Apocalipsis 7

1 Ikꞌowinaq chi kꞌu waꞌ, xebꞌenuwil kajibꞌ ángeles e takꞌal lo chwi taq rukajchal rajlibꞌal ruwachulew. Waꞌ e ri kekiqꞌatibꞌej taq ri kajibꞌ utzaꞌm tew che ruwachulew chaꞌ ri tew na kuꞌan ta kꞌax che ruwachulew, che ri mar y che taq ri cheꞌ. 2 Xinwil kꞌu jun chik ángel xel lo pa relebꞌal lo ri qꞌij; rire rukꞌaꞌam ri sello re ri Dios kꞌaslik. Ewi lik ko xsikꞌin chike ri kajibꞌ ángeles, ri xyaꞌtaj chike kakiꞌan kꞌax che ruwachulew y che ri mar. 3 Jewaꞌ xubꞌiꞌij chike: «Nabꞌe na kaqakoj ri retalil che rukurusil ri kipalaj ri e aj chak re ri Qaqaw Dios, tekꞌuchiriꞌ utz kiꞌan kꞌax che ruwachulew, che ri mar y che taq ri cheꞌ» xchaꞌ. 4 Y xinta ri kajlibꞌal ri kojotal wa retalil chike: waꞌ e ciento cuarenta y cuatro mil. Rike echaꞌtal chikixoꞌlibꞌal konoje ri tinamit ke raj Israel. 5 Taq ri kojotal wa retalil chike, e waꞌ: kabꞌlajuj mil chike ri ralkꞌoꞌal kan ri Judá, kabꞌlajuj mil chike ri ralkꞌoꞌal kan ri Rubén, kabꞌlajuj mil chike ri ralkꞌoꞌal kan ri Gad, 6 kabꞌlajuj mil chike ri ralkꞌoꞌal kan ri Aser, kabꞌlajuj mil chike ri ralkꞌoꞌal kan ri Neftalí, kabꞌlajuj mil chike ri ralkꞌoꞌal kan ri Manasés, 7 kabꞌlajuj mil chike ri ralkꞌoꞌal kan ri Simeón, kabꞌlajuj mil chike ri ralkꞌoꞌal kan ri Leví, kabꞌlajuj mil chike ri ralkꞌoꞌal kan ri Isacar, 8 kabꞌlajuj mil chike ri ralkꞌoꞌal kan ri Zabulón, kabꞌlajuj mil chike ri ralkꞌoꞌal kan ri Benjamín, y kabꞌlajuj mil chike ri ralkꞌoꞌal kan ri José. 9 Ikꞌowinaq chi kꞌu waꞌ, xebꞌenuwil ukꞌiyal winaq yey na jinta junoq kachꞌijow rajilaxik ri kajlibꞌal. Rike e petinaq chupa ronoje taq ri tinamit, chike konoje rukꞌiyal kiwach taq ri tikawex che ronoje rukꞌiyal uwach chꞌaꞌtemal. Rike e takꞌal chwach ri Jun tzꞌul pa ri tzꞌulibꞌal re taqanik y chwach ri Qꞌapoj Bꞌexex. Yey konoje e wiqital rukꞌ kiqꞌuꞌ saq y kukꞌaꞌam uqꞌabꞌ palma pakiqꞌabꞌ. 10 Y konoje lik ko kesikꞌin che ubꞌiꞌxikil: «Ri qakolobꞌetajik petinaq rukꞌ ri qa Dios ri tzꞌul pa ri tzꞌulibꞌal, y rukꞌ ri Qꞌapoj Bꞌexex» kechaꞌ. 11 Yey konoje ri ángeles e takꞌalik, kisutum rij ri tzꞌulibꞌal re taqanik yey kisutum kij ri veinticuatro nimaq winaq y ri kajibꞌ kꞌo kikꞌaslemal pachaꞌ e ángeles. Xkixukubꞌaꞌ kꞌu kibꞌ, xkiqasaj kimejelem kꞌa chuꞌlew chwach ri tzꞌulibꞌal y xkiloqꞌnimaj uqꞌij ri Dios. 12 Jewaꞌ kakibꞌiꞌij: «¡Amén! ¡Amén! Xew che ri qa Dios taqalik kabꞌiꞌxik lik nim uqꞌij, kaꞌan tioxinik che y kaxuk ibꞌ chwach yey taqal che kabꞌiꞌxik kꞌo unimal uchomalil, saqil unaꞌoj y unimal uchuqꞌabꞌ. Yey waꞌ na jinta chi utaqexik taqal che Rire. ¡Amén!» kechaꞌ. 13 Tekꞌuchiriꞌ, xchꞌaw jun chike ri veinticuatro nimaq winaq, jewaꞌ xubꞌiꞌij chwe: —Taq wa kikojom kiqꞌuꞌ saq, ¿e china rike y pa e petinaq wi? —xchaꞌ. 14 Ximbꞌiꞌij kꞌu riꞌin che: —Wajawal, lal etaꞌmayom la re —xinchaꞌ. Ekꞌu rire xubꞌiꞌij chwe: —Konoje waꞌ e ri kichꞌijom uchuqꞌabꞌ ri unimal kꞌaxkꞌobꞌik yey kijosqꞌim ri kiqꞌuꞌ y kiꞌanom kꞌu saq che rukꞌ rukikꞌel ri Qꞌapoj Bꞌexex. 15 Ruma kꞌu laꞌ e kꞌo chwach ri tzꞌulibꞌal pa kataqan wi ri Dios y kakiloqꞌnimaj kꞌu Rire chipaqꞌij chichaqꞌabꞌ chupa ri Rocho. Ekꞌu ri Jun tzꞌul chupa ri tzꞌulibꞌal kajeqiꞌ kukꞌ, e pachaꞌ kuchꞌuq kiwiꞌ re kebꞌuchajij. 16 Jekꞌulaꞌ na kakitij ta chi numik y tzajin chiꞌ, na kakinaꞌ ta chi ne rukꞌatanil ri qꞌij y ri bꞌuk; 17 ma ri Qꞌapoj Bꞌexex ri kꞌo chwach ri tzꞌulibꞌal, e kachajin ke y kukꞌam bꞌi kiwach pa taq akꞌal pa kalax wi lo yaꞌ re kꞌaslemal. Yey e ri Dios kusuꞌ na ronoje ruwaꞌal kiwach rike —xchaꞌ.