ܡܙܡܘܪ̈ܐ 144

1 ܒܪܝܼܟ݂ܵܐ ܝܠܹܗ ܡܵܪܝܵܐ ܐܝܼܨܵܪܝܼ، ܕܡܘܼܠܦܵܝ ܠܹܗ ܐܝܼܕܵܬ‌ܝܼ̈ ܠܩܪܵܒ݂ܵܐ، ܘܨܸܒܥܵܬ‌ܝܼ̈ ܠܦܠܵܫܵܐ. 2 ܛܲܝܒܘܼܬ‌ܝܼ ܘܚܸܣܢܝܼ، ܒܹܝܬ ܓܵܘܣܝܼ ܘܦܲܨܝܵܢܝܼ، ܡܵܛܵܠܝܼ ܕܒܝܼܹܗ ܫܩܝܼܠܔ ܠܝܼ ܓܵܘܣܵܐ، ܙܲܒܛܸܢܵܢܵܐ ܕܥܲܡܡܹ̈ܐ ܬܚܘܿܬ ܐܝܼܕܝܼ. 3 ܝܵܐ ܡܵܪܝܵܐ، ܡܘܼܕܝܼ ܝܠܹܗ ܐܢܵܫܵܐ ܕܝܵܕܥܹܬ ܠܹܗ؟ ܒܲܪܢܵܫܵܐ ܕܚܵܫܒܹܬ ܠܹܗ؟ 4 ܐܢܵܫܵܐ ܠܢܫܲܡܬܵ‌ܐ ܟܹܐ ܕܵܡܹܐ، ܝܵܘܡܵܢܘܼ̈ܗ‌ܝ ܐܲܝܟ݂ ܛܸܠܵܢܝܼܬܵ‌ܐ ܥܵܒ݂ܪܵܢܬܵ‌ܐ ܝܢܵܐ. 5 ܝܵܐ ܡܵܪܝܵܐ، ܡܲܟܸܦ ܫܡܲܝܘܼ̈ܟ݂ ܘܨܠܝܼ، ܕܩܘܿܪ ܒܛܘܼܪ̈ܵܢܹܐ ܕܬܲܢܬܸܢܝܼ. 6 ܡܲܒܪܸܩ ܒܸܪܩܵܐ ܘܒܲܪܒܸܙ ܠܗܘܿܢ، ܫܲܕܸܪ ܓܹܐܪ̈ܘܼܟ݂ ܘܚܒ݂ܘܿܛ ܠܵܗ̇ ܥܲܠܵܝܗ‌ܝ. 7 ܦܲܫܸܛ ܐܝܼܕܘܼ̈ܟ݂ ܡ̣ܢ ܡܪܵܘܡܵܐ، ܦܲܨܝܼ ܠܝܼ ܘܦܲܪܸܩ ܠܝܼ ܡ̣ܢ ܡ̈ܝܼܵܐ ܪܵܒܵܐ، ܡ̣ܢ ܐܝܼܕܵܐ ܕܢܘܼܟ݂ܪ̈ܵܝܹܐ، 8 ܐܲܝܢܝܼ ܕܦܘܼܡܵܝܗ‌ܝ ܟܹܐ ܗܲܡܙܸܡ ܒܲܛܝܼܠܘܼܬܵ‌ܐ، ܘܝܲܡܝܼܢܵܝܗ‌ܝ ܝܲܡܝܼܢܵܐ ܕܕܘܼܓܠܵܐ ܝܠܵܗ̇. 9 ܝܵܐ ܐܲܠܵܗܵܐ، ܙܡܵܪܬܵ‌ܐ ܚܲܕܬܵ‌ܐ ܒܸܬ ܙܵܡܪܹܢ ܐܸܠܘܼܟ݂، ܒܩܝܼܬܵܪܵܐ ܕܥܸܣܪܵܐ ܣܝܼܡܹ̈ܐ ܒܸܬ ܫܲܒܚܸܢ ܐܸܠܘܼܟ݂. 10 ܗ̇ܘ ܕܟܹܐ ܝܵܗܒܹܠܔ ܦܘܼܪܩܵܢܵܐ ܠܡܲܠܟܹ̈ܐ، ܕܟܹܐ ܦܲܨܹܐ ܠܕܵܘܝܼܕ ܪܹܓܹܗ ܡ̣ܢ ܣܲܝܦܵܐ ܒܝܼܫܵܐ. 11 ܦܲܨܝܼ ܠܝܼ ܘܦܲܪܸܩ ܠܝܼ ܡ̣ܢ ܐܝܼܕܵܐ ܕܢܘܼܟ݂ܪ̈ܵܝܹܐ، ܐܲܝܢܝܼ ܕܦܘܼܡܵܝܗ‌ܝ ܟܹܐ ܗܲܡܙܸܡ ܒܲܛܝܼܠܘܼܬܵ‌ܐ، ܘܝܲܡܝܼܢܵܝܗ‌ܝ ܝܲܡܝܼܢܵܐ ܕܕܘܼܓܠܵܐ ܝܠܵܗ̇. 12 ܗ̇ܝܓܵܗ ܒܢܘܿܢܲܢ̈ ܒܥܠܲܝܡܘܼܬܵܝܗ‌ܝ ܒܸܬ ܗܵܘܝܼ ܐܲܝܟ݂ ܢܨܝܼܒ݂ܝܵܬܹ̈‌ܐ ܒܓ̰ܝܼܪܹ̈ܐ، ܒܢܵܬܲܢ̈ ܐܲܝܟ݂ ܥܲܡܘܼܕܹ̈ܐ ܦܪ̈ܝܼܡܹܐ ܕܩܘܼܪ̈ܢܝܼܵܬܹ‌ܐ ܓܵܘ ܒܸܢܝܵܢܵܐ ܕܩܲܨܪܵܐ. 13 ܐܲܢܒܵܪ̈ܲܢ ܒܸܬ ܗܵܘܝܼ ܡܸܠܝܹ̈ܐ، ܦܲܠܘܼܛܹܐ ܡ̣ܢ ܟܠܔ ܬܘܼܚܡܵܐ، ܥܸܪ̈ܒܲܢ ܒܸܬ ܝܵܠܕܝܼ ܒܐܲܠܦܹ̈ܐ، ܒܝܼܠܵܕܵܐ ܪܸ̈ܒܘܵܬܹ‌ܐ ܒܥܵܠܘܿܠܵܢܲܢ̈. 14 ܬܵܘܸܪ̈ܝܵܬܲܢ ܒܸܬ ܗܵܘܝܼ ܒܛܝܼܢܹܐ، ܠܹܐ ܗܵܘܹܐ ܬܪܵܥܬܵ‌ܐ ܕܫܘܼܪܵܐ، ܘܠܵܐ ܠܲܒܲܠܬܵ‌ܐ ܠܓܵܠܘܼܬܵ‌ܐ، ܘܠܹܐ ܗܵܘܝܵܐ ܡܲܩܘܲܚܬܵ‌ܐ ܒܫܘܼܩܲܢ̈. 15 ܛܘܼܒ݂ܵܐ ܠܥܲܡܵܐ ܕܗܵܕܟ݂ܵܐ ܝܠܵܗ̇ ܐܸܠܹܗ، ܛܘܼܒ݂ܵܐ ܠܥܲܡܵܐ ܕܡܵܪܝܵܐ ܝܠܹܗ ܐܲܠܵܗܹܗ.