neêno selɨwoênɨngkohefoho. Sekwo olo hilo soêno huno ko seyahonɨngki sekwo aho yokumpohnênyo ko kemokosyohumalofoso ngko apaêno selalokweno. 13 I ngko olo soêno nɨmoênɨngkohoho. Sɨkuno hopiênonohino somo ngko olo hwaho lopo songo humahmêmo sekwo huno aku syafɨsyɨyoêne olo hungkuno hiloso ngko sekumo neêno waselɨmonneêno yohono. 14 Ngko olo soêno huno niyohoho. Weêenepi ngko olo hwaho lopo ulɨkoêmaêmonnoho. Nakwoe Hwe Engo Jisas Kɨlais kako olo hilo soêno ngkimo huno nto lanɨfohotoêmasofoho. 15 Oseso ngko apaêno syoho engo yonji sekuneêno olo hungkuno hiloso mtɨêmokosesyalokweno. Hwangku ngko poyo peênɨme sohonta sekwo olo hungkuno homo losomo apaêno huno neêno syafɨhupitnneêenji mtɨêmokosesyalokweno. 16 Nakwoe Hwe Engo Jisas Kɨlais kakoe yokumpohnênyo engo soênji kako asomo pe-eêne soêntnneêno noselahonɨngkuhwoni sekwo nto upaênɨmentohofofoho. Oso hungkuno nakwo Kɨlaisɨmneêno selɨmentɨhwone hwapɨngoso aêmane hungkunoênji siki hungkuno osoênjo mtaêangoêmaho. Oêo, nakwo Kɨlaisɨênji nohumentani yoêmayo wonyoangkafo imentiso somo tɨmo uhwonɨmentɨhwonefoho. 17 Ou, oso hwofɨkiênyo sopo nakwo nohumentanɨngkuhwoni kanɨngkwohwo Anɨtu kakoe hwomufe yofeso hoênɨmahonɨngki Jisas kakoe aêapahoso pomponaho lahumentisofoho. Nakwo ahwomo mtaêni Anɨtu kakoe mampahoso kakoe hwomumo ulahonɨngki nakwo ole upaênɨmentɨhwoni, Oloso nje hwomufoho. Ngko kakineêno wopɨngo nɨmoênantohofoho. Nje sɨmehoso kakineêno wopɨngo nɨmoênantofoho. Nakwo ose hoênɨngkahonɨngki upaênɨmentɨhwonefoho. 19 Oseso aêamu Anɨtu hungkuno uyahonɨngki lɨmotofo sohwa oso hungkuno hiso hofɨko mtɨêmokumentohofo somo nakwo nupoênontani nehopi lɨmotofo lontani sɨmeho yokumpohnênyo uyalokuhwono. I osoêno sekwo hoku hofɨkoe hungkuno homo somo aho yokumpohnênyo fɨkesyohumamno. Hofɨkoe hungkuno hiso sɨkwoêmjoho soêmo tɨpomponaho hopa losyalofoho. Oso pomponaho hiso neêno nolosyontanɨngkuhwosi iyoho walongkonɨmo lɨhwosi iyohohweênji iêmu sɨêmofapɨwoênɨngkiso uhwonɨwoênɨngkuhwone hopaso Jisas kako oso iêmu hopa imoênɨngkuhwosi kako kakoe pomponahoso sekwoe sɨmeho moêmo lasesyonefoho. 20 Sekwo olo hilo soêno huno waseyono. Anɨtu kakoe aêamumo hungkuno uyahonɨngki lɨmotofo sohwa iyoswo mtɨêmokumentohofo somo nakwo atofo lontani aêamu fihwo nakwoênjo mtaêango sohwo kako oso hungkuno homo somjo neso kakoe huno mtaêni syafɨsyɨhwosi yoloho molɨjwaofonehoho. Awonoho. 21 Hohonta hwe fihwo kako ole majofoho. Anɨtu kakoe hungkuno nomahmêmo aêamumo ulɨmneêno yohono. Kakoe huno mtaêni ose majofoho. Oêo, Anɨtuye Towahuno kakoênohini hofɨkoe hunomo kakoe huno mtaênnohini tɨpemanto uyahonɨngki aêamu huhwo sohwa hofɨko Anɨtuye hungkuno lɨmotofofoho. Huno ose waseyono.