1 Koulin 9

1 Ngko Anɨtuye hungkuno lɨkuêmofo (apousel) syohoênjo hwoênyoho. Olo hwahoponjo syoho hiloso aêamu hwahoponjoso montapmmentohofofoho. Oêo, Anɨtu kako ntapmmentisofoho. Osoêno yoêmayoso ngkimo mokiloêmokomokonɨsyohumanehoho. Apousel nomêne sohwa hofɨko nakwoe Hwe Engo Jisas Kɨlaisɨmo uhwonɨmentohofoso ngko huhwoêni uhwonɨmentohefoho. Ngko kakineêno kakoe hungkuno losekuêmofahonɨngko sekwo oso hungkuno homo somo sɨmeho umentohofo soêno olo nje syoho homo losomo ne imoênɨmentisofoho. 2 I osoêno aêamu fehohnjoso ngkineêno ole lalokwofo. Olo hungkuno lɨkuêmofo (apousel) syoho loso Anɨtu kako Poulɨmo muyɨmmentisofoho. Ose ko lontɨfi sekwo soku sekwo Anɨtuye hungkuno nje mango mtaêni upaênontɨfi inɨngkamentohofo soêno sekwo huno wopɨngo neso ole tɨpemaêmentohofi, Poul kako Anɨtuye syoho nehopi yalofoho. Osoêno nakwo huno nayohoho, Poul kako Anɨtuye apousel ne hweho. Sekwo oso hisoêno huno seyohoho. 3 Aêamu fehohnjoso hofɨko nje syoho somneêno yoka ntɨwoênɨngkohofo soêno ngko olo hungkuno homo losomo aku ulɨwoênɨngkohono. 4 Nekwo Mponopasɨênji Anɨtuye hungkuno aêamu somo ulɨhwasoêno hofɨko nekumo wosopayo ejapɨfijoêmanji eêwa, oso yahinoso wonyotaho. 5 Pitaênji nomêne hwe Anɨtuye hungkuno lɨkuêmofo (apousel) syohoênjo sohwanji Jisasɨye konɨngkwaêwehwo sohwanji hofɨko moyaêmi Anɨtumo inɨngkawowoênɨngkohofo osofamo ape maêmentohofofoho. Hofɨko Anɨtuye hungkuno aêamumo lɨkuêmofoso aêmusyanji emoyontɨfi lɨkuêmofalokwofo somo sekwo wosopayo yoêmayoso uyalokwofo. I oseso nekwo Mponopasɨênji nekwo ose yasoso oso wonyotaho. 6 I nekwo Mponopasɨênji hamniyoho syoho yontai hamniyoho hiso notɨpementai nekwo wopayo yoêmayo oso mpe iwoênɨngkuhwoyo. I nomêne sohwa hofɨko Anɨtuye hungkuno selahonɨngkofi sekwo wopayo uyɨwoênɨngkohofo kuyoho. Nekwo wosopayoêne yoêmayo soêno jomo selonontentasi Anɨtu kako yahino ntoênohinɨêmaho elɨhwonesohilo. 7 Olo soêno huno waseyono. Hwe engo sohwafe aêamu itokusoênjo sohwa hofɨko siki syoho liwoênɨngkohofo. Oêo, awonoho. Hofɨko hamniyoho nomantɨfi wosopayo mpe iwoênɨngkohofo. Aêamu wopasyoho iwoênɨngkiso osohwo kako siki syoho liwoênɨngkohoho. Oêo, kako wopayo nomahwosi wanɨmontonoho. Aêamu yahu mokosyohumayo sohwo siki syoho liwoênɨngkohoho. Oêo, awonoho. Yahu fehohnjoso wanɨmontonoho. 8 Ngko olo hungkuno selalokwe losoêno nakwo aêamu olo hwaho lopo humalohwone hnênwi nakwo huno nayohoho. Oso hungkuno nehopeho lalokuhwono. I nakwoênohinoêmaho. Oêo, Anɨtuye hungkuno hi hiênjofoho. 