Miamun 28

1 Ibinigi da Isak inuê Yakop ba da ifinti da ifai nan gin, “Agu anungê uda sagat Kanan mangan u. 2 Wauriê da wafa rinanggam ramanggan Betuel gampan mingêa intap Mesopotemia, da wau gayanggam Laban narunggan finam mangan. 3 Anutu Nampang Wain Tsiraê nafinti agu da nautus i u yanginggam nasu garam wain wain ampi bingan. 4 Anutu narim nam fintidan da agu da gam yanginggam nabi nam fintidan ragada mungê da Abraham ugu. Da intap aru Anutu riman da Abraham ugu da u mpada suda marawampua gin ani nasu agamam." 5 Isak ini ibinigi sib da itangin Yakop ifa Mesopotemia da Laban, Betuel garam Aram ugu narunggan. Laban igi Yakop da Isau rinanggan Rebeka nafunggan. 6 Da Isau iringant i nan ibi Isak irim nan fintidan sib da Yakop da itangin arangan ifa Mesopotemia i uda sagat mingêa nigi, da ipaê arangan i anungê uda sagat Kanan mangan u. 7 Da Isau iringant ibi Yakop yatangê warangê i ramanggan da rinanggan nanggan da ifa Mesopotemia sib. 8 Gubuê arigi da Isau uwayantan ipuê i ramanggan Isak buginda sagat Kanan igi. 9 Ibinigi da Isau ifan da Ismail, Abraham narunggan marub ugu, da itip iyu Ismail narunggan Mahalat, Nebaiot nafunggan finam, impruê da finin rusan iruê ugu. 10 Yakop itangin gamp Birsiba rai da ifa i waêa gamp Haran. 11 Gubuê arangan waêa mumai furis wasaê mangan da igingê igi, i gubuê iruê sib. Arangan iyu tauf maragangaf da yis gudzun gin isu unubin da igingê marampruê. 12 Da arangan ipuafub da itsangan antim guntiê bingan wain mingêa intap da buntun fawaêa gunungun, da itsangan Anutu angira gan ruêan da yaban. 13 Da itsangan Yawe muntida wagungê gin da nidan, “Dzi Yawe, u rumpunggam Abraham da ramanggam Isak Anutu gan. Intap aru u gingêa gin igi, Dzi bungê arim da agu da yangin rusam. 14 U yanginggam bungê awaê nasangê intap ngaruntsuaf, da bungê ampa nadzarang nafa gubuê yaban da gubuê ruêan da dzraê da fiê. Mingêa agu da yangin rusam da garam intap utup utup santan bungê ayu nam fintidan. 15 Da waringantin, dzi bungê arut agu da nampa tayangê agu i sanab idzuwai u fada gin, da dzi bungê atip nau agu naba intap aruani. Dzi bungê anang nam sib angu dzi nidan da tagadan da agu nasu nidzun, da dzi wasangê i tanginda agu rai u." 16 Yakop maran itaê da ini i wangunggan, “Nan nidzun bingan, Yawe impai ani, da dzi wasruê gin u." 17 Arangan irat da ini binaê, “Mumai aruani inang dzi rat funub angu. Mumai aruani isu Anutu ungaran da gunungun muantsi nifunggan." 18 Pisa tataê maratait da Yakop iyu tauf suda unub in ugu da yantungê iyab isu nam maran rufuran. Da iyats madamin iyabin i santingêa bida Anutu mumai gan mararam igi. 19 Yakop ifaringê mumai arigi binganggan Betelâ wainggan ‘Anutu ungaran’. Garam mpada nigi mungê ifaringê gamp igi binganggan Luts. 20 Yakop itsaf ruan nidzun angu da Yawe ini binaê, “Anutu, bida u ruta dzi da mpada tayangê dzi bini i sanab guntiê dzi nida fada gin da u rima nam gadan da ngarukui da dzi, 21 da bida dzi ba tipa waêa ramanggangê gampan ngarubini da nigi da agu Yawe bungê asu dzi Anutu gangê. 22 Da tauf aru dzi antungêan ani naraga mumai aruani nasu U Anutu ungaram tsarifa Agu gin. Da nam santan u riman da dziâ dzi bungê afab nasangê 10, da narim 10 igi gan bits da agu."