9 Mouses kako hohonta olo hilo soêno ole mtɨêmokumento, Sekwo yahu mpulɨmokau sohwo hofɨko wosopayo hwit paho wae yaofoêne hwotoho feehonɨngkuji sekwo hofɨkoe mango somo nopɨjumofɨkutoho. Ose mtɨêmokumentisofoho. Oso yahu mpulɨmokau huhwo sohwo kako kakoe syoho somneêno mijoho uyahonɨngkuhwosi wosopayo hwit fehohnjoso wanɨmontonoho. Anɨtu kako oso yahu mpulɨmokau osomnohini syafɨsyonto nalɨmentisotaho. 10 Oêo, nakwo aêamu hiênnontnneêno syafɨsyonto nalɨmentisofoho. Anɨtu kako olo yahino losoêno umoênɨngkohoho. Aêamu kako wopasyoho osomneêno hwaho ikutofɨwoênɨngkiso sohwoênji aêamu wosopayo toyo yahonɨngki huêmemawoênɨngkiso sohwoênji siko wosopayo fehohnjoso nomahnneêenji syafɨsyonji syoho iwoênɨngkisiyofoho. 11 Oso paênyoso nekwo Anɨtuye Towahunoso sekwoe sɨmeho moêmo uyo hulɨmentɨhwoyofoho. Oso syoho imentɨhwoyo homo somneêno sekwo yoêmayo aêapahomneêno ejapɨfijoêmanji oso wonyotaho. Oêo, oso yahino hiso ntoênohinofoho. 12 Nekwo sekumo noselɨkoêmahonɨngkuhwoi nomêne aêamu sohwa hofɨko sekumo Anɨtuye hungkuno losetɨhwahonɨngkofi sekwo hofɨkimo wosopayo yoêmayoso uyɨmentohofofoho. Ose uyɨmentohofo soêno sekwo hofɨkimo yahino ntoênohinoso ulohoêmentohofofoho. Sɨmoêmo Anɨtuye hungkunoso sekwoe ango sopo mêmofape sohonta nekwo Anɨtuye hungkuno losetɨhwamentɨhwayofoho. Osoêno nekwo sekumtaêni yoêmayoso mayoso oso wonyotaho. Oso yoêmayoso womantayo ko imentɨhwayoso oso hiso nekwo momasofoho. Hwapɨngoso nekwo ole syafɨhuêmentɨhwoi, aêamu nekumneêno huno ole syafɨhupitnnehofo, Siko wosopayoênji mijoênji engo womaho nolonji Anɨtuye hungkuno lonetɨhwalokusiyo. Ose syafɨhupitnnehofo. Nekwo Kɨlais kakoe hungkunoso mopɨjwosyahnnohontai nekwo nakwoe hamniyohoênji hofɨkoe yoêmayo wosopayo mayo soêno yoêmayo tango kengo kengo nekumo eêmaêmentisofoho. 13 Sekwo olo hilo soêno huno maseyotaho. Aêamu hofɨko Anɨtuye ango engo somneêno wopayo Anɨtumneêno hoênasyɨwoênɨngkohofoso aêamu oso ango homo somjo syohoênjo sohwa hofɨko nomantɨfi nɨwoênɨngkohofofoho. Oso ijempoho Anɨtumneêno yahu fonjokisasyɨwoênɨngkohofo soponjo aêamu syohoênjo sohwa hofɨko yahu fehohnjoso nomantɨfi nonɨwoênɨngkohofofoho. 14 Oso yahino hisoêno Anɨtu kako nakumo olo honɨngkano hungkuno loso nejapmmentono. Aêamu Anɨtuye hungkuno lonetɨhwawoênɨngkohofo sohwa hofɨko oso hungkuno hiso lonetɨhwahonɨngkuji nakwo aêamu hnênwi nupaênɨngkuhwasi nakwo oso aêamu huhwo sohwafe aêapahomneêno ufoêmayoso wosopayo uyantanoho. Anɨtu oso honɨngkano hungkunoso nejapmmentisofoho. 15 Ngko sekwoênji humamentohe sohonta ngko sekumtaêni wosopayoêno jomo selontɨêmtentesi oso yahinoso wopɨngoênesohilo. I osoêno ngko sekwoênji nohumanji yoêmayoso momasoênjo hwoênyoho. I olohonta ngko yoêmayoso maêmneêenji momtɨêmokalokuyohono. Oêo, ngko momaêmnehono. Olo nje yahino losoêno nje sɨmeho wopɨngo numoênɨmaho. Oso nje sɨmeho wopɨngoso aêamu fihwo kako wae ntohofonoho. Ngko olo syoho loso neêno iêmo mijohoêno peênɨmeêmanji eêwano. Nje sɨmeho wopɨngo wanɨmoênɨmontonoho. 16 Ngko Anɨtuye hungkuno losetɨhwalokwe soêno ngko nje yokumpohnênyo soêno ngko nje yofe wohoênamoênɨmontaho. Oêo, oso nɨhuêno awonoho. Anɨtu kako ngkimo olo syoho loso ntapmmentiso loso ngko molosetɨhwayoênjoêmanji u ngko tango engo womaêmonnoho. 17 Hungkuno selalokwe hwapɨngoso olenoho. Ngko olo syoho loso ngko nje huno mtaêni uyɨmo lontɨêmtentesi u ngko sekumo ole selɨêmnesohilo. Sekwo nje syoho somneêno yoêmayo hoêyangoso ntapmno. Ose selɨêmnesohilo. Oêo, olo syoho loso Anɨtu kako ngkimo nonɨhwosopento ntapmmentiso soêno ngko nomêne honɨngkano ngko umneso ane hwoênyoho. Oêo, ngko Anɨtu kakoe syohoênohini ulohofiwoênɨngkohe hwoênyoho. 18 I osoêno ngko olo nje syoho losomneêno ngko peho hamniyoho maêmnehono. Nje hamniyoho mayoso olenoho. Ngko Anɨtuye hungkuno aêamumo lutɨhwawoênɨngkohe soêno ngko hamniyoho mantɨêmtentesi oso yahinoso ntoênohinɨêmaho. I osoêno ngko yoêmayo hamniyoho oso momaso hwoênyoho. Oêo, ngko siki syoho yalokweno. Oso yahino ngko esetɨhwalokwe soêno nje sɨmeho wopɨngo nɨmoênɨngkohoho. Oso sɨmeho wopɨngoso nje hamniyoho paênyofoho. 19 Ngko hwe hwahoponjo sohwoe syoho ulohofiyo umoênɨmonjɨêmaho. Oseso ngko hamniyoho mayoêne aêamufe hungkunomo enjwaêmo mohumuleno. I osoêno ngko aêamu hopiênonohino sofe syoho ulohofiyo imoênɨmentoheso hwe moyaêmi hopiênonohini hofɨko Anɨtumo sɨmeho uyɨfitnneêenji imentohefoho. 20 Ngko aêamu Juta somo Kɨlaisɨmo inɨngkafitnneêenji hofɨkoe yahino somo enjwaêmo humanji Kɨlaisɨye hungkuno lutɨhwamentohefoho. I ngko Kɨlaisɨmo sɨmeho uyalokwe soêno Kɨlais kako Jutafe honɨngkano hungkuno somtaêni ngkimo isɨhutofonɨmaêmentisofoho. Osoêno ngko honɨngkano hungkuno somo enjwaêmo mohumuleno. I osoêno aêamu honɨngkano hungkunomo enjwaêmo humalofoso hofɨko Kɨlaisɨye hungkunomo inɨngkafitnneêenji ngko honɨngkano hungkunomo enjwaêmo humaleno. Osopo humanji ngko Anɨtuye hungkuno lutɨhwawoênɨngkohefoho. 21 Oso paênyoso aêamu temtitofo kengoso hofɨko aêamu Jutafe honɨngkano hungkuno somo enjwaêmo mohumunyo soênji ngko hofɨkoênji nohumanji ngko huhwoêni oso honɨngkano hungkuno homo somo enjwaêmo mohumawoênɨngkiyohono. Ose yontanɨngko nohonontɨfi hofɨko Kɨlaisɨmo inɨngkafitnneêenji iwoênɨngkohefoho. I osoêno ngko oso paênyo nohumanji ngko Anɨtuye honɨngkano hungkuno soêno inɨngo maniyofoho. Oêo, ngko Kɨlaisɨye honɨngkano hungkuno somo enjwaêmo neêno humawoênɨngkohefoho. 22 Aêamu fehohnjoso hofɨkoe sɨmeho moêmo huno angaênohino yokumpohnênyo mutoênnyoso hofɨko huno ole syafɨsyɨwoênɨngkohofi, U, nakwo yoêmayo yahu oso nasoso nakwoe honɨngkano wonyo umoênɨmontonoho. Hofɨko oso yahino soêno ntahonɨngkofi ngko oso yahino hisoêno wonyoêmaho kosyafɨsyonji ngko hofɨkoênji nohumahmêmo oso yahino hiso ngko huhwoêni mimnehono. Ngko oso hiso iêmeêno nohonɨngkuji hofɨko Kɨlaisɨye hungkuno wopɨngo somo nupaênɨngkuji hofɨko sɨmeho yokumpohnênyo uyantɨfeho. Ngko aêamu angoêmeemjo soênji ngko hofɨkoênji nohumanji hofɨkoe yahino somo inɨngkamentohefoho. Aêamu fehohnjoso hofɨko ngkimo nonehonɨngkuji hofɨko Anɨtumo inɨngkafitnneêenji oso yahinoso iwoênɨngkohe hwoênyoho. 23 Aêamu fehohnjoso hofɨko Kɨlais Jisasɨye hungkuno somo tɨfi inɨngkakuji oso homo somo Anɨtu kako hofɨkimo wopɨngo ulohofoêneêenji olo syoho loso yalokweno. Oso paênyoso ngko huhwoênnonjimo wopɨngo ntohofoneênji yalokweno. 24 Aêamu hopiênono hofɨko mjakeêwe wohnnano lɨkuji mjakeêwe ko hnnifijoso aêamu fehohnjoso hofɨko hoêyango wopɨngoso womantɨfeêmaho. Osoêno sekwo huno maseyoho liyohoho. Oso paênyoso sekwo hokunonji Anɨtu mtaêni yoêmayo wopɨngo mayoêne sekwo Anɨtuye syoho yokumpohnênyo fiyohoênɨmno. 25 Aêamu hofɨko yoêmayo mjakeêwe hnnyo somjo hoêyangoso womano lɨkuji hofɨko pisoêmoênyo ikutoho. Oêo hofɨko hofɨkoe aêapaho yokumpohnênyo itoênyoêne syoho neêno mjimɨwekuji mjakeêwe hnnyo somjo hoêyango mayoêne syoho engo uyantɨfeho. I oso syoho engoso hwahoponjo hoêyangoênefoho. Oso hiso moiêwo umoênɨmonteêno yohoho. I osoêno nakwo Anɨtuye syoho yalokuhwone hnênwi nakwo hoêyango engolopohamo neêno wentɨhwone soêno syoho yalokuhwono. Osoêno syoho yokumpohnênyo uyano. 26 Aêamu mjakeêwe hnnyo sohwa hofɨko hano itoênohino yontɨfi hohwafo sopo komoêno iêmofapɨwoênɨngkohofofoho. Hano ikitokitofo soênjoêmaho. Oêo, awonoho. Oso paênyoso ngko Anɨtuye syoho iwoênɨngkohono. Aêamu yɨhufo wopolofano lɨkuji hofɨkoe meso siki wofantɨhmêmaho. Oêo, hofɨko yɨhufo ne somo nuhwonɨngkuji wofantɨfeho. Oso paênyoso ngko Anɨtuye syoho yalokweso siki miyalokuyohono. 27 Oêo, awonoho. Ngko nje hunomnohini minɨngkowalokuyohono. Oêo, yoêmayo wonyo nje sɨmeho sohwo umo lonte somo ngko monje yasyonji Anɨtu kakoe syohoso yɨhufo nemo uhwonontɨfi polofohofo oso hopa ntoêno yalokweno. U ngko ose mimmeêmanji Anɨtu kako ngkimo olo hungkuno loso wantɨmontonoho. Kɨko aêamu somo nje hungkunoso ko ulonji kɨko yoêmayo yahino wonyo jɨje sɨmeho sohwo umo lonte somo monje meesiyoênjo isoêmanji kɨko hoêyango momatnnohino. Anɨtu kako ngkimo ose ntonohonji ngko syoho yokumpohnênyo yalokweno